تاۋەلسىزدىكتىڭ 25 جىلدىق تابىسى – تولايىم. اسىرەسە, ەلباسى جۇكتەگەن يمپورتتىق ونىمدەردى الماستىرۋعا جول تاپقان قازاقستاندىق تاۋاروندىرۋشىلەر تولقىنى قۋانتادى. كەلەر جىلى قۇرىلعانىنا 10 جىل تولاتىن سەمەيلىك "تەررا ۆيتا" جاۋاپكەرشىلىگى شەكتەۋلى سەرىكتەستىگىن دە وسى قاتارعا قوسۋعا بولادى. ونىڭ قىزمەتى ەلىمىزدەگى مەديتسينالىق مەكەمەلەردى زاماناۋي مەديتسينالىق قۇرال-جابدىقتارمەن جانە جيھازبەن قامتاماسىز ەتۋگە باعىتتالعان. 2007 جىلى تىركەلىپ, ءۇش جىلدان كەيىن مەديتسينالىق تەحنيكا وندىرىسىنە ليتسەنزيا العان جاڭا نىسان "قازاقستاننىڭ ۇزدىك تاۋارى" بايقاۋىنا ءۇش مارتە قاتىسىپ, 2010 جانە 2011 جىلدارى قاتارىنان "جاڭا ءونىم تۇرلەرىن شىعارعانى ءۇشىن" ديپلومدارىمەن ماراپاتتالسا, 2012 جىلى وڭىرلىك كورمە بايقاۋىندا "وندىرىستىك ماقساتتاعى ۇزدىك تاۋارلار" اتالىمى بويىنشا ۇشتىككە ەنگەن-ءدى.
– ءبىز حالىقارالىق ستاندارتتار مەن الەمدىك جەتەكشى كومپانيالاردىڭ جۇمىستارىن زەردەلەي وتىرىپ, ىشكى نارىق پەن ودان تىس جەرلەردە وتاندىق وندىرۋشىلەرىمىزدىڭ وڭ كەلبەتىن قالىپتاستىرۋعا ءوز ۇلەسىمىزدى قوسىپ كەلەمىز, – دەيدى كومپانيا ديرەكتورى ناسيحات يساباەۆا.
ارينە, جۇيرىك ۋاقىتپەن بىرگە مەديتسينالىق تەحنيكا مەن جيھازدىڭ ساپاسىنا, قىزمەتىنە قويىلاتىن تالاپتار كۇشەيۋدە. سوندىقتان زامان ۇدەسىنەن شىعۋدى كوزدەگەن "تەرراۆيتالىقتار" بۇل سالاداعى جاڭا دا وزىق دۇنيەلەردى قاداعالاپ قانا قويماي, قىسقا مەرزىم ارالىعىندا جوعارى تەحنولوگيالاردى وندىرىسكە ەنگىزۋگە كۇش سالۋدا.
– بۇگىندە زاۋىتتا ءوندىرىستى ۇيىمداستىرۋعا قاجەتتى ينفراقۇرىلىمنىڭ بارلىعى بار, ونىڭ ىشىندە وندىرىستىك جەلىلەردىڭ تەحنيكالىق جابدىقتالۋى ويداعىداي جۇزەگە اسىرىلدى جانە دايارلىقتان وتكەن بىلىكتى ماماندار قۇرامى جەتكىلىكتى. تاۋاردىڭ شىققان جەرى تۋرالى سەرتيفيكات الۋ مەن مەملەكەتتىك ساتىپ الۋعا قاتىسۋعا قاجەتتى قولداۋلار كومپانيانىڭ قارقىندى دامۋىنا جاعداي جاسايدى. ءبىز مەملەكەتتىك تاپسىرىس شەڭبەرىندە ءونىمدى جەتكىزىپ بەرەمىز, سونداي-اق وزگە وڭىرلەردەن تۇسكەن جەكەلەگەن تاپسىرىستاردى دا بەلگىلەنگەن كەستەگە ساي ساپالى ورىندايمىز. بۇل تۇتىنۋشىلارىمىز بەن تاپسىرىس بەرۋشىلەردىڭ سەنىمىن ارتتىرا تۇسەدى, – دەيدى ناسيحات قابدىعاليقىزى.
كومپانيا شىعاراتىن ونىمدەر اراسىندا مەديتسينالىق قىزمەت كورسەتۋگە ارنالعان كەرەۋەتتەر, گينەكولوگيالىق جانە بوسانۋعا ارنالعان كرەسلولار, بالالار كەرەۋەتى مەن ماسساج ۇستەلدەرى, مانيپۋلياتسيالىق, زەرتحانالىق, ەمدىك جانە حيرۋرگيالىق ۇستەلدەر, سالماق جانە بوي ولشەۋ قۇرالدارى, مەديتسينالىق قالقا, توسەك, شكاف, قوزعالمالى باكتەريتسيدتى ساۋلەلەندىرگىش سىندى مەديتسينانىڭ سان-سالاسىنا ارنالعان ونىمدەر بار. سەمەيلىك كاسىپورىن قازاقستان ستاندارتتاۋ ينستيتۋتىنىڭ نۇسقاۋلارى مەن تالاپتارىن ءجىتى ورىنداپ, فارماتسەۆتيكالىق نارىقتا باتىل ادىمداپ كەلەدى. الداعى ۋاقىتتا تمد ەلدەرىندە وندىرىلمەيتىن ونىمدەرىمەن وزگە نارىقتى يگەرمەك. اتاپ ايتقاندا, رەسەي قالالارىنا شىعۋدى جوسپارلاپ وتىرعان كاسىپورىننىڭ ەكسپورتتىق الەۋەتىن مەديتسينالىق قۇرالداردى زالالسىزداندىرۋعا ارنالعان كەپتىرۋ شكافى, ايەلدەر كابينەتىنە ارنالعان اۆتوماتتى جابدىقتار مەن اۋىر ناۋقاستاردى كۇتۋگە باعىتتالعان روبوتتاندىرىلعان جابدىقتار ارتتىرا تۇسەدى دەگەن سەنىم بار. سونىمەن بىرگە مەديتسينالىق جيھازداردىڭ وتىمدىلىگىن دە سىناپ كورۋدى كوزدەپ وتىر.
كاسىپورىن جەتەكشىسىنىڭ ايتۋىنشا, 2014 جىلى "دامۋ" قورىنىڭ باعدارلاماسىمەن ەكىنشى دەڭگەيلى بانكتەر ارقىلى 50 ميلليون تەڭگەدەن استام نەسيەگە قوسىمشا جابدىقتار ساتىپ الىندى. جاڭا ونىمدەر ءوندىرۋدىڭ دە ءوز قيىندىقتارى جەتەرلىك. ماسەلەن, ونى تىركەۋدىڭ ءوزى ۋاقىت پەن قارجىعا تىكەلەي تاۋەلدى. قازىرگى كەزدە كاسىپورىن وپەراتسيا ۇستەلى مەن ەلەكترلى مەحانيكامەن رەتتەلەتىن كەرەۋەتتى جاساپ شىعىپ, تىركەۋدەن وتكىزۋدە. بۇعان دەيىن بۇل م ۇلىكتەر سىرتقى نارىقتان تاسىمالدانىپ كەلگەن ەدى. كومپانيا قازاقستاندىق ۇلەستى ارتتىرۋعا مۇددەلى. بۇل تاراپتا 67-70 پايىزعا دەيىن وتاندىق ونىمدەردى تۇتىنىپ كەلەدى. مىسالى, مەتالل ونىمدەرىن "ارسەلورميتتال تەمىرتاۋ" اق-دان الادى. سونىمەن بىرگە "تەررا ۆيتا" باسەكەگە توتەپ بەرۋى ءۇشىن ءار ونىمگە وزىندىك رەڭك, ەرەكشەلىك بەرۋدى جولعا قويعان. ايتالىق, جيھازداردىڭ قاڭقاسى ءداستۇرلى جينالمالى قۇرىلىممەن ەمەس, تۇتاستاي جاسالدى. مۇنداي زاتتار باسقا ونىمدەرگە قاراعاندا بەرىك بولادى, دەيدى ماماندار.
دۋمان اناش,
"ەگەمەن قازاقستان"
