وسىلايشا قوردىڭ «اسىلدار» اتتى جوباسى شاعىن جانە ورتا بيزنەستىڭ اقساپ تۇرعان نەمەسە كوش باستاپ كەلە جاتقان تۇستارىن انىقتاپ, كومپانيانىڭ دامۋىن تەجەپ تۇرعان ماسەلەلەردى انىقتاۋدى كوزدەيدى.
جاڭا جوباعا قاتىسۋشىلاردىڭ دياگنوستيكالىق قورىتىندىسى بويىنشا جول كارتاسى مەن ءىس-ارەكەت جوسپارى جاسالىپ, ساراپتامالىق كونسالتينگ, ترەنينگتىك قولداۋ, شەتەلدىك ميسسيا مەن قارجىلىق كومەك الۋ ءۇشىن ۇسىنىم-پىكىر دايىندالادى.
«اسىلدار» – قاناتقاقتى جوبا. ءبىز وسى سالاداعى شەت ەلدىك تاجىريبەلەردى ەسكەرە كەلىپ, «كورەي رەسپۋبليكاسى شاعىن جانە ورتا بيزنەستى دامىتۋ كورپوراتسياسىنىڭ» وزىق تاجىريبەسىنە سۇيەنۋدى ءجون دەپ تاپتىق. ەلدىڭ ىشكى جالپى ءونىمىنىڭ سۇبەلى بولىگىن شاعىن جانە ورتا كاسىپكەرلىك قۇرايتىنى بەلگىلى. ءبىز بۇل سالانىڭ باسەكەگە قابىلەتتى ءارى قارقىندى دامىعانىن قالايمىز. وسى ماقساتتا كاسىپورىننىڭ بارلىق «كەسەلىن» انىقتاپ, جوسپار جاساپ, سەمينارلار مەن ترەنينگتەر وتكىزىپ, شەتەلدىڭ الدىڭعى قاتارلى كاسىپورىندارىمەن تاجىريبە الماسۋعا مۇمكىندىك بەرەتىن جوبا دايىندالدى. مۇنىڭ بارلىعى ءوندىرىستىڭ ءتيىمدى جۇمىس ىستەۋىنە, قىزمەتتىڭ وزىندىك قۇنىن تومەندەۋىنە, ساپاسى مەن ءوزى-ءوزى اقتاۋ قاسيەتىن ارتتىرۋعا الىپ كەلەدى», – دەدى «دامۋ» قورىنىڭ باسقارۋشى ديرەكتور-باسقارما مۇشەسى عابيت لەسبەكوۆ.
شاعىن جانە ورتا بيزنەس دياگنوستيكاسىنا كومپانيانىڭ ءدال قازىرگى جاعدايى, ونەركاسىپتىك/تەحنولوگيالىق تالداۋ, كومپانيانىڭ وندىرىستىك قۋاتى, جول كارتاسى, ءىس-ارەكەت جوسپارى مەن ساراپشىلاردىڭ ۇسىنىم-پىكىرى كىرەدى.
سول سياقتى جوباعا ىلىككەندەرگە ساراپتامالىق كونسالتينگ ۇسىنىلادى. بۇل – ءوندىرىستىڭ زاماناۋي ۇلگىسىن, بيزنەس جۇرگىزۋدىڭ وزىق ادىستەرىن, ماركەتينگ, جاڭا قۇرالمەن جۇمىس ىستەيتىن قىزمەتكەرلەردىڭ بىلىكتىلىگىن ارتتىرۋدى ەنگىزەتىن جوعارى بىلىكتى ساراپشىلار قىزمەتى.
ءارى جوباعا قاتىسۋشىلارعا سالالىق تاقىرىپتى قامتيتىن جەكە ترەنينگ پەن سەمينار وتكىزۋ دە قاراستىرىلعان.
ال كومپانياعا دياگنوستيكا جاساۋ, ساراپتامالىق كونسالتينگ پەن سەمينارلار اقىسىن تولەۋدىڭ 90 پايىزىن «دامۋ» قورى مىندەتىنە الىپ وتىر. قالعان 10 پايىزىن جوباعا قاتىسۋشى تولەيدى. وعان قوسا ساراپتامالىق كونسالتينگتىڭ ۇسىنىم-پىكىرلەرىن وندىرىسكە ەنگىزگەن ىسكەرلەر تاجىريبەدەن ءوتۋ ءۇشىن شەتەلدىك كاسىپورىنداردى تاڭداۋ دا «دامۋ» قورىنىڭ جاۋاپكەرشىلىگىندە.
قازىرگە جوباعا قاتىسۋشىلارعا تومەندەگىدەي تالاپتار قويىلىپ وتىر. ۇمىتكەرلەر استانا, الماتى قالالارى مەن الماتى وبلىسى, شىعىس قازاقستان, قاراعاندى وبلىستارىنان شىققان وڭدەۋ سالاسىنىڭ وكىلدەرى بولۋى كەرەك. وعان قوسا مەنشىك ءتۇرى – قر ازاماتىنا تولىق نەمەسە جارتىلاي تيەسىلى, كەم دەگەندە سوڭعى ءۇش جىل جۇمىس ىستەپ تۇرعان كاسىپورىن بولۋى كەرەك. جانە كاسىپورىن باسشىسى نەمەسە ورىنباسارى كەمى سوڭعى 5 جىلدا كاسىپكەرلىك سالادا باسشىلىق ەتۋى ءتيىس.
ايناش ەسالي,
«ەگەمەن قازاقستان».
الماتى
