اقتوبە قالاسىنىڭ اكىمى ءىلياس يسپانوۆ «ەگەمەن قازاقستان» تىلشىسىنە سۋ تاسقىنىن تۋىنداتقان جايتتەر تۋرالى ايتىپ بەردى.
«بىرىنشىدەن, ءالى ەرىمەگەن مۇز سۋدىڭ اعۋىنا مۇمكىندىك بەرمەدى. ەكىنشىدەن, كىشى وزەندەردەگى گيدرولوگيالىق بەكەتتەر سانىنىڭ جەتىسپەۋى دە تاسقىندى تۋدىرۋعا اسەر ەتكەن. ۇشىنشىدەن, سوڭعى جيىرما جىل ىشىندە كىشى جانە شاعىن وزەندەردىڭ ارنالارىن تازارتۋ مەن كەڭەيتۋ جۇمىستارى جۇرگىزىلمەگەن. ال باۋ-باقشا ۇجىمدارىنداعى سۋ قورعاۋ ايماعىنىڭ قۇرىلىسى زاڭسىز جاسالعان», – دەپ اتاپ ءوتتى قالا اكىمى.
كەلەسى كەزەكتە ۇكىمەت باسشىسىنىڭ اتىنا جولدانعان تاسقىننىڭ ورىن الۋىنىڭ وزگە دە سەبەپتەرىنە كەلسەك, مۇندا دا ءى.يسپانوۆ اتاعان بىرقاتار سەبەپ-سالدارلار كورسەتىلگەن. اقتوبە قالاسى مەن ونىڭ ماڭايىندا تولقىندارى تۋلاعان ءىرى وزەندەر مەن ايدىن شالقار كولدەر بولماعانىمەن, سۋ قويمالارى بارشىلىق. ياعني ونىڭ ورنالاسقان جەرى سۋدان قورعانۋ اۋماعىنا كىرەدى.
سوندىقتان سۋ قورى اۋماعى رەتىندە ونىڭ تۇسى مەن ماڭايى مۇقيات بەكىتىلمەسە, توسىن, كۇتپەگەن, وقىس جاعداي ورىن الۋى ابدەن مۇمكىن. ءتىپتى سولاي بولدى دا. مۇنى تاسقىننىڭ باستى ءبىر سەبەبى دەسەك شە؟ قازىرگى كەزدە سۋ ارنالارى مەن اڭعارلارىن تازارتۋ جۇمىستارى وتە وزەكتى. ءارى مۇنىڭ ءوزى تاسقىن سۋدان الدىن-الا ساقتانۋ جولدارىنىڭ ءبىرى بولىپ تابىلادى. الايدا, بۇل ىستەر بۇعان دەيىنگى «جابايى تاسىلمەن» اتقارىلماسا ەشقانداي ناتيجە بەرە الماسى حاق. بۇل تۇيىقتان شىعاتىن ءبىر-اق جول – ونى زاماناۋي جابدىقتارمەن جابدىقتاۋ. اقتوبەلىك اتقارۋشى ورگاندار ۇكىمەت باسشىسىنا جولداعان ۇسىنىستارىندا وسى ءجايتتى قوسا كورسەتكەن.
تەمىر قۇسايىن,
«ەگەمەن قازاقستان».
اقتوبە
