ۋنيۆەرسيادا الاۋى
قازاقستاننىڭ 14 وڭىرىندە جاعىلعان 2017 جىلعى 28-ءشى دۇنيەجۇزىلىك قىسقى ۋنيۆەرسيادانىڭ الاۋى 25-29 قاڭتاردا الماتىعا جەتكىزىلەدى, وندا اكەلىنگەن بارلىق الاۋلار ويىنداردىڭ سالتاناتتى اشىلۋ ءراسىمى كەزىندە ۋنيۆەرسيادانىڭ ۇلكەن ءبىر الاۋىنا بىرىكتىرىلەدى. الاۋلار قاۋىپسىز شاحتەرلىك دەۆي لامپالارىمەن تاسىمالدانادى, ولاردى تەحنيكالىق ماماندار مەن وڭىرلىك جوو-نىڭ ۇزدىك ستۋدەنتتەرى الىپ جۇرەدى. جارىستار قازاقستاننىڭ وڭتۇستىك استاناسىندا 2017 جىلعى 29 قاڭتاردان 8 اقپانعا دەيىن وتەدى. قىسقى ۋنيۆەرسيادانىڭ باعدارلاماسىنا سپورتتىڭ 12 ءتۇرى كىردى. جارىستارعا 2 مىڭعا جۋىق سپورتشى قاتىسادى دەپ كۇتىلۋدە.
ەلىمىزدەگى ەڭ ءىرى «ەير استانا» اۋە كومپانياسى ۇلتتىق تاسىمالداۋشى رەتىندە 2017 جىلعى الماتىداعى 28-ءشى ءبۇكىلالەمدىك قىسقى ۋنيۆەرسيادانىڭ ۇيىمداستىرۋ كوميتەتىمەن ىنتىماقتاستىق جونىندە كەلىسىمشارت جاساستى. «ەير استانا» اق پرەزيدەنتى پيتەر فوستەر جانە 2017 جىلعى ۋنيۆەرسيادا ديرەكتسياسىنىڭ باسشىسى نايل نۋروۆ قۇجاتقا قول قويىپ, سونىڭ نەگىزىندە اتالعان قازاقستاندىق اۋە كومپانياسى قىسقى ويىنداردىڭ دەمەۋشىسى اتانىپ, ۋنيۆەرسيادانىڭ رەسمي سەرىكتەسى دەپ تانىلدى.
كەلىسىمشارت نەگىزىندە, «ەير استانا» جەرگىلىكتى جانە حالىقارالىق اۋە رەيستەرىنە سپورتشىلار مەن ديرەكتسيانىڭ رەسمي وكىلدەرىنە ايتارلىقتاي جەڭىلدىكتەر جاسايدى. ەستافەتا الاۋىن استانادان وزگە 15 ءوڭىر مەن الماتى قالاسىنا تاسىمالداۋمەن اينالىساتىن بولادى. جانە دە اقىسىز تۇردە ديرەكتسيا شارالارىن ءوز كوممۋنيكاتسيالىق تەتىكتەرى ارقىلى ناسيحاتتايدى.
– قىسقى ۋنيۆەرسيادانى ۇيىمداستىرۋعا كومەكتەسۋگە ءمۇمكىندىك العانىمىز ءبىزدى قاناتتاندىرىپ, جىگەرىمىزگە كۇش قوستى, – دەپ اتاپ ءوتتى «ەير استانا» اۋە كومپانياسىنىڭ پرەزيدەنتى پيتەر فوستەر. – سپورت سايىستارىنىڭ ەڭ ماڭىزدىسى الماتىدا ءوتىپ جاتقانى الەمگە قازاقستاننىڭ زور مۇمكىندىگى مەن الەۋەتىن كورسەتىپ, ەلدىڭ تانىمالدىعى مەن تۋريستىك مۇمكىندىكتەرىن ودان ءارى ارتتىرۋعا ىقپال ەتەدى. «ەير استانا» اتالعان شاراعا قولداۋ كورسەتۋدى ۇلكەن مارتەبە دەپ سانايدى.
– بۇگىنگى تاڭدا «ەير استانا» اۋە كومپانياسى الەمدەگى ەڭ ۇزدىك كومپانيالاردىڭ ءبىرى بولىپ تابىلادى. بىزدەرگە, ويىنداردى ۇيىمداستىرۋ كوميتەتى ءۇشىن «ەير استانامەن» ىنتىماقتاستىق ورناتۋ, ۋنيۆەرسيادانى ءساتتى وتكىزۋ بەرىك سەنىم قالىپتاستىراتىنى تالاسسىز, – دەدى 2017 جىلعى قىسقى ۋنيۆەرسيادا ديرەكتسياسىنىڭ باسشىسى نايل نۋروۆ.
اتاپ ايتارلىعى, 28-ءشى بۇكىلالەمدىك قىسقى ۋنيۆەرسيادا 2017 جىلدىڭ 29 قاڭتارى مەن 8 اقپانى ارالىعىندا الماتىدا وتەدى. قىسقى ۋنيۆەرسيادا باعدارلاماسىنا مانەرلەپ سىرعاناۋ, شورت-ترەك, تاۋ شاڭعىسى, سنوۋبورد, بياتلون, شاڭعىمەن جارىسۋ, شايبالى حوككەي (ايەلدەر مەن ەرلەر اراسىنداعى), كەرلينگ, شاڭعىمەن ترامپليننەن سەكىرۋ, شاڭعى قوسسايىسى, كونكيمەن جۇگىرۋ, فريستايل سەكىلدى 12 سپورت ءتۇرى كىرگەن. جارىستارعا 2 مىڭعا جۋىق سپورتشى قاتىسادى دەپ كۇتىلۋدە. ۋنيۆەرسيادا وتكىزىلەتىن ۋاقىتتا 3 مىڭ ەرىكتى, ونىڭ ىشىندە شەتەلدىك ەرىكتىلەر اتسالىسادى. ستۋدەنتتەر اراسىنداعى سپورت ويىندارىنا بىرنەشە مىڭ وتاندىق جانە شەتەلدىك تۋريست كەلەدى دەپ بولجانۋدا. سايىستاردى الەمنىڭ 80 ەلىندەگى 1 ميلليارد ادام تەلەديدار ارقىلى تاماشالاپ, قايتالانباس كەرەمەت ويىنداردىڭ كۋاسى بولماق.
«ەير استانا» 2002 جىلدىڭ 15 مامىرىنان بەرى ۇشىرىلىمدى جۇزەگە اسىرىپ كەلەدى, بۇگىندە باتىستا شىعارىلعان 30 ۇشاقتان تۇراتىن Boeing 767-300ER, Boeing 757-200, Airbus A320 ي Embraer E190 اۋە كەمەلەرىنە ارنالعان پاركى بار. كومپانيانىڭ مارشرۋتتىق جەلىسى 60-تان استام حالىقارالىق, وڭىرلىك باعىتتى قامتيدى. «ەير استانا» تمد جانە شىعىس ەۋروپا اۋە كومپانيالارى اراسىندا Skytrax World Airline Awards 2012 بەدەلدى جۇلدەنىڭ 4 جۇلدىزىنا ءبىرىنشى بولىپ, لايىقتى اتاندى. جانە دە ورتالىق ازيا مەن ۇندىستانداعى ەڭ ۇزدىك اۋە كومپانياسى بولىپ تانىلدى. قوس جۇلدە, 2013, 2014, 2015 جانە 2016 جىلدارى راستالدى. وسىنداي جوعارى كورسەتكىشتەر مەن بيىك دەڭگەيگە جەتىپ جۇرگەن كومپانيانىڭ جۇكتەلگەن جاۋاپتى مىندەتتى ابىرويمەن اتقارىپ شىعاتىندىعىنا سەنىم مول.
ايناش ەسالي,
«ەگەمەن قازاقستان»
