اۋلا جارىسىنان وليمپيادا جارىسىنا دەيىن ءوتىپ جاتاتىن باسەكەلەردىڭ نەبىر قۇدىرەتتىلەرىن كورىپ, كۋا بولعان باسىمىز بار. ودان بەرى تۇسەر بولساق, الەم چەمپيوناتى, ازيا, ەۋروپا چەمپيوناتتارى, الەم كۋبوگى... ول جارىستار الەمنىڭ نەبىر جالى كۇدىرەيگەن مەگاپوليس قالالارىندا ءوتىپ ءجۇر – لوندون, پاريج, نيۋ-يورك, ماسكەۋ, استانا... ال, قازاق كۇرەسىنەن كەزەكتى الەم كۋبوگىنىڭ باسەكەسى اۋىلدا وتەدى. بۇل عاجاپ وقيعانى ومىرگە اكەلىپ وتىرعاندار – دۇنيەجۇزىلىك قازاق كۇرەسى فەدەراتسياسى! ايتسا سەنبەيسىز, بۇل جارىس 26-28 مامىر ارالىعىندا شىعىس قازاقستان وبلىسى, تارباعاتاي اۋدانىنىڭ اقسۋات كەنتىندە وتەدى! جارىسقا قازاقستاننان وزگە 25 مەملەكەتتىڭ سپورتشىلارى شاقىرىلىپ, ولار كەلىسىمىن بەرىپ, قاتىسقالى وتىر.
«بۇل قازاقستان تاۋەلسىزدىگىنىڭ 25 جىلدىعى اياسىندا وتكەلى وتىرعان جارىس, سوندىقتان دا جارىسقا 25 مەملەكەتتىڭ بالۋاندارىن شاقىردىق!», دەيدى فەدەراتسيانىڭ جاۋاپتى قىزمەتكەرلەرى. تاماشا وي, تاماشا جوبا, تاماشا تارتۋ!
جاقىندا قولىما وسى جارىسقا ارنايى شىعارىلعان ءتۇرلى-ءتۇستى باعدارلاما-كىتاپشا ءتۇستى. شىعىس قازاقستان وبلىسىنىڭ اكىمى د. احمەتوۆ, مادەنيەت جانە سپورت ءمينيسترى ا.مۇحامەدي ۇلى, دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى ي.ابىشەۆ مىرزالار وسى جارىسقا ساتتىلىك تىلەپ, ءسوز ارناعان ەكەن. الەم كۋبوگىنىڭ اۋىلدا وتەتىنىنىڭ حالىقتىق ماڭىزى وسى جەردە باسا ايتىلعانىنا كوز جەتتى. «كەزىندە ەلىنە, ۇلتىنا قىزمەت ەتكەن ىرعىزباي اۋليە جۇلدەسى ءۇشىن وتكەلى وتىرعان بۇل الەم كۋبوگى جولىنداعى جارىس ەلىمىزدە ەلباسى العا قويىپ وتىرعان بۇقارالىق سپورتتى كەڭىنەن وركەندەتۋ جولىنداعى جۇمىستاردى بارىنشا جانداندىرادى» – دەپ اتاپ وتەدى د.احمەتوۆ.
«جىل سايىن قازاق كۇرەسىنەن ىرعىزباي دوسحانا ۇلى جۇلدەسى ءۇشىن وتەتىن حالىقارالىق جارىس ەلىمىزدە ۇلتتىق سپورتتى وركەندەتۋگە ولشەۋسىز ۇلەس قوسىپ كەلەدى!» – دەيدى ا.مۇحامەدي ۇلى. «مۇنداي القالى جارىس وتكىزگەلى وتىرعان شىعىس قازاقستان وبلىسى تەك ەڭبەككەرلەر, فيلوسوفتار, اقىندار ايماعى عانا ەمەس, ەلىمىزدىڭ سپورتتىق داڭقىن اسىرىپ, الەم, وليمپيادا چەمپيوندارىن وسىرگەن ولكە!» – دەپ اتاپ وتەدى ي. ابىشەۆ.
وسى جارىستى اۋىلدا وتكىزۋ جوباسىنىڭ اۆتورى, دۇنيەجۇزىلىك قازاق كۇرەسى فەدەراتسياسىنىڭ ۆيتسە-پرەزيدەنتى بەدەلحان كامالحان ۇلى بىلاي دەيدى: «اتى مەن ىستەگەن ەلدىك ءىسى بۇكىل قازاقستانعا بەلگىلى ىرعىزباي دوسحانا ۇلى جۇلدەسى ءۇشىن وتەتىن بۇل الەم كۋبوگىنىڭ ماڭىزى – شەتتەن كەلەتىن قوناقتارعا ەلدى, جەردى كورسەتۋ, جەر ءجانناتى تارباعاتايدى ارالاتۋ. بۇل ءبىزدىڭ تۋريزمدەگى مۇمكىندىگىمىزدى دە پاش ەتۋ!».
ال كەزدەسىپ, سۇحباتتاسقاندا دۇنيەجۇزىلىك كۇرەس فەدەراتسياسىنىڭ اتقارۋشى ديرەكتورى تالعات مازىباەۆ ءىنىمىز ماڭىزدى ەكى وي ايتتى. ءبىرىنشى, قازاقستان تاۋەلسىزدىگىنىڭ 25 جىلدىعىن ءبىز وسى جىل كولەمىندە دە تۋ ەتىپ ۇستاساق نۇر ۇستىنە نۇر! ەكىنشى, الەم كۋبوگى سەكىلدى جارىستى اۋىلعا تارتىپ جاتساق, ونىڭ دا ماڭىزدى سەبەبى بار – ءبىز سپورتتاعى ەل نامىسىن قورعايتىن ۇل مەن قىزدى اۋىلدان ىزدەپ, اۋىلدان تاربيەلەسەك, ودان كەم بولمايمىز. قاجىمۇقان بابامىز دا, عۇسمان قوسانوۆ, ءامين تۇياقوۆ, ءابدىسالان نۇرماقانوۆ, ابىلسەيىت ايحانوۆ اتالارىمىز دا, جاقسىلىق ۇشكەمپىروۆ اعامىز دا اۋىلدان شىققان!».
الەم كۋبوگى جارىسىنىڭ اۋىلدا ءوتۋى عاجاپ وقيعا. ءارى بۇل جارىس بۇكىلالەمدىك كۇرەس فەدەراتسياسىنىڭ كۇنتىزبەسىنە ەنگەن جارىس. ءارى, جارىسقا قاتىساتىن بالۋاندار اراسىندا كۇرەستىڭ ءار تۇرىنەن الەم, وليمپيادا چەمپيوندارى كەلەدى دەپ كۇتىلۋدە. ولاي بولسا, اۋىلدا وتەتىن الەم كۋبوگى جارىسىنىڭ جولى اشىق بولعاي!
نەسىپ جۇنىسباەۆ,
جۋرناليست,
قازاقستاننىڭ ەڭبەك سىڭىرگەن قايراتكەرى
