اتىراۋدا تەستىلەۋ ورتالىعى اشىلدى

اتىراۋدا وڭىرلىك تەستىلەۋ ورتالىعى اشىلدى. ورتالىقتا جوعارى سىنىپ وقۋشىلارى الداعى ەمتيحاندارعا, ۇبت-عا دايىندىق كەزىندە بىلىمدەرىن تەكسەرەدى, دەپ حابارلادى قازاقپارات. «قازاقستاندا جوبانى ىسكە قوسپاس بۇرىن الەمدىك تاجىريبە تىڭعىلىقتى زەردەلەندى. بۇگىندە ورتالىقتار الماتى, شىمكەنت, اقتاۋ, تاراز, اقتوبە, تالدىقورعاندا ءساتتى جۇمىس ىستەۋدە. تاياۋ ۋاقىتتا مۇنداي ورتالىقتار قىزىلوردادا جانە ەلدىڭ سولتۇستىك وڭىرلەرىندە دە اشىلادى. تەحنولوگيالىق مۇمكىندىكتەر, بىرەگەي كونتەنت, تالداۋدىڭ ارقاسىندا مىڭداعان وقۋشىلار ەمتيحانعا ۇزدىك دايىندالا الۋدا», - دەدى اتىراۋلىق فيليالدىڭ اشىلۋ بارىسىندا ونلاين-تەستىلەۋ ورتالىعىنىڭ ديرەكتورى الجانبەك كوشەرباەۆ. ورتالىق فيليال جاڭا تەحنيكالىق جابدىقپەن قامتىلعان جانە 150 ورىنعا ەسەپتەلگەن. تەستىلەۋدەن وتكەننەن كەيىن وقۋشىلارعا وزىندىك ەسەپ بەرىلەدى. وندا مەكتەپ باعدارلاماسى بويىنشا ءبىلىم بەرۋدەگى ولقىلىقتار اتاپ وتىلەدى. سونىڭ نەگىزىندە ۇسىنىمدار بەرىلەدى. ءوزىنىڭ بىلمەگەنىن تالداعان وقۋشىلار قوسىمشا ساباقتارعا جازىلىپ, ۇزدىك ۇستازداردىڭ ۆيدەو ساباقتارىنا قولجەتىمدىلىك الا الادى.