تاياۋدا سامات مىرزامەن اراداعى اڭگىمە جاسوسپىرىمدەر مەن جاستار اراسىندا جارقىراي كورىنگەن كەيبىر دارىندى سپورتشىلاردىڭ ەرەسەكتەر سپورتىنا جەتپەي «جوعالىپ» كەتەتىنى جايلى ءوربىدى.
«بۇل, – دەيدى سامات ەرعاليەۆ, – سپورتىمىزداعى شەتىن ماسەلەنىڭ ءبىرى. بىزدە جاستار مەن ەرەسەكتەر سپورتىنىڭ اراسىندا «التىن كوپىر» ءرولىن اتقاراتىن تەتىك بولمايىنشا, ءىس العا جىلجىمايدى. نەگە دەسەڭىز, ساباقتاس دانەكەرلىكتىڭ جوقتىعىنان جىل سايىن ەل سپورتىنىڭ بولاشاعىنا بالانعان نەبىر دارىندى سپورتشىلارىمىزدان ايىرىلىپ قالىپ ءجۇرمىز. ماسەلەن, ءجاسوسپىرىم نەمەسە جاستار اراسىندا جارقىراعان ورەننىڭ ءبارى قۇراما كومانداعا مۇشە بولىپ قابىلدانا بەرمەيدى. ەكى ۇزدىكتىڭ بىرەۋىنە عانا مۇنداي باقتىڭ بۇيىرۋى مۇمكىن. سوندا, تالانتى الدىڭعىسىنان ءبىر مىسقال دا كەم ەمەس ەكىنشىسى قايتپەك؟ راس, قازىرگى تاڭدا ءار سپورت ءتۇرى بويىنشا فەدەراتسيالاردا ەكى ورتادا قالىپ قويعان دارىندى جاستارعا ارنالعان تاجىريبەلىك ورتالىقتار اشىلا باستادى. مىنە, تالانتتىڭ اشىلۋىنا زور مۇمكىندىكتەر بەرەتىن وسى ورتالىقتار مەملەكەت تاراپىنان جان-جاقتى قامقورلىققا الىنسا, نۇر ۇستىنە نۇر بولار ەدى».
ءيا, مەملەكەت بۇل ماسەلەگە مويىن بۇرمايىنشا, جاس ەرەكشەلىكتەرى بويىنشا دۇنيەجۇزىلىك دودالاردا جۇلدەگەر اتانىپ جۇرگەن ورەندەرىمىز وگەي بالانىڭ كۇيىن كەشەرى انىق. مىسالى, جارىستاردا ۇنەمى ەكىنشى, ءۇشىنشى بولىپ جۇرگەن جاس دارىننىڭ باعى وسە كەلە جانۋى ابدەن مۇمكىن عوي. جوعارىدا سامات مىرزا ايتقان تاجىريبەلىك ورتالىقتاردا تۇرىپ, شەبەرلىك ۇشتاعان وعلاندار, بىلە-بىلسەك سپورتىمىزدىڭ سارقىلماس قورى عانا ەمەس, باسەكەلەستىكتىڭ قاينار كوزى دە ەمەس پە؟
وسىندايدا ەسكە تۇسەدى. قاراعاندىداعى ءاليا مولداعۇلوۆا اتىنداعى سپورتقا بەيىمدى, دارىندى بالالارعا ارنالعان وبلىستىق مامانداندىرىلعان مەكتەپ-ينتەرنات 1998 جىلعا دەيىن «وليمپيالىق رەزەرۆتەر ۋچيليششەسى» دەپ اتالىپ كەلدى. ياعني, بولاشاق چەمپيونداردىڭ قۇتحاناسى سول كەزدە سپورتتا ەرەكشە كوزگە تۇسكەن تاربيەلەنۋشىلەرىن ورتا مەكتەپ اتتەستاتىن العان سوڭ ۇيادان بىردەن ۇشىرىپ جىبەرمەي, ەكى جىلدىق ۋچيليششەگە الىپ قالاتىن. سولاردىڭ كوبى كەيىننەن ەرەسەكتەر اراسىندا جوعارى ناتيجەلەرگە قول جەتكىزدى. قايسىبىرى قولىنا ۋچيليششەنىڭ ديپلومىن الىپ, باپكەرلىك قىزمەتتەن باقىتىن تاپتى.
مىنە, بۇگىنگى كۇندە ماماندار وسى تاجىريبەنىڭ ومىرشەڭدىگىن ءجيى ايتىپ ءجۇر. راسىندا دا, بەس جىل ينتەرناتتا جاتىپ, بەس مەزگىل تەگىن تاماق ىشكەنى ءوز الدىنا, تاڭداعان سپورتىنىڭ قىر-سىرىن مەڭگەرگەن تالاي دارىندى بالانىڭ ينتەرناتتان تۇلەپ ۇشقاننان كەيىن ۇشتى-كۇيلى «جوعالعانىن» ەستىگەندە جەلگە ۇشقان ەسىل اقشا-اي, دالاعا كەتكەن ەسىل ەڭبەك-اي دەپ قىنجىلاسىڭ...
وتكەن عاسىردىڭ توقسانىنشى جىلدارى 17-18 جاسىندا «كسرو سپورت شەبەرى» اتاعىن الىپ, سپورتتى تاستاپ كەتكەن تالاي دارىندىنى كوردىك. البەتتە, سولاردىڭ كوبى الەمدىك, وليمپيالىق دودالاردا ەلدىڭ اتىن شىعارار سيرەك تالانت يەلەرى-تۇعىن. راس, ول كەزدە زامان باسقا بولدى. ال قازىر شە؟ ەل ەسىن جيىپ, ەڭسە تىكتەگەن بۇگىنگى كۇندە بالاعىندا ءبيتى بار بالالاردان كوز جازىپ قالۋ – ماماندار مەن باپكەرلەر ءوز الدىنا, جالپى سپورتىمىز ءۇشىن ورنى تولماس وكىنىش ەمەس پە؟
«تالانتقا دەمەۋ كەرەك, دارىنسىز ءوزى-اق جارىپ شىعادى» دەگەن كىم ايتسا دا تاۋىپ ايتقان ناقىل بار. جالعاندا وسى سوزدە قاتە جوقتىعىنا تالاي كوز جەتكىزىپ ءجۇرمىز. ءيا, تالانتتىڭ مىنەزى قانشا تارپاڭ بولعانىمەن, قۋ تىرلىكتىڭ قيتۇرقىسى الدىندا ول شىركىننىڭ ابدىراپ قالاتىنى بار. ويتكەنى, ولارعا جاراتقان يەم دارىندى ءۇيىپ-توگىپ بەرگەن دە, قاراقان باستىڭ قامىن عانا كۇيتتەيتىن جاعىمسىز مىنەز-ق ۇلىققا ورىن قالدىرماعان عوي.
ءيا, ەل سپورتىنىڭ ەرتەڭى جارقىن بولۋ ءۇشىن جاستار سپورتىنان ەرەسەكتەرگە وتكەن ەرلەرىمىزگە جان-جاقتى كومەك ماسەلەسى مەملەكەتتىك دەڭگەيدە كەشەندى شەشىمىن تاپسا دەيسىڭ. دارىنعا قانشا بايمىز دەسەك تە, حاس تالانتتىڭ سۇڭقار قۇستىڭ بالاسىنداي سىڭار ءھام سيرەك تۋاتىنىن ەستەن شىعارماعانىمىز ابزال.
قايرات ابىلدينوۆ,
«ەگەمەن قازاقستان»
