ءوڭىردىڭ وندىرىستىك الەۋەتى زور

پرەمەر-ءمينيستردىڭ ءبىرىنشى ورىنباسارى اسقار مامين قىزىلجار وڭىرىنە جۇمىس ساپارى كەزىندە بىرقاتار جەتەكشى كاسىپورىنداردى ارالاپ, اتقارىلىپ جاتقان جۇمىستارمەن تانىستى. وبلىس اكىمى ەرىك سۇلتانوۆ اۋىر ماشينا جاساۋ سالاسىن دامىتۋ بويىنشا جۇزەگە اسىرىلىپ جاتقان اۋقىمدى جوبالار مەن باعدارلامالار جايلى حاباردار ەتتى.  ۇكىمەت باسشىسىنىڭ ءبىرىنشى ورىنباسارى باس­تاعان دەلەگاتسيا الدىمەن پەتروپاۆل حالىقارالىق اۋەجايىنا ات باسىن تىرەدى. 2400 شارشى مەتر اۋماققا ورنالاسقان اۋەجاي كۇردەلى جوندەۋ­دەن وتكەن. رەسپۋبليكالىق قازىنادان بولىنگەن 1,2 ميل­ليارد تەڭگەگە ۇشۋ-قونۋ جولاقتارى, تەرمينال, پەر­رون قالپىنا كەلتىرىلىپ, كۇنىنە 200 جولاۋشىعا دەيىن قابىلداي الاتىن مۇمكىندىككە يە بولعان. قازىر ۇشاقتار استانا, الماتى باعىتتارى بويىن­شا قاتىنايدى. كەلەسى جىلدان باستاپ الىس-جاقىن شەتەلدەر ءۇشىن رەيستەر اشىلادى. پرەمەر-ءمينيستردىڭ ءبىرىنشى ورىنباسارىنىڭ تاعى ءبىر ايالداعان جەرى پەتروپاۆل اۋىر ماشينا جاساۋ زاۋىتى بولدى. ءبىر كەزدەرى ەكونوميكالىق قيىن­دىقتار سالدارىنان تۇرالاپ قالعان ءوندىرىس ورنى تاۋەلسىزدىك جىلدارى دامۋدىڭ جاڭا ساتىسىنا كوتەرىلىپ, ءارتاراپتاندىرىلدى. جىل وتكەن سايىن قۋات­تىلىعى ارتىپ, مۇناي وڭدەيتىن سالالار ءۇشىن قون­دىر­عىلار, قوسالقى بولشەكتەر شىعارادى. اق-تىڭ باس ديرەكتورى قۋانىش ءبيشىموۆ, سونداي-اق, ەنەر­گە­تيكالىق, جۇك كوتەرگىش تەحنيكالار, تەمىر جول­دى جوندەۋ جانە قىزمەت كورسەتۋ سالاسىنا جاب­دىق­تار جاسالاتىنىن مالىمدەدى. 2007 جىلدان باس­تاپ ين­دۋستريالىق-يننوۆاتسيالىق دامۋ باعدار­لا­­ما­سىنا تۇراقتى تۇردە قاتىسىپ, كوپ بەيىندى ءون­دىرىس­تىك جانە سىناق بازاسىمەن, زاماناۋي ءوندىرىس قۇرال-جابدىقتارمەن, جوعارى بىلىكتى ماماندارمەن قام­تا­ماسىز ەتىلدى. تەحنيكالىق پارك ميلليارد تەڭگەگە جا­ڭار­تىلدى. قازىر مۇندا ءبىر مىڭعا جۋىق ادام ەڭبەك ەتەدى. ا.مامين ماشينا جاساۋ ءوندىرىسى ەل ەكونو­مي­كاسىندا شەشۋشى بۋىن بولىپ تابىلاتىنىن, جۋىردا وتكەن جالپىۇلتتىق تەلەكوپىردە ەلباسى ن.نازارباەۆ تىڭ جوبالاردىڭ تۇساۋىن كەسكەنىن, وتاندىق ونىمدەردى قولداۋ باعىتى بىرىزدىلەندىرىلىپ, قولداۋ كۇشەيگەنىن, الداعى مىندەت باسەكەگە قابىلەتتى ساپالى تاۋارلار شىعارۋ, نارىق كوزىن كەڭەيتۋ بولىپ تابىلاتىنىن اتاپ كورسەتتى. ايماق باسشىسى ە.سۇلتانوۆ ءوڭىردىڭ الەۋمەتتىك-ەكونوميكالىق وڭ ۇدەرىسىن يندۋستريالىق-يننوۆاتسيالىق دامۋ جايى ايقىندايتىنىن, ماشينا جاساۋ سالاسى ۇلكەن سەرپىن العانىن, ەگەمەندىك العان العاشقى جىلى ءوندىرىس كولەمى 7 ميلليون تەڭگەنى قۇراسا, بۇگىندە 167 ميلليارد تەڭگەگە جەتكەنىن العا تارتتى. ەكى مىڭنان اسا ءونىم تۇرلەرى پايدا بولعان. وڭدەۋ ونەركاسىبىمەن شۇعىلداناتىن 463 كاسىپورىن 6400 ادامدى جۇمىس­پەن قامتىپ وتىر. ونەركاسىپ ونىمدىلىگىنىڭ بەستەن ءبىرى وسى سالاعا تيەسىلى. بيىلعى تاپسىرىس 35, 8 ميل­ليارد تەڭگە بولىپ, وتكەن جىلعا قاراعاندا 51 پا­يىز­عا ارتقان. يندۋستريالاندىرۋ باعدارلاماسى شەڭ­بەرىندە 41 ميلليارد تەڭگەنىڭ 54 جوباسى ىسكە قوسى­لىپ, 2 مىڭ جاڭا جۇمىس ورنى اشىلعان, 36 ءون­دىرىس ورنى بوي كوتەرگەن. ۇكىمەت باسشىسىنىڭ ءبىرىنشى ورىنباسارى «مۇنايماش» اق-تا وندىرىسكە ەنگىزىلگەن وزىق تەحنو­لو­گيالارمەن تانىسىپ, كاسىپورىننىڭ كەلەشەگى زور ەكەنىنە كوز جەتكىزدى. مۇناي-گاز سالاسىنا قۇرال-جابدىقتار شىعاراتىن زاۋىتتىڭ ونىمدەرى حا­لىقارالىق تالاپتارعا تولىق ساي. بيىل 1,8 ميل­ليارد تەڭگەنىڭ تاپسىرىستارى مەرزىمىنەن بۇرىن ورىن­دا­لىپ, قوسىمشا تاپسىرىستار الىنعان. كاسىپورىن باس­شىسى سپارتاك پۋشكارەۆ مەملەكەت تاراپىنان كور­سەتىلىپ جاتقان قولداۋلارعا ريزاشىلىعىن ءبىلدىردى. ا.مامين اۋىر ماشينا جاساۋ سالاسى وكىلدەرىنىڭ نازارىن سۇرانىسقا, زامان اعىمىنا لايىقتالعان جانە دە ەڭ باستىسى, باسەكەگە شىدامدى, باعاسى قول­جەتىمدى قازاقستاندىق مازمۇن ۇلەسىن ارتتىرۋ قاجەت­تىگىنە اۋداردى. پرەزيدەنت بەلگىلەپ بەرگەن «نۇرلى جول», باسقا دا قۋاتتى باعدارلامالار داعدارىستى ەڭسەرۋدىڭ ىلكىمدى جوبالارى ەكەنىن جاقسى بىلەسىزدەر. ونىڭ يگىلىكتەرىن تاۋ-كەن, وڭدەۋ كاسىپورىندارى دا جاقسى سەزىنىپ وتىر. ەكسپورتتىق جاڭا ونىمدەر مەن تاۋارلاردى مولايتۋ وتە ماڭىزدى. ماسەلەلەردى كەشەندى تۇردە شەشكەندە عانا مىندەتتەر مۇلتىكسىز ورىندالادى. ءوڭىردىڭ وندىرىستىك الەۋەتى زور, دەدى ول. پرەمەر-ءمينيستردىڭ ءبىرىنشى ورىنباسارى باستاعان دەلەگاتسيا بەسكول كەنتىندە جۇمىس ىستەيتىن «رادۋگا» جشس-ىندە بولىپ, پايدالانۋعا بەرىلگەن جاڭا جوبانىڭ ناتيجەسىن وڭ باعالادى. ءومىر ەسقالي, «ەگەمەن قازاقستان» سولتۇستىك قازاقستان وبلىسى