دۇنيەجۇزىندەگى جۇزدەن استام ەل قوعامداعى الەۋمەتتىك كەسەل – سىبايلاس جەمقورلىققا قارسى تىزە قوسىپ كۇرەسۋگە شەشىم قابىلدادى. ولاردىڭ قاتارىندا قازاقستان دا بولدى. بۇۇ وكىلدىگىنىڭ تاعايىنداۋىمەن جىل سايىن الەم ەلدەرى كوررۋپتسياعا قارسى كۇرەس كۇنىن اتاپ وتەدى. قازاقستان رەسپۋبليكاسى مەملەكەتتىك قىزمەت جانە سىبايلاس جەمقورلىققا قاسى ءىس-قيمىل اگەنتتىگىنىڭ قوستاناي وبلىسى بويىنشا دەپارتامەنتى الەۋمەتتىك كەسەلگە قارسى بەلگىلەنگەن حالىقارالىق كۇنگە وراي كەشەندى شارالار ۇيىمداستىردى. مىسالى, جەلتوقسان ايىنىڭ باسىنان باستاپ وبلىستاعى «بالالار جانە جاستار ۇيىمدارى قاۋىمداستىعى» ۇيىمىمەن بىرلەسىپ, اۋداندار مەن قالالاردا سىبايلاس جەمقورلىققا قارسى كۇرەس تۋرالى دوڭگەلەك ۇستەل ماجىلىستەرىن وتكىزدى.
كەشەندى شارالار وبلىس ورتالىعىنداعى «ميراس» مادەنيەت ۇيىندەگى مەرەكەگە ارنالعان سالتاناتتى جيىنعا جالعاستى. وعان وبلىس اكىمى ارحيمەد مۇحامبەتوۆ قاتىستى. «ەلباسى نۇرسۇلتان نازارباەۆتىڭ قازاقستان حالقىنا ارنالعان جولداۋلارىندا دەموكراتيالىق قوعامدا سىبايلاس جەمقورلىققا قارسى كۇرەس كەلەشەك سيپاتى بولاتىنىن اتاپ كورسەتكەن بولاتىن. وسى الەۋمەتتىك جاعىمسىز قۇبىلىسقا قارسى كۇرەس ءبىزدىڭ ەلدە دە كەشەندى جالعاسىن تابادى دەگەن ءسوز. سىبايلاس جەمقورلىق ەلدىڭ ەكونوميكالىق, ينۆەستيتسيالىق دامۋ ۇدەرىسىن باياۋلاتاتىن, دەموكراتيالىق ەلدىڭ ساياسي جانە قوعامدىق ينستيتۋتتارىنا كەرى اسەر ەتەتىن الەۋمەتتىك كەسەل.
قازىر وسى الەۋمەتتىك جاعىمسىز قۇبىلىسپەن كۇرەستە نەگىزگى كۇش ونىڭ الدىن الۋعا, ونىڭ كورىنىستەرىن بارىنشا ازايتۋعا باعىتتالىپ وتىر» دەدى ارحيمەد بەگەنجان ۇلى. سالتاناتتى جيىندا اگەنتتىكتىڭ قوستاناي وبلىسى بويىنشا دەپارتامەنت باسشىسى, ادەپ جونىندەگى كەڭەس توراعاسى بەرىك بەكجانوۆ بايانداما جاساپ, دەپارتامەنتتىڭ اتقارىلعان يگىلىكتى جۇمىستارى جونىندە ايتىپ ءوتتى. سالتاناتتا قوعامداعى سىبايلاس جەمقورلىققا قارسى مادەنيەتتى, الەۋمەتتىك جاعىمسىز قۇبىلىسقا توزبەۋ ۇستانىمىن قالىپتاستىرۋعا ۇلەس قوسىپ جۇرگەن مەملەكەتتىك قىزمەتكەرلەرگە, ۇكىمەتتىك ەمەس ۇيىمدار وكىلدەرى مەن جۋرناليستەرگە وبلىس اكىمىنىڭ, دەپارتمەنت باسشىلىعىنىڭ ماقتاۋ قاعازدارى تابىس ەتىلدى.
ءنازيرا جارىمبەتوۆا, «ەگەمەن قازاقستان»
