تاساتتىق

ەلىمىزدە تاۋەلسىزدىكتىڭ تۋى ەندى جەلبىرەپ, تەڭگەنىڭ جاڭا اۋىس­قان كەزى ەكەن. سول جىلعى كوكتەمدە شاۋىلدىرگە ءبىر تامشى جاۋىن تامباي, ەل قاتتى ساسىپتى. اقىرىندا اۋىلدىڭ اقساقالدارى «تاساتتىق بەرەيىك» دەگەن توقتامعا كەلەدى. تاساتتىق – اللا تاعالادان جاڭبىر سۇراپ جالبارىناتىن, قۇرباندىققا ءبىر مال شالاتىن قۇدايى تاماق قوي. تاساتتىق بەرۋگە كەلىسكەن ەل اقشا جي­ناۋعا كەلگەندە ءبىراز داۋلا­سىپتى. اقشاسى بارلار 5 تەڭگەدەن جيناعىسى كەلەدى, تۇرمىسى تومەندەر 3 تەڭگەدەن بەرگىسى كەلەدى. اۋىل­دا­عى­لار ءارى-بەرى «ايتىسىپ», اقىرىندا 3 تەڭگەدەن جي­ناۋعا كەلىسەدى. اقشانى جيناپ, كەرەك-جاراعىنىڭ ءبارىن الىپ, مالدى سويىپ, اۋىلدىڭ قاسىنداعى قىردىڭ باسىندا تاساتتىق بەرىلەدى. اللانىڭ قۇدىرەتى, قۇران وقىلىپ, تاماقتى جەپ, جۇرت «ءاۋمين» دەپ بەت سيپاپ بولا بەرگەندە كۇن كۇركىرەپ, جاۋىن باستالادى. جۇرت جاپا-تارماعاي زاتتارىن جيناپ, ەتەكتەگى اۋىلعا قاراي جونەلىپتى. جاڭبىر بىرتە-بىرتە كۇشەيىپ, ساي-سالانىڭ ءبارى سەل بولىپ اعادى. سوندا زاتىن كوتەرىپ الىپ, ۇيىنە قاراي زىتىپ بارا جاتقان توپەن دەگەن اعامىز «ويباي, 3 تەڭگەدەن جيناعاندا مۇنداي بولدى, 5 تەڭگەدەن جيناعاندا «ۆووبششە» بىتەدى ەكەنبىز عوي», دەسە كەرەك. ورالحان ءداۋىت, «ەگەمەن قازاقستان»