مينيسترلىككە كەلىپ جۇمىس ىستەگىسى كەلمەيتىن ەلشىلەر بار - نازارباەۆ

قازاقستان سىرتقى ىستەر مينيسترلىگىنىڭ قۇرامىمەن كەزدەسكەن مەملەكەت باسشىسى نۇرسۇلتان نازارباەۆ كادر ساياساتىنىڭ پرينتسيپتەرىن ءتۇسىندىردى. بۇل تۋرالى اقوردانىڭ فەيسبۋكتەگى پاراقشاسى حابارلادى. «جاسى كەلگەن ەلشىلەردىڭ ءبارى قىزمەتتەن بوساتىلاتىن بولادى. ولاردىڭ ورنىنا جاڭا ادامدار تاعايىندالادى. ەلشىلىكتەردەگى كادر ماسەلەسىن مۇقيات قاراۋىمىز قاجەت. رەسەي, اقش, قىتاي, گەرمانيا, فرانتسيا سياقتى ەلدەرمەن اراداعى ساۋدا-ساتتىقتى دامىتۋعا, ينۆەستيتسيا تارتۋعا كۇش سالاتىن ۋاكىلدەرىمىز بولۋى كەرەك. تەك سىرتقى ساياساتپەن اينالىسامىز دەگەن بولمايدى. ءبىز اقش, قىتاي سياقتى سىرتقى ساياساتتا بۇكىل الەمگە ىقپال ەتىپ وتىرعان ۇلكەن ەل ەمەسپىز. ءبىز ءوز مۇمكىندىگىمىزگە قاراي ارەكەت ەتۋىمىز كەرەك. ەكىنشى جاعىنان, بۇرىنعى كەزدەرى بىزدە بىلىكتى كادرلار جەتىسپەدى. قازىر قۇدايعا شۇكىر, مىقتى ماماندار ءوسىپ كەلە جاتىر. سىرتقى ىستەر مينيسترلىگى ءوز كادرلارىن قالىپتاستىرۋ كەزەڭىن اياقتاپ كەلە جاتىر دەپ سانايمىن. سوندىقتان بارىڭىزگە ۇلكەن جاۋاپكەرشىلىك تۇسەدى. قازىر شەت ەلدەردە جۇرگەن كەي ەلشىلەرىمىزگە «مينيسترلىككە كەلىپ دەپارتامەنتتە ءبىراز جۇمىس ىستە» دەسە, ونى مەنسىنگىسى كەلمەيدى. بۇلاي بولمايدى. قايدا جۇمسايمىز سوندا جۇمىس ىستەسىن. سىرتقى ىستەر مينيسترلىگىندە اسكەردەگى سياقتى قاتاڭ ءتارتىپ بولۋى كەرەك. مينيستردەن باستاپ بارلىعىڭىزعا ۇلكەن جاۋاپكەرشىلىك ارتىلادى» دەدى ەلباسى.