قىتايدىڭ ءۇرىمجى قالاسىنداعى «اباي جولى» كومپانياسى ءتۇسىرىپ جاتقان «ابايدىڭ بالالىق شاعى» اتتى 3D كوپسەريالى انيماتسيالىق ءفيلمى اباي الەمى اياسىنداعى ىزدەنىستەردىڭ كەڭگە قانات جايىپ كەلە جاتقاندىعىن اڭعارتادى.
– قازىر ءتورت سەريانىڭ ءتۇسىرىلىم جۇمىستارى ءساتتى اياقتالدى. ۇگىت-ناسيحات ەسەبىندەگى العاشقى سەرياسىنىڭ ۇزاقتىعى 15 مينۋت, كەيىنگى سەريالارى 13 مينۋتتان تۇرادى. ءفيلمنىڭ 26 سەرياسىن ءبىر جىل كولەمىندە ءتۇسىرىپ بىتىرۋگە ءتيىسپىز. جۇمىس ءساتتى بولىپ, تەلەانالاردان كورسەتە الساق, تولىقمەتراجدى مۋلتفيلم ەتۋ ويىمىزدا بار, – دەيدى كومپانيا ديرەكتورى, ءارى مۋلتفيلم رەجيسسەرى عۇسمان قاجىتاي.
مۋلتفيلم سيۋجەتىندە اباي وبرازى حالىق ۇعىمىنا ورتاق اقىلدى, زەرەك, قازاقتىڭ قارا دومالاق بالاسى رەتىندە بەينەلەنگەن. بىراق فيلم رەجيسسەرى «بۇل اباي بەينەسىنىڭ تۇبەگەيلى وبرازدىق شەشىمى ەمەس» دەپ وتىر. – بالا ابايدىڭ ءبىتىم-بولمىسىن, بەينەسىن سۋرەتتەۋدە ۇزاق ويلاندىق. ءبىز جالپى قازاق كوڭىلىنەن, الەم كوڭىلىنەن شىعاتىن وبرازدىق نۇسقانى جاساعىمىز كەلەدى. سوندىقتان بالا ابايدىڭ بەينەسىن تولىقتىرۋ ماقساتىندا بولاشاقتا وزگەرىستەر ەنگىزۋىمىز مۇمكىن, – دەگەن ول باس پەرسوناج بەينەسىنە قاتىستى ەل اراسىنان ۇسىنىس, سىن-پىكىرلەر بولسا عانيبەت دەيدى.
ميفتىك اڭىز-اڭگىمەلەردى ارقاۋ ەتە وتىرىپ, اباي دۇنيەگە كەلەر شاقتاعى اق پەن قارانىڭ ايقاسى كورسەتىلەدى, سونىمەن بىرگە ابىز, مىستان سياقتى ءداستۇرلى ەرتەگى كەيىپكەرلەرى دە نازاردان تىس قالماعان. قازاقتىڭ بالا تاربيەسىندەگى ونەگەسى, جان-جانۋارلار الەمىنە قۇرمەت كورسەتۋ ءتارىزدى ىزگىلىككە شاقىرادى. ابايدىڭ تۋعان-تۋىسقانىڭا, دوس-جارانىڭا عانا ەمەس, ءتىپتى «دۇشپانىڭا دا ءادىل بول» دەگەن گۋمانيستىك يدەياسى ەندى انيماتسيا تىلىندە سويلەيدى.
– ستسەناريدى جازۋدا قازاقستاننىڭ, قىتايدىڭ تاجىريبەلى ماماندارىمەن بىرلەسىپ جۇمىس ىستەدىك. اباي وبرازىن بەينەلەۋدە دۇنيەگە كەلگەن كەزى, اپىل-تاپىل قاز باسقان شاعى, 7-8 جاسار بالا ابايدىڭ اجەسى مەن اناسىنىڭ اقىلى ارقىلى قيىنشىلىقتى ەڭسەرۋى سياقتى كورىنىستەردى قامتىدىق. ودان بولەك اباي تۋعان اۋىلدى سۋرەتتەۋمەن عانا شەكتەلمەي, قازاق اتىرابىنىڭ كوز تارتار كوركەم جەرلەرىن بەينەلەۋدى ماقسات ەتتىك. فيلمدە قازاق دالاسىنىڭ ءار الۋان تابيعاتى كورىنەدى, – دەگەن عۇسمان قاجىتاي وسى ارقىلى قازاقستانعا تۋريستەردى تارتۋعا بولاتىنىن دا ايتادى.
ءمۋلتفيلمنىڭ ءتۇسىرۋ جۇمىستارىنا قىتايداعى «از ۇلتتاردىڭ مادەنيەتىن قورعاۋ جانە قولداۋ» ساياساتى اياسىندا مەملەكەت قارجىلاي كومەكتەسكەن كورىنەدى.
– جاقىندا قىتايدىڭ CCTV تەلەارناسىنىڭ جاڭالىقتارى ءبىزدىڭ كومپانيانىڭ جۇمىسى تۋرالى 5 مينۋتتىق حابار جاسادى. وندا «اباي – قازاق حالقىنىڭ كونفۋتسيى» دەپ تانىستىرىلدى. بۇل – ۇلكەن مويىنداۋ, ءارى ءبىزدىڭ شاعىن كومپانيامىز ءۇشىن جەتىستىك. ازىرگە دەمەۋشى ىزدەمەدىك. الدىمەن ساپالى انيماتسيالىق ءفيلمدى تۇسىرە الاتىنىمىزدى دالەلدەگىمىز كەلەدى. ءمۋلتفيلمنىڭ العاشقى سەريالارىن ەكسپو كەزىندە قازاقستانداعى تەلەارنالاردان كورسەتسەك دەگەن نيەتىمىز بار. بۇل ءبىزدىڭ حالىقارالىق كورمەگە دايىنداعان ۇلكەن سىيىمىز بولار ەدى, – دەيدى كومپانيا ديرەكتورى.
ۇلى ابايدىڭ بالالىق شاعى حالىق فولكلورى نەگىزىندە سۋرەتتەلۋى شىعارمانىڭ ىشكى ورنەگىن بايىتا تۇسپەك. وسىلايشا, قىتايداعى قانداستارىمىز بالا ابايدىڭ وسكەن ورتاسىن بۇگىنگى جاس ۇرپاققا مۋلتيپليكاتسيالىق فيلم ارقىلى كوركەم تۇردە جەتكىزىپ, بالدىرعانداردى اباي تالىمىنە باۋلىماقشى.
ايا ءومىرتاي,
«ەگەمەن قازاقستان»
