بۇگىن ەلىمىزدىڭ بارلىق وڭىرلەرىندەگى نازارباەۆ زياتكەرلىك مەكتەپتەرىندە اشىق ەسىك كۇنى ۇيىمداستىرىلدى. بۇل ءىس-شارا « ۇلى دالا ەلى – تاۋەلسىزدىكتىڭ 25 نەگىزدەرى» 25 جۇلدىزدى كۇندەر اياسىندا وتۋدە.
اشىق ەسىك كۇنى جۇزەگە اسقان ايتۋلى شارانىڭ ءبىرى ەلىمىزدىڭ 16 ءوڭىرىنىڭ از قامتىلعان وتباسىلارىنان 100 وقۋشىعا ەكسپو-2017 كورمەسىنە قاتىسۋعا مۇمكىندىك بەرەتىن سەرتيفيكاتتار جانە استاناداعى نازارباەۆ زياتكەرلىك مەكتەپتەرى جانىنداعى 5 كۇندىك جازعى لاگەرگە جولداما تاپسىرىلدى. بۇل اكتسياعا قاجەتتى قاراجاتتى زياتكەرلىك مەكتەپتەرىنىڭ وقۋشىلارى تاۋەلسىزدىكتىڭ 25 جىلدىعىنا ارنالعان ءىس-شارالار شەڭبەرىندە ۇيىمداستىرىلعان قايرىمدىلىق جارمەڭكەلەرى مەن كورمەلەرىنىڭ نەگىزىندە وزدەرى جيناعان.
بۇل كۇنى «egemen.kz» تىلشىلەرى استاناداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىندە بولىپ قايتقان ەدىك, وندا وسىنداي سەرتيفيكات پەن جولداماعا 5 وقۋشى يە بولدى. مەكتەپتىڭ ديرەكتورى مەيرام جاكەنوۆتىڭ ايتۋىنشا, مۇنداي شارالار جاسوسپىرىمدەردى ەلجاندىلىققا, وتانسۇيگىشتىككە تاربيەلەۋمەن قاتار, ادامگەرشىلىك, قايىرىمدىلىق ىستەرگە باۋليدى.
«نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى باسقارماسى ءتورايىمىنىڭ ورىنباسارى سۆەتلانا يسپۋسينوۆانىڭ ايتۋىنشا بۇل مەرەكەنىڭ اياسىندا عانا وتكىزىلەتىن وتكىنشى ناۋقاندىق شارا ەمەس. مەكتەپ وقۋشىلارى مۇنداي قايىرىمدىلىق جۇمىستارعا ۇنەمى تالپىنىپ, ينتەلەكتۋالدى ۇلتقا ءتان ورەلى ىستەرگە ۇمتىلىستارىن كورسەتىپ جۇرەدى. «بۇل مەكتەپتەردە وقىپ جاتقان ءاربىر وقۋشىنىڭ جەتىستىگى, جالپى بولمىسى, ەگەمەندىكتىڭ ەركىن دانىنەن وسكىندەگەن ءور ۇلاندارى - تاۋەلسىز ەلىمىزدىڭ بولاشاعى. ولار قانداي شاراعا قاتىسسا دا ەلدەرىنە, وتاندارىنا دەگەن شىنايى سۇيىسپەنشىكلىكتەرىن جەتكىزۋگە تىرىسادى. وسىنداي ورەندەرى بار ەلدىڭ كەلەشەگى كەمەل بولارىنا سەنىمدىمىز. ءبارىمىز سول جولدا ەڭبەك ەتۋدەمىز», - دەيدى سۆەتلانا يسپۋسينوۆا.
ءدال وسى كۇنى نازارباەۆ زياتكەرلىك مەكتەپتەرىنە كەز كەلگەن وقۋشى ەركىن كىرىپ, ونىڭ عيماراتىن ارالاپ كورۋگە مۇمكىندىك الدى. ەلىمىزدەگى ەرەكشە مەكتەپتەردى ارالاي ءجۇرىپ, STEM (حيميا, بيولوگيا, فيزيكا, ينفورماتيكا) باعىتتارى بويىنشا زەرتحانالىق جانە زەرتتەۋ تاجىريبەلەرىن كورۋ مۇمكىندىگى بار. سونداي-اق, «اشىق ەسىك» كۇنىنە كەلۋشىلەر مەكتەپتىڭ عىلىمي-زەرتتەۋ جوبالارىن تاشالادى. «روبوت تەحنيكاسى», «اۆياتسيالىق مودەلدەۋ», «قىش-قۇمىرا ونەرى», «ديزاين», «دومبىرا», «حورەوگرافيا», «شاحمات» جانە ت.ب. ۇيىرمەلەرىنىڭ جۇمىستارىمەن تانىستى. سونىمەن قاتار, مەكتەپىشىلىك «تۋعان ەلگە تاعزىم», «شاڭىراق», «قازاقشا Wikipedia», «TEDx NIS», «100 كۇيدىڭ تاريحى», «100 كىتاپ», «قازاقستىڭ 100 ءانى» جوبالارى جونىندەگى اقپاراتتارمەن قانىقتى. زياتكەرلىك مەكتەپتەرىندە ءبىلىم الۋ مۇمكىندىكتەرى, كانيكۋليارلىق جانە ۆيرتۋالدىق مەكتەپتەرىنە تىركەلۋ بويىنشا وقۋشىلارعا جانە اتا-انالارعا ارنالعان كونسۋلتاتسيالىق بەكەتتىك جۇمىسى ۇسىنىلدى. وقۋشىلار ءۇشىن تاعى ءبىر قىزىقتى جوبا - جالپى ورتا جانە زياتكەرلىك مەكتەپتەردىڭ وقۋشىلارىنىڭ قاتىسۋىمەن «العا, قازاقستان!» بي فلەشموبى ۇيىمداستىرىلدى.
دينارا بىتىكوۆا,
«ەگەمەن قازاقستان»
