شاحان كەنتىندە قازا بولعانداردىڭ ءتىزىمى انىقتالدى

قاراعاندى وبلىسىنداعى شاحان كەنتىندە ورىن العان اپاتتىڭ سالدارىنان قازا تاپقان تۇرعىنداردىڭ اتى-جوندەرى بەلگىلى بولدى. اپاتتىق-قۇتقارۋ جۇمىستارى بارىسىندا ءۇيىندى استىنان تومەندەگى  مارقۇمداردىڭ مۇردەلەرى تابىلدى: ۆ.م. اندروپوۆ, 1981 ج.ت. (جىلى تۋعان), و.ۆ. اندروپوۆا, 1988 ج.ت., ە.ۆ. اندروپوۆا, 2016 ج.ت., ۆ.ي. گالىشەۆ, 1960 ج.ت., ا.ا. گالىشەۆ, 2010 ج.ت., ت.ك. كان, 1953 ج.ت.,  ۆ.س. ميحايلوۆ, 1956 ج.ت., ە.يۋ. الەكسەەنكو, 1989 ج.ت., ۆ.ۆ. الەكسەەنكو, 2016 ج.ت.. سونداي-اق, قۇتقارۋشىلار قيراندى استىنان 1984 ج.ت. ازامات ا.ۆ. گالىشەۆتى امان الىپ شىقتى. ول ءتۇرلى جاراقاتتارمەن ماقاجانوۆ اتىنداعى اۋرۋحاناعا جەتكىزىلدى. جەرگىلىكتى بيلىك ورىندارى اپات بولعان ءۇيدىڭ زارداپ شەككەن تۇرعىندارىنا ارناپ «بەرەزكا» بالا باقشاسىندا جىلى ورىن دايىنداپ, ىستىق تاماق بەرۋ شارالارىن ۇيىمداستىردى. سونىمەن قاتار, بۇل جەردە قايتىس بولعان تۇرعىنداردىڭ تۋىستارىنا پسيحولوگيالىق كومەك كورسەتۋ قىزمەتى دە قاراستىرىلعان. جالپى, اپاتتىق-قۇتقارۋ جۇمىستارى كەزىندە 6 ادام قۇتقارىلىپ, 10 تۇرعىن قاۋىپسىز جەرگە كوشىرىلدى. توتەنشە وقيعا ورىن العان جەردە جەدەل شتابتىڭ جۇمىسى ۇيىمداستىرىلىپ, اپاتتىڭ سەبەپ-سالدارىن تەكسەرۋ جونىندەگى وبلىستىق كوميسسيا قۇرىلعان. شاحتينسك قالاسى اكىمىنىڭ شەشىمىمەن جەرگىلىكتى اۋماقتا توتەنشە جاعداي جاريالاندى. قازىرگى ۋاقىتتا جەرگىلىكتى بيلىك ورىندارى وپات بولعان تۇرعىنداردىڭ تۋىستارىنا مارقۇمداردى جەرلەۋ بويىنشا كومەك كومەك كورسەتۋ شارالارىمەن اينالىسىپ جاتىر. وبلىس اكىمدىگىنىڭ حابارلاۋىنشا, زارداپ شەككەندەرگە قارجىلاي كومەك كورسەتۋ بويىنشا ارنايى ەسەپ شوت اشىلادى. بۇگىن, ياعني 2 قاڭتار كۇنى ساعات 13.00-دە قۇلاعان ءۇيدىڭ ءۇيىندىسىن ارشۋ بويىنشا نەگىزگى جۇمىستار اياقتالدى. بۇل شاراعا 286 ادام جانە 55 تەحنيكا بىرلىگى جۇمىلدىرىلعان بولاتىن. ايتا كەتەيىك, 1 قاڭتار كۇنى قاراعاندى وبلىسىنداعى شاحان كەنتىندە بەس قاباتتى تۇرعىن ءۇيدىڭ بۇرىشى وپىرىپ قۇلاپ تۇسكەن بولاتىن. توعىز ادامنىڭ ءومىرىن جالماعان بۇل اپاتقا اۆتونومدى جىلۋ جۇيەسى قازاندىعىنىڭ جارىلۋى سەبەپ بولعان. قايرات ءابىلدينوۆ, «ەگەمەن قازاقستان»