كوۆالەۆ: گولوۆكيننەن قاتتى سوققى العانىم راس

رەسەيلىك بوكسشى سەرگەي كوۆالەۆ قازاقستاندىق گەننادي گولوۆكيننەن نوكداۋن العانىن مويىندادى. بۇل تۋرالى vesti.kz حابارلادى. ءبىر كەزدەرى قوس بوكسشى ابەل سانچەستىڭ قول استىندا جاتتىققان بولاتىن. الايدا, بەلگىلى ءبىر سەبەپتەرگە بايلانىستى رەسەيلىك سپورتشى 2012 جىلى ارىپتەستىگىن توقتاتقان. بريتانيالىق دجونني نيلسون سپاررينگ كەزىندە كوۆالەۆتىڭ گولوۆكيننەن قاتتى سوققى الىپ, ەسەڭگىرەپ قالعانى تۋرالى تىلشىلەرگە سۇحبات بەرگەن. مىنە, وسىدان كەيىن بۇل جايت كوپشىلىك اراسىندا قىزۋ تالقىلانعان. كوپ ۇزاماي مۇنداي جاعدايدىڭ بولعانىن رەسەيلىك سپورتشىنىڭ قازىرگى باپكەرى دەۆيد دجەكسون راستادى. دەگەنمەن, سول تۇستا سەرگەيدىڭ جاتتىعۋ زالىندا العاشقى كۇنى بولعاندىقتان قالىپتى دەڭگەيىندە جۇدىرىقتاسپاعانىن ايتتى. ال كوۆالەۆتىڭ ءوزى بۇعان دەيىن بۇل جايدى تەرىسكە شىعارعانمەن, قازىر وقيعانىڭ قالاي وربىگەنىن مالىمدەدى. «ءيا, دەمالىستان كەيىن ابەل سانچەستىڭ جاتتىعۋ لاگەرىنە كەلىپ, گولوۆكينمەن سپاررينگ وتكىزگەنىم راس. ونىڭ سوققىسى مىعىم ەكەن. كەزەكتى ءبىر سوققىسىنان كەيىن ەدەنگە قۇلاپ ءتۇستىم. بىراق ورنىمنان تۇرىپ, ارى قاراي جالعاستىرۋعا مۇمكىندىگىم بولدى. بۇل ءۇشىن ۇيالامىن دەپ ايتا المايمىن. ءبىز بي بيلەپ جۇرگەن جوقپىز, بوكس بولعاندىقتان بۇل قالىپتى جاعداي. ونىڭ ۇستىنە سول ۋاقىتتا چەليابينسكىدەن جاڭا كەلگەن بەتىم بولاتىن. جاتتىعۋعا بىردەن ءسىڭىپ كەتە المادىم. سپاررينگتىڭ ءبىر راۋندى 4 مينۋتتان, ال ءۇزىلىس 30 سەكۋندتان عانا بولدى. جۇرتتىڭ ايتىپ جۇرگەنى تەك ءتورتىنشى راۋندتا عانا ورىن الدى», – دەدى كوۆالەۆ.