الدىڭعى بولىمدە جەرگىلىكتى ن.ءجانتورين اتىنداعى مۋزىكالىق-دراما تەاتر ارتىستەرى اقىننىڭ «ون سەگىز مىڭ عالام جانە كسەنوفوبيا دەرتى» اتتى ءومىرزايا-تولعاۋىن «ۇرەي دەرتى» تاقىرىبىندا سومداپ شىقتى. 2-ءشى ءبولىم اقىن شىعارماشىلىعىنا ارنالدى. ارتىستەر س.اداي شىعارمالارىن وقىپ, انشىلەر اقىن سوزىنە جازىلعان اندەردى ورىندادى. سونداي-اق, كۇيشى سابىردىڭ شاكىرتتەرى كۇي توكپەكتەتتى.
– بۇگىن شىن مانىندە قازاقتىڭ قارا ولەڭىنىڭ تورگە شىققان كۇنى. ءسوزدىڭ كيەسى قۇرمەتتەلگەن مەرەيلى دە مارتەبەلى, رۋحاني كەشكە كۋا بولىپ وتىرمىز. قازاق ءۇشىن ءسوز – كيە, جىر – نامىس, ولەڭ – ءومىردىڭ ءمانى. دانىشپان اباي ايتقانداي: «ولەڭ – ءسوزدىڭ پاتشاسى!» وسى قاسيەتتى توپىراقتا كىندىك قانى تامعان قازاقتىڭ كورنەكتى قالامگەرى, مەملەكەت جانە قوعام قايراتكەرى, ءابىش اعا كەكىلباي ۇلى ءجيى ايتاتىن ءبىر ءسوز بار: «قازاقتىڭ اقىن بولماۋى مۇمكىن ەمەس, ويتكەنى ءار ءسوزى ءبىرىن-ءبىرى ىزدەپ تاۋىپ, قۇشاقتاسىپ, ۇيقاسىپ تۇرادى» دەگەن. شىنىندا دا قازاقتىڭ جانى اقىن, رۋحى اقىن!
ۇلان بايتاق دالانىڭ توسىندە, ەركىن وسكەن ەلدىڭ جانىن قورعاعان ءبىر قارۋى – بىلەگىنىڭ كۇشى, نايزاسىنىڭ ۇشى بولسا, ارىن قورعاعان ءبىر قارۋى – ءسوز بولاتىن. ابىل, نۇرىم, اقتان, قاشاعان سەكىلدى جىراۋلاردان باستالاتىن ماڭعىستاۋ ادەبيەتى بۇگىن دە تۇلعاسىز ەمەس. ءوزىنىڭ ء«ار قازاق – مەنىڭ جالعىزىم» دەگەن ءبىر اۋىز ءسوزى ۇلتىنىڭ ۇرانىنا اينالعان اقىن سابىر اداي – سول تۇلعانىڭ ءبىرى. تاۋەلسىزدىكتىڭ تۋىن تىكتەپ, حالقىمىزدىڭ رۋحىن اسقاقتاتىپ, ۇلتتىڭ بىرلىگىن كۇشەيتۋ جولىندا سابىر اقىننىڭ وسى ءبىر ۇران-جىرىن ەلباسىمىز نۇرسۇلتان ءابىش ۇلى نازارباەۆ تىلىنە تيەك ەتكەن بولاتىن. ءبىرتۇتاس قازاقستان حالقىنىڭ ىنتىماعىن جىرلاپ, تىنىشتىعىن تىلەۋ ءۇشىن دە ۇلكەن جۇرەك كەرەك. ءوز ۇلتىن شەكسىز سۇيگەن, شىنايى ەلشىل, وتانشىل جۇرەك كەرەك. سونداي جۇرەكتەن تۋعان جىر عانا حالقىنىڭ ارمانىمەن ۇندەسەدى:
...قازاقستان – جالعىز ۇلى قازاقتىڭ,
سول جالعىزدىڭ قۇرباندىعى بار قازاق!
مەنىڭشە اقىننىڭ بار اقيقاتى وسى ەكى جول جىرمەن ايتىلىپ تۇر.
تاۋەلسىزدىكتى الۋ قانداي ماڭىزدى بولسا, ونى ساقتاپ تۇرۋدىڭ جاۋاپكەرشىلىگى ودان دا زور ەكەندىگى تۋرالى ەلباسى ءجيى ايتادى. ءبىر كەزدەرى بۇقار جىراۋدان باستاپ قانشاما اتا-بابامىز ازاتتىقتى اڭساپ جىرلاسا, جاڭا زامان اقىندارىنىڭ قالامىنا ەلدىڭ ەركىندىگىن, قازاقتىڭ دەربەس مەملەكەتتىگىن جازۋ بۇيىردى. بۇل ۇلكەن باقىت, زور جاۋاپكەرشىلىك! ءسىز وسى جاۋاپكەرشىلىكتى ارقالاعان اقىنسىز.
– قۇرمەتتى سابىر اقىن!
ءوزىڭىز جىرلاعان ماحامبەتتىڭ سەرتىندەي بەرىك, سەمسەرىندەي وتكىر, ءور رۋحتى جىرلارىڭىز عۇمىرلى بولۋىن تىلەيمىن. ادەبيەت الەمىندە وزىندىك قولتاڭباسى بار قالامگەر, قوعامدا ەلدىك يدەياسى ايقىن قايراتكەر, الاشتىڭ ارلى ازاماتى دەگەن ابىرويىڭىز اسا بەرسىن, جاساي بەرىڭىز! شىعارماشىلىق كەشىڭىز قۇتتى بولسىن! – دەدى ماڭعىستاۋ وبلىسىنىڭ اكىمى ە.توعجانوۆ قۇتتىقتاۋ سوزىندە. ايماق باسشىسى سابىر شەركەشباي ۇلىنا وبلىستىڭ الەۋمەتتىك-ەكونوميكالىق دامۋىنا قوسقان ۇلەسى ءۇشىن قۇرمەت گراموتاسىن تاپسىردى.
قۇتتىقتاۋشىلار لەگى از بولعان جوق – ولار اقىن شىعارمالارىن جوعارى باعالاپ, دەنىنە ساۋلىق, وتباسىنا اماندىق تىلەدى, ءالى دە تىڭ تۋىندىلار كۇتەتىندىكتەرىن جەتكىزدى.
كەش «نۇر پلازا» مەيرامحاناسىندا اقىن مەن ونىڭ قوناقتارىنىڭ قۇرمەتىنە وبلىس اكىمى جايعان داستارحاندا جالعاستى. باس-اياعى 8 ساعاتقا سوزىلعان كەشتە ازاماتتار «حالىقتىڭ شىن مانىندە سابىر سىندى اقىندارىنىڭ ولەڭدەرىنە شولىركەپ جۇرگەندىگى اڭعارىلدى» دەپ تاراستى.
گۇلايىم شىنتەمىرقىزى,
«ەگەمەن قازاقستان».
فوتو: سەرىك مايەمەروۆ.
اقتاۋ.
