سەمينار تىلدەردى قىسقا مەرزىمدە وقىتۋدىڭ قازىرگى تەحنولوگياسىن دايىنداۋ مەن ەنگىزۋ ارقىلى قازاقستان حالقى بىرلىگىنىڭ ماڭىزدى فاكتورى رەتىندەگى مەملەكەتتىك ءتىلدىڭ ءرولىن ارتتىرۋدى, قازاقستاندىق بىرەگەيلىكتى قالىپتاستىرۋدى ماقسات ەتىپ قويدى. يگى ماقساتتاعى باسقوسۋعا قازاقستان پرەزيدەنتى جانىنداعى «قوعامدىق كەلىسىم» رمم وكىلى كامال الپەيىسوۆا, «ۇلت تاعدىرى» رەسپۋبليكالىق قوعامدىق قوزعالىسىنىڭ توراعاسى دوس كوشىم, «جاعداياتتىق قازاق ءتىلى» وقۋلىعىنىڭ اۆتورى قانات تاسىبەكوۆ, «يازىك ي كۋلتۋرا – كازاحسكي دليا ۆسەح» قازاق ءتىلىن ۇيرەتۋ وقۋلىعىنىڭ اۆتورى راۋشان كوشەنوۆا كەلىپ قاتىستى.
«مۇنداي سەمينار-ترەنينگ الدىڭعى جىلى الماتى وبلىسىندا, وتكەن جىلى باتىس قازاقستان وبلىسىندا, بيىل قوستانايدا ءوتىپ وتىر. سەميناردىڭ قوستانايدا ءوتۋىنىڭ ماڭىزى بار. وبلىستىڭ, ونىڭ ىشىندە قالا حالقىنىڭ باسىم بولىگى ورىس تىلىندە سويلەگەندىكتەن, مەملەكەتتىك تىلگە باسىم نازار اۋدارتۋ كەرەك. ال ءتىلدى مەڭگەرۋ ءۇشىن قازىر يننوۆاتسيالىق تاسىلدەر قاجەت بولادى. ءتىل ۇيرەتۋدە وزىق ادىستەمەسى بار عالىمدار سەميناردا تاجىريبەلەرىمەن ءبولىستى. قازاق دالاسىنداعى العاشقى مەكتەپ اشىلعان ايماقتا مەملەكەتتىك ءتىلدىڭ سالتانات قۇرۋى وسى وبلىستاعى باسىمدىق شارۋانىڭ ءبىرى بولۋى كەرەك دەپ ويلايمىن. ءبىزدىڭ ماقسات – جاقسى باستاماعا كومەك بەرۋ», دەدى قازاقستان پرەزيدەنتى جانىنداعى «قوعامدىق كەلىسىم» رمم وكىلى كامال الپەيىسوۆا.
سەميناردا ورىس مەكتەپتەرىندەگى قازاق ءتىلى ءپانىنىڭ مۇعالىمدەرى, دوستىق ءۇيى جانىنداعى ەتنو اعارتۋ كەشەندەرىنىڭ ادىسكەرلەرى مەن وقىتۋشىلارى, ءتىل سالاسىنىڭ ماماندارى سەمينار قوناقتارىنىڭ لەكتسياسىنان كوپ ماعلۇمات الدى.
«مۇنداي سەمينار ىزدەنىستەرگە باستايدى. ونىڭ سىرتىندا مەملەكەتتىك ءتىلدى ۇيرەنگىسى كەلەتىندەر ەڭبەك ەتۋى كەرەك. ويتكەنى سوزدىك قوردى مولايتۋ تەك ەڭبەكپەن كەلەدى. سەمينار مەملەكەتتىك تىلگە دەگەن جاستاردىڭ قىزىعۋشىلىعىن وياتادى دەپ ويلايمىن», دەدى فەدوروۆ اۋدانى ورتالىعىنداعى №1 ورتا مەكتەپتىڭ قازاق ءتىلى مۇعالىمى دميتري روماششەنكو.
ءنازيرا جارىمبەتوۆا,
«ەگەمەن قازاقستان»
