ويتكەنى, ەلباسىمىز ايتقانداي, «ۇلت جادىنىڭ تۇعىرناماسى» وتكەننىڭ ونەگەسى مەن بولاشاقتىڭ ۇيلەسىمدى ساباقتاستىعىن كوزدەيدى. وسى تۇرعىدان العاندا, قازاقستان رەسپۋبليكاسى ۇكىمەتىنىڭ 13 مامىرداعى قاۋلىسى اقمولالىقتارعا دا قۋانىش الا كەلدى.
ەندىگى ۋاقىتتا اقمولا وبلىستىق فيلارمونياسى ۇكىلى ىبىراي ەسىمىمەن اتالاتىن بولدى. بۇل رۋحانيات تاعىلىمىنداعى ايرىقشا وقيعا ەكەندىگى ءسوزسىز. كلاسسيكالىق حالىق مۋزىكاسىنىڭ بەلگىلى وكىلى, ءانشى, كومپوزيتور, سۋىرىپسالما اقىننىڭ وشپەس مۇراسى ۇلتتىق رۋحتىڭ جالىنىن جارقىراتا بەرەتىنى ايقىن. بيىلعى جىل باسىندا 60 جىلدىعىن اتاپ وتكەن ىرگەلى ونەر ورداسى ۇكىلى ىبىراي ەسىمىن اسپانداتا جالاۋلاتاتىنى ءسوزسىز.
بالۋان شولاق (نۇرماعامبەت بايمىرزا ۇلى) – كوكشەتاۋ, قاراوتكەل وڭىرىندە ءوسىپ, ونەر ۇستارتقان حالىق كومپوزيتورى, اتاقتى بالۋان, تانىمال تۇلعا رەتىندە قاستەرلەنەدى. وسى ورايدا ەل تىلەگى ەسكەرىلىپ, كوكشەتاۋداعى «ۇلتتىق سپورت تۇرلەرىنەن وبلىستىق بالالار مەن جاسوسپىرىمدەر سپورت مەكتەبىنە» بالۋان شولاق ەسىمى بەرىلۋى قۇپتارلىق. بۇل قۇرمەتتى 1991 جىلى ء«داستۇر جانە ونەر مەكتەبى» رەتىندە قۇرىلعان ءبىلىم ورداسى ىرگەلى جەتىستىكتەرىمەن اقتايتىنىنا سەنىمدىمىز. ەڭ باستىسى, ەندىگى جەردە ءان مەن جىردىڭ ورداسىندا ۇكىلى ىبىراي مەن بالۋان شولاق ەسىمى كوكشەتاۋدىڭ كوشەلەرىنە, مادەنيەت جانە ونەر كوللەدجدەرىنە اتتارى بەرىلگەن اقان سەرى, ءبىرجان سالدارمەن قاتار اتالىپ, كوڭىلدەردى كوركەيتىپ تۇراتىنى عانيبەت.
ۇكىمەتتىڭ وسى قاۋلىسىمەن كوكشەتاۋ قالاسىنداعى №18 ورتا مەكتەپكە قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى, كوكشەتاۋ قالاسىنىڭ قۇرمەتتى ازاماتى ساكەن ءجۇنىسوۆتىڭ, اقكول اۋدانىنداعى №3 ورتا مەكتەپكە جازۋشى, قوعام قايراتكەرى جايىق بەكتۇروۆتىڭ ەسىمدەرى بەرىلدى. سونداي-اق, ەڭبەكشىلدەر اۋدانىنداعى ساۋلە ورتا مەكتەبى ء«شاراپي ءالجانوۆ اتىنداعى ورتا مەكتەپ», ەرەيمەنتاۋ اۋدانىنداعى مالتابار ورتا مەكتەبى «پەرۋاش كارىم ۇلى اتىنداعى ورتا مەكتەپ», قورعالجىن اۋدانىنداعى درۋجبا ورتا مەكتەبى «اقتان تولەۋباەۆ اتىنداعى ورتا مەكتەپ» مەملەكەتتىك مەكەمەلەرى بولىپ قايتا اتالدى.
باقبەرگەن امالبەك,
جۋرناليست
اقمولا وبلىسى
