استانادا دەمالىس كۇندەرى اۋا رايى كۇرت سۋىتادى

اۋا رايىنىڭ بۇزىلۋىنا بايلانىستى قالانىڭ كوممۋنالدىق قىزمەتتەرى كۇشەيتىلگەن رەجىمدە جۇمىس ىستەۋدە. «استانا تازالىق» جشس مالىمەتتەرىنە سايكەس, بۇگىن قار تازالاۋ جۇمىستارىنا 350 ارنايى تەحنيكا تارتىلدى. قالا كوشەلەرىنە 357 جول جۇمىسكەرى شىقتى, دەپ حابارلادى استانا قالاسى اكىمدىگىنىڭ ءباسپاسوز قىزمەتى. سينوپتيكتەردىڭ بولجامىنا سايكەس, جەلدىڭ ەكپىنى 15-20 م/س قۇرايدى, اۋا تەمپەراتۋراسى تومەندەيدى دەپ كۇتىلۋدە. «اتلانتيكانىڭ ۇستىندە تۇزىلگەن تسيكلوندار ۇلكەن جىلدامدىقپەن قۇرلىققا جاقىنداپ, سىبىرگە باعىت الادى. ال تسيكلونمەن بايلانىستى اتموسفەرالىق فرونتتار قازاقستانداعى اۋا رايىنا اسەر ەتۋدە. وسىعان بايلانىستى دەمالىس كۇندەرى قار جاۋىپ, بۇرقاسىنداتادى, باتىستان قاتتى جەل سوعادى», - دەپ حابارلايدى قازگيدرومەت. ەرتەڭ كوشپەلى بۇلت شىعادى, وقتىن-وقتىن قار جاۋادى, بوران سوعادى. وڭتۇستىك-باتىستان 9-14 م/س, كەيدە 15-20 م/س جىلدامدىقپەن جەل سوعادى. تەرمومەتر باعانى تۇندە -19…-21°س, كەي جەرلەردە -28°س, كۇندىز -8…-10°س بولادى. 11 جەلتوقساندا كوشپەلى بۇلت شىعادى, وقتىن-وقتىن قار جاۋادى, بوران سوعادى. وڭتۇستىك-باتىستان 9-14 م/س جىلدامدىقپەن سوققان جەلدىڭ ەكپىنى كەيدە  15-20 م/س جەتەدى. اۋا تەمپەراتۋراسى تۇندە -13…-15°س, كۇندىز -3…-5°س. بورانعا بايلانىستى رەسپۋبليكالىق ماڭىزداعى تاس جولدار جابىق.