وتاندىق فيلمدەر ءۇندىستاندا كورسەتىلەدى

ش.ايمانوۆ اتىنداعى «قازاقفيلم» اق جارىققا شىعارعان  كينوتۋىندىلار ۇندىستانداعى كەرالا شتاتىنىڭ استاناسى تيرۋۆانانتاپۋراما قالاسىندا جەلتوقساننىڭ 9-ى مەن 16-ى ارالىعىندا وتەتىن 21-ءشى حالىقارالىق ءۇندى كينوفەستيۆالىندە - ايتۋلى وقيعا  - «قازاقستانعا نازار سالۋ» باعدارلاماسى اياسىندا كورسەتىلەتىن بولادى, دەپ حابارلادى kazakhfilmstudios.kz. فەستيۆال شەڭبەرىندە «قازاقفيلم» كينوستۋدياسىنىڭ ءار جىلدارى تۇسىرىلگەن فيلمدەرى كورسەتىلەدى, اتاپ ايتساق: «كەلىن» (رەج. ە.تۇرسىنوۆ), «شال» (رەج. ە.تۇرسىنوۆ), «ستۋدەنت» (رەج. د.ومىرباەۆ), سونداي-اق  قر مادەنيەت جانە سپورت مينيسترلىگى تاپسىرىسى بويىنشا «ساق» ستۋدياسى تۇسىرگەن «قازاق ەلى» انيماتسيالىق ءفيلمى (رەج. ب.داۋرەنبەكوۆ). سونىمەن قاتار, فەستيۆال شەڭبەرىندە سەرىك اپرىموۆتىڭ «اڭشى» جانە «باۋىر» فيلمدەرى كورسەتىلەدى. بۇل كارتينالاردى ءۇندى كورەرمەندەرىنە رەجيسسەردىڭ ءوزى تانىستىراتىن بولادى. ايتا كەتەتىن جايت, سەرىك اپرىموۆ فەستيۆالدىڭ حالىقارالىق قازىلار القاسىنىڭ قۇرامىنا كىرىپ, بەلگيالىق رەجيسسەر ميشەل حلەيفي (قازىلار القاسىنىڭ توراعاسى), ءۇندىستاننىڭ تەاتر جانە كينو اكتريساسى سيما بيسۆاس, يراندىق اكتريسا باران كوساري جانە فەستيۆالدىڭ باعدارلامالار ديرەكتورى پەدرو پيمەنتامەن بىرگە فەستيۆالدىڭ ۇزدىك ءفيلمىن انىقتايتىن بولادى. حالىقارالىق قازىلار القاسىمەن قاتار كينوسىنشىلاردان قۇرالعان - فيپرەسسي جانە نەتپاك قازىلار القاسى دا جۇمىس ىستەيدى. بيىل فەستيۆال بارىسىندا 62 مەملەكەتتەن كەلگەن 185 كارتينا كورسەتىلەدى. 1996 جىلدان بەرى وتكىزىلىپ جاتقان حالىقارالىق ءۇندى كينوفەستيۆالى ءۇندىستاندا وتكىزىلىپ جۇرگەن ماڭىزدى مادەني ءىس-شارالاردىڭ ءبىرى. بايقاۋدىڭ ۇيىمداستىرۋشىلارى - كەرالا شتاتىنىڭ مادەنيەت مينيسترلىگىنىڭ قولداۋىمەن «Chalachitra» كينواكادەمياسى. فەستيۆال حالىقارالىق كينوپروديۋسەرلەر اسسوتسياتسياسى فەدەراتسياسىندا 1999 جىلى تىركەلگەن بولاتىن.