مانەرلەپ سىرعاناۋدان اشىق ەل چەمپيوناتى ءوتتى

«الماتى ارەنا» مۇز ايدىنىندا قازاقستان, قىرعىزستان جانە وزبەكستاننىڭ 18 جاسقا دەيىنگى سپورتشىلارى ونەر كورسەتكەن مانەرلەپ سىرعاناۋدان اشىق ەل چەمپيوناتى اياقتالدى, دەپ حابارلادى الماتى قالاسىنىڭ دەنە شىنىقتىرۋ جانە سپورت باسقارماسىنىڭ ءباسپاسوز قىزمەتى. جارىسقا 80-گە جۋىق مانەرلەپ سىرعاناۋشىلار قاتىسقان. ولار ەلىمىزدىڭ بارلىق ايماقتارىنان جانە شەتەلدەردەن كەلىپ, مانەرلەپ سىرعاناۋدىڭ ءۇش باعىتى بويىنشا ونەر كورسەتتى.  سپورت شەبەرلەرىنىڭ اراسىنان باستاپقى ەكى باعدارلامانىڭ قورىتىندىلارى بويىنشا قىزدار اراسىندا ءبىرىنشى ورىندى ايتارلىقتاي الشاقتىقپەن ەليزابەت تۇرسىنباەۆا (216,46) جەڭىپ الدى. ودان كەيىنگى ورىنداردا كەلە جاتقان الماتىلىق ايزا يمانبەك پەن الەكساندرا سايۋتينا 135,11 جانە 123,41 ۇپايدان جيناپ, ەكىنشى جانە ءۇشىنشى ورىنداردان كورىندى. ەر بالالار اراسىندا ۇزدىكتەردىڭ قاتارىن 150,48 ۇپايمەن الماتىلىق ارتۋر پانيحين باستادى. ونىڭ ءىزىن الا (132,13) ۇپايمەن قاراعاندىلىق مەليس حاكيموۆ كەلسە, استانالىق نيكيتا مانكو (129,92) ۇپايمەن ءۇشىنشى ورىندى قاناعات تۇتتى.