فريستايل – جۇرەكتىلەر سپورتى

جانبوتا الدابەرگەنوۆا – فريستايل­دىڭ اكروباتيكا تۇرىنەن ءىرى جەڭىسكە جەتكەن تۇڭعىش قازاق قىزى. ونى وسى ەرەك­شەلىگىمەن ەلىمىزدىڭ سپورت تاريحى­نىڭ ءبىر التىن پاراعىنا اينالدى دەسەك ابدەن جاراسادى. سوچيدە وتكەن وليمپيا ويىندارىندا جانبوتا 6-ورىنعا تابان تىرەدى. راسى كەرەك, اۋەدەگى اكروباتيكانى بۇرىن دا كورىپ جۇردىك قوي. بىراق قىسى قوياننىڭ قۇيرىعىنداي شولاق, قالىڭ قار كورپەسىن قىمتاپ ۇزاق جاتا المايتىن كۇن ساۋلەلى وڭتۇستىك قىزىنىڭ سەكىرۋ كەزەگى كەلگەندە, ءوزىمىز كادىمگىدەي سەسكەنىپ قالىپ جۇردىك. بيىك توبەدەن شاڭعى ۇستىندە جەلمەن جارىسىپ, قۇلديلاپ كەلىپ, قايقاڭعا ىلىككەن سوڭ ۇشقان قۇسقا ۇقساپ اسپانعا قالىقتاپ كەتەسىڭ. اۋەدە ەكى-ءۇش مارتە اينالىپ, تارتىلىس زاڭىمەن جەرگە قاراي سورعالايسىڭ. اسپاننان اعىنداپ كەلە جاتىپ, جەرگە جاقىنداعاندا, دەنەڭنىڭ ءار گرامم سالماعىن ەسەپتەپ ۇلگەرىپ, قاققان قازىقتاي تىك ءتۇسۋ, تەپە-تەڭدىك بۇزباي سىرعاناۋ كورەر كوزگە عانا وڭاي. ءسال قاتەلەستىڭ, دەنەڭە يە بولا الماي قالدىڭ, سپورتتىق كورسەتكىشىڭنىڭ ناتيجەسى تومەندەگەنى بەر جاعى, اۋىر جاراقات الىپ قالۋىڭ وپ-وڭاي. قارى جوق وڭتۇستىكتىڭ قىزى وسى كەدەرگىلەردەن امان ءوتتى. دۇنيە ءجۇزى كوز تىككەن اق وليمپيادادا جازىنان قىسى كوپ, شاڭعىسىن بايلاپ الىپ كۇندە جاتتىعۋ الاڭىنان شىقپايتىندار كىل مىقتىمەن تەرەزەسى تەڭ ونەر كورسەتتى. جانبوتا الدابەرگەنوۆامەن وڭتۇستىك قازاقستانداعى №8 قىسقى سپورت مەكتەبىنىڭ ديرەكتورى باقىتجان زيابەكوۆتىڭ كەڭسەسىندە كەزدەستىك. – مەن قىسقى سپورت مەكتەبىنە 2011 جىلى ازيا ويىندارىنان كەيىن كەلدىم, – دەيدى جانبوتا. – وعان دەيىن بەس جىل سپورتتىق گيمناستيكامەن اينالىس­قان­مىن. ناتيجەسىز ەمەسپىن, سپورت شەبەرى اتاعىم بار. سپورتتىق گيمناستيكادا باسەكەل­ەس­تىك كۇشتى, ال مەنىڭ ارمانىم قىسقى وليم­پيادا ويىندارىنا قاتىسۋ بولات­ىن. ونىڭ ۇستىنە, گيمناستيكا مەن فري­ستايلداعى اكروباتتىق ادىستەر ۇقساس. باتۋت­تا ورىنداپ جۇردىك. بىراق شاڭعى­عا ال­عاش تۇرعاندا, كوڭىلىمە ۇلكەن قوبالجۋ كىردى. ءوزىم 37-38 ولشەمدى اياق كيىم كيەمىن, شاڭعىمەن ولشەگەندە, جارتى مەتردەي ۇزارىپ كەتكەندەي بولدى. كەيىنىرەك بۇل جانىما وتە جاقىن سپورت تۇرىنە اينالدى. قىستا تاۋلى ادىرلاردان بولەك سۋ ترامپلينىندە دە جاتتىعۋ وتكىزەمىز. – ارادا جىل وتكەندە, مينسك قالا­سىندا ەۋروپا كۋبوگىنىڭ كەزەڭىندە 3-ورىن الدىم, – دەپ جالعادى ءسوزىن جان­بوتا. – 2013 جىلى ەۋروپا كۋبوگى­نىڭ 1-2 كە­زەڭىندە شۆەيتساريادا 1-ورىنعا يە بول­دىم. ەلىمىزدىڭ وقۋشىلار اراسىندا وتكەن قىسقى سپارتاكياداسىندا باس جۇلدە بۇيىردى. ايتقانداي, فريستايل-اكروباتيكادان ءبىز عانا سەسكەنەمىز بە دەسەك, وسى سالانىڭ اقبەرەنى جانبوتانىڭ ءوزى ءار جارىس الدىندا قاتتى قوبالجيدى ەكەن. شىعان­داپ اسپانعا كوتەرىلىپ كەتەسىڭ, ۇشقان كەزدە دە اۋەدەگى ءادىس پەن جەرگە قاتەسىز قونعان­عا دا شەبەرلىك, ۇلكەن ەپ كەرەك. «كەيدە كەزەگىڭ كەلگەندە, دولى جەل قۇتىرىپ كەتەدى, اۋەدە قاقپاقىلعا اينالدىرعىسى كەلەدى, باعىتىڭا كەدەرگى كەلتىرەدى, قاتتى قينالا­سىڭ. مۇمكىندىگىنشە قاتە جىبەر­مەۋگە تىرىساسىڭ. ءسال ءمۇلت كەتۋ ءنا­تي­جەڭدى تومەندەتەدى», – دەيدى جانبوتا. جانبوتا ءۇشىن الدا ەكى ۇلكەن جاۋاپتى كەزەڭ تۇر. الماتىدا قىسقى ۋنيۆەرسيادا ويىندارى وتسە, وڭتۇستىك كورەيادا ازيا ويىندارى وتپەك. – ءبىز جانبوتا جانە باپكەرلەرمەن كەڭەسە وتىرىپ, وزىمىزدەگى ۋنيۆەرسياداعا قاتىسۋدى ءجون كوردىك, – دەيدى باقىتجان وردابەك ۇلى. – ازيا ويىندارىنىڭ دارەجەسى بيىك سياقتى كورىنگەنىمەن, وتانىمىزدا وتەتىن ۋنيۆەرسيادانىڭ جاۋاپكەرشىلىگى ۇلكەن. جانبوتا الدابەرگەنوۆا دا وسىنداي ويدا. ءوز ەلى, ءوز جەرىندە وتكەن ۋنيۆەرسيادادا توپ جارىپ, قازاقستان بايراعىن كوتەرىپ, ءانۇرانىن ويناتۋ كەۋدەسىندەگى ادەمى ارمانى. فريستايل سپورتىنان ەلىمىزدىڭ مەملەكەتتىك جاتتىقتىرۋشىسى قازبەك يمانعالي دا «جانبوتا الدابەرگەنوۆا كەيىنگى كەزدەرى وتە جوعارى جەتىستىكتەرگە جەتىپ ءجۇر. ودان تەك التىن كۇتەمىز» دەپ وتىر. تۇيعىنداي قىز وسى ۇدەدەن شىعۋعا بارىن سالىپ جاتىر. باقتيار تايجان, «ەگەمەن قازاقستان» شىمكەنت