مەموراندۋمدا قوعامدىق-ساياسي, مادەني, ءبىلىم بەرۋ, عىلىم جانە اقپارات سالالارىنداعى ىنتىماقتاستىققا, ەكى ەلدىڭ جاقىنداسۋىنا, حالىقتىق ديپلوماتيانىڭ نىعايۋى مەن دامۋىنا ىقپال ەتەتىن بىرلەسكەن جوبالار مەن ءىس-شارالاردى ازىرلەۋ جانە ىسكە اسىرۋ جوسپارلانعان بولاتىن.
«قازاقستان حالقى اسسامبلەياسى» عيماراتى الدىنان جولعا شىققان كەرۋەندى شىعارىپ سالۋ راسىمىندە وبلىستىق «قوعامدىق كەلىسىم» مكك باسشىسى ەربول بايقوناقوۆ, تۇركىستان قالالىق اقساقالدار القاسىنىڭ توراعاسى جارىلقاسىن ازىرەتبەرگەنوۆ, وبلىستىق «وزبەك» ەتنومادەني بىرلەستىگىنىڭ توراعاسى, وبلىستىق ءماسليحاتتىڭ دەپۋتاتى بادريددين نيشانكۋلوۆ ءسوز سويلەپ, بۇل شارا ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىنا قولداۋ ءارى ەكى باۋىرلاس ەل اراسىنداعى دوستىق قارىم-قاتىناستى نىعايتۋ ماقساتىندا ۇيىمداستىرىلىپ وتىرعانىن ايتتى.
– بۇل ساپار ەكى ەلگە باۋىرلاستىقتى ءارى قاراي ارتتىرا بەرۋگە سەپتىگىن تيگىزەدى, – دەيدى تۇركىستان قالالىق ارداگەرلەر كەڭەسىنىڭ توراعاسى جارىلقاسىن ازىرەتبەرگەنوۆ. – بۇدان بەس جىل بۇرىن دا جولىمىز تۇسكەن. سوندا ءبىز كورشى وزبەك ەلىنەن الار ۇلگىمىز بارشىلىق ەكەنىن ۇققانبىز. ماسەلەن, ول جاقتىڭ تۇرعىندارى تۇگەلىمەن بارلىعى 100 پايىز انا تىلىندە سويلەيدى. سوسىن جاستارى وتە ىزەتتى. بەتىڭە قاراپ سويلەمەيدى. قولدارىن كوكىرەگىنە قويىپ, تەك ىزەتتىلىك تانىتادى. قاريالار ول جاقتا كەزەك كۇتپەيدى. جاستاردىڭ قۇرمەتى كۇشتى. وسىنداي قاسيەتتەر ءبىزدىڭ جاستارعا ۇلگى بولا الادى.
وڭتۇستىكتە باقىتىن قازاق جەرىنەن تاپقان 500 مىڭعا جۋىق وزبەك دياسپوراسى تۇرادى. 143 مەكتەپتە وزبەك ۇلتىنىڭ وكىلدەرى ءوز انا تىلدەرىندە ءدارىس الادى. ونىڭ ىشىندە 86-سى قازاق-وزبەك جانە ورىس-وزبەك ارالاس مەكتەپتەرى. ال 57 مەكتەپ تازا وزبەك تىلىندە شاكىرتتەرگە ءبىلىم بەرەدى. ال وڭىردەگى وزبەك مادەني ورتالىعىنىڭ وبلىس قالالارى مەن اۋداندارىندا 13 فيليالى جۇمىس ىستەيدى.
– ءبىز قازاقستاندى ءوز وتانىمىز دەپ تانيمىز, – دەيدى وبلىستىق «وزبەك» مادەني ورتالىعى توراعاسىنىڭ ورىنباسارى گۋلي رانو راسۋلوۆا. – قازاقتا «وزبەك – ءوز اعام» دەگەن جاقسى ناقىل بار. ياعني, جاقسىلىعىمىز بەن قۋانىشتارىمىز ورتاق حالىقتارىمىز. ءبىزدىڭ ماقسات ەكى ەل اراسىنداعى رۋحاني-مادەني جاڭعىرۋدى ءارى قاراي جالعاستىرۋ بولماق.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
