قىزىلوردا وبلىسىندا الەۋمەتتىك نىساندار اشىلدى

تاۋەلسىزدىكتىڭ 25 جىلدىعىنا وراي قىزىلوردا وبلىسى, قارماقشى اۋدانىنىڭ جوسالى كەنتىندە وبلىس اكىمى قىرىمبەك كوشەرباەۆتىڭ قاتىسۋىمەن ايماقتىق-ولكەتانۋ مۇراجايى مەن وقۋشىلار ءۇيىنىڭ اشىلۋ سالتاناتى ءوتتى. وبلىس اكىمى  الدىمەن ايماقتىق-ولكەتانۋ مۇراجايىنىڭ جاڭا ەكسپوزيتسيالىق زالدارىمەن, سونىمەن قاتار زاماناۋي كىتاپحانامەن تانىستى. مۇراجايدىڭ ەكىنشى قاباتىنداعى ەكى ۇلكەن زال ءوڭىر تاريحىنا جانە ونىڭ تاۋەلسىزدىك جىلدارىنداعى دامۋىنا ارنالعان. مۇراجايدا قارماقشى اۋدانىنىڭ كونە زاماننان قازىرگى كۇنگە دەيىنگى نەگىزگى تاريحى باياندالعان. سودان سوڭ وبلىس اكىمى قايتا جوندەۋدەن وتكەن وقۋشىلار ءۇيىنىڭ سالتاناتتى اشىلۋىنا قاتىستى. «ءبىلىمدى شاكىرت - ەل بولاشاعىنىڭ مىقتى تىرەگى» دەسەك, ونەرگە تالاپتانعان ورەندەرگە ساپالى ءبىلىم بەرۋدە وقۋشىلار ءۇيىنىڭ ىقپالى زور. سەبەبى, حالقىمىزدىڭ بارلىق اسىل قاسيەتى بالا كەزدەن قالىپتاسادى. وتانشىل بالانىڭ ويى وزىق تۇرادى. ءبىز ۇرپاقتىڭ كەمەل كەلەشەگى ءۇشىن بارلىق مۇمكىندىكتى قاراستىرۋعا مىندەتتىمىز. ويتكەنى ولار – ەركىن ەلدىڭ ەرتەڭى, - دەدى وبلىس اكىمى.