سۇلەيلەر سالعان سۇرلەۋمەن

سوڭعى ەكى اپتانىڭ ىشىندە سىر بويىنىڭ رۋحانيات سالاسى ءبىر ەمەس, بىرنەشە ماڭىزدى شارامەن ايشىقتالدى. تاۋەلسىزدىكتىڭ 25 جىلدىعىنا ارناپ وبلىس اكىمدىگى حالىقارالىق ايتىس وتكىزدى. ءارىسى قىتاي, موڭعوليا, قىرعىزستاننان, بەرىسى ءوزىمىزدىڭ ەلدەن اقىن­دار قاتىسىپ, الاماننىڭ كوركىن قىزدىردى. باس جۇلدەگە تىگىلگەن جەڭىل كولىكتى قىزىلوردالىق مۇحتار نيازوۆ, ەكىنشى كولىكتى التاي اسىپ كەلگەن ارقالى اقىن ۇلاربەك مينەت­حان ۇلى يەلەندى. جىر ەلىنە ىلە-شالا ارقا مەن باتىستىڭ, جەتىسۋ مەن سىر­دىڭ ساڭلاقتارى ءداستۇرلى ورىن­داۋشىلاردىڭ رەسپۋبليكالىق ونەر فەستيۆالىندە كۇمىس كومەيدەن جىر ءتو­گىلتتى. قازاقستاننىڭ ەڭبەك ءسىڭىر­گەن قايراتكەرى الماس الماتوۆ, جىرشى ساۋلە جان­پەيىسوۆا, ەلىمىزدەگى بىردەن-ءبىر ماناسشى بايانعالي ءالىمجانوۆ, جەتىسۋ, ارقا مەكتەبىنىڭ وكىلدەرى رامازان ستامعازيەۆ پەن ەرلان رىسقالي, باتىس جىر مەكتەبىنىڭ ورىنداۋشىسى ايگۇل قوسانوۆا, ۇلجان بايبوسىنوۆا جانە تاعى باسقالار تەكتى ءسوزدىڭ تورەسىن تەرىپ ايتىپ, قۇلاق قۇرىشىن قاندىردى. ەلمۇرا جاڭابەرگەنوۆا, ارنۇر كوشەنەي, سەرىك جاقسىعۇلوۆ, كۇنسۇلۋ تۇرىكپەنوۆا, ومىرقۇل اينيازوۆ تىڭدارماننىڭ ىستىق ىقىلاسىنا بولەندى. اقىنىن ارداقتاعان ەل ازبايدى. اقىن-دراماتۋرگ اسقار كىرەباەۆتىڭ 70 جىلدىعىنا وراي مارقۇمنىڭ شىعارماشىلىعى مەن ەڭبەگىن ناسيحاتتاۋ شارالارى وتكىزىلۋدە. سونىڭ ءبىرى – وبلىستىق جاس اقىندار ءمۇشايراسى. باق سىناعاندار ءتۇرلى تاقىرىپتا جازعان دۇنيەلەرىن وقىپ, شىن جۇيرىكتەر دارالانىپ شىقتى. سونداي-اق, جۋىردا قازاقستان جازۋ­شىلار ودا­عىنىڭ مۇشەسى, اقىن شاھيزادا ابدىكا­رىموۆ­تىڭ «اقىل مەن سەزىم بۇرقاعى» اتتى پوەزيا كەشى ءوتتى. وتكەن عاسىردىڭ سەكسەنىنشى جىلدارى ولەڭ پاتشا­لىعىنا تالانتتى تولقىن كەلدى. سولاردىڭ قاتارىندا العاشقى جىر شۋماق­تارى 1975 جىلى «كوكتەم تىنىسى» كىتابىنا ەنگەن, بۇگىندە ەسىمى ەلگە ءمالىم شاھيزادا ابدىكارىموۆ تە بار. ول اقىن اتانىپ قانا قويعان جوق. قالالىق تەلەارنانى اياققا تۇرعىزۋدا تالماي تەر توكتى. بۇگىندە ول قۇرعان «قوعام تۆ» شىعارماشىلىق ۇجىمى مەن ماتەريالدىق-تەحنيكالىق بازاسى قالىپتاسقان اقپارات قۇرالىنا اينالدى. شاھيزادا وتەتىلەۋ ۇلى وبلىستىق ءماسليحاتتىڭ دەپۋتاتى رەتىندە دە ءوڭىردىڭ وزەكتى ماسەلەلەرىن شەشۋگە ۇلەس قوستى. اقىننىڭ شىعارماشىلىق كەشى بارىسىندا قازاقستان جازۋشىلار وداعى باسقارماسىنىڭ حاتشىسى, اقىن ۇلىقبەك ەسداۋلەت جىلى لەبىزىن جەتكىزدى. سونداي-اق, اقىن ءجۇرسىن ەرمان, ادەبيەتشى-عالىم, ۇعا كور­رەس­پوندەنت-مۇشەسى باۋىرجان وماروۆ, ۇلتتىق تەلەحابارلار تاراتۋ قاۋىم­داستىعىنىڭ اتقارۋشى ديرەكتورى شولپان جاقسىباەۆا, «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى يبادۋللا قۇتتىقوجاەۆ تىلەكتەستىك ءبىلدىردى. وسى كەشتە وبلىس اكىمى قىرىمبەك كوشەرباەۆ  كەلەسى جىلدان باستاپ سىر ەلىندە «پارا­ساتتى پوەزيا» اتتى اقىندار فەستي­ۆالىن وتكىزۋ جوسپارلانىپ وتىر­عانىن جەتكىزدى. تۇركىستاندىق ايتىسكەر بەك­ارىس شويبەكوۆتىڭ بىردە «سىر­دان التىن شىقپاۋى مۇمكىن, بىراق اقىن شىقپاۋى مۇمكىن ەمەس» دەگەنى بار. نەبىر ءدۇلدۇلدى تۇلەتكەن توپىراقتىڭ كيەسى دە وسىندا بولسا كەرەك. ەرجان بايتىلەس, «ەگەمەن قازاقستان»  قىزىلوردا وبلىسى