2017 جىلدىڭ 1 شىلدەسىنەن باستاپ مەملەكەتتىڭ, جۇمىس بەرۋشىلەردىڭ جانە ازاماتتاردىڭ ورتاق جاۋاپكەرشىلىگىنە نەگىزدەلگەن مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلە باستايدى. حالىق وسى ارقىلى 2018 جىلدىڭ 1 قاڭتارىنان باستاپ مەديتسينالىق كومەككە مىندەتتى مەديتسينالىق ساقتاندىرۋ باعدارلاماسى بويىنشا قول جەتكىزە الادى. ياعني, كەز كەلگەن سىرقاتىڭىزعا بايلانىستى مەديتسينالىق تەگىن كومەك الىپ, ءتىپتى قىمبات وتالاردىڭ ءوزىن تەگىن جاساتا الاسىز. ول ءۇشىن مىندەتتى الەۋمەتتىك مەديتسينالىق ساقتاندىرۋ جۇيەسىنە اي سايىن جارنا اۋدارىپ تۇرۋىڭىز قاجەت. بۇل جۇيەنىڭ نەگىزگى ماقساتى – حالىققا كورسەتىلەتىن مەديتسينالىق كومەكتىڭ دەڭگەيىن الدىڭعى قاتارلى ەلدەردىڭ دەڭگەيىنە جەتكىزۋ, ءارى مەديتسينالىق قىزمەت ساپاسىن جەتىلدىرۋ. بۇگىنگى جيىن بارىسىندا اتالمىش باعدارلاما بۇگە-شۇگەسىنە دەيىن ءجىتى تالداندى.
«بۇل باعدارلاما بۇكىل دۇنيە ءجۇزىنىڭ دامىعان ەلدەرىندە بۇرىننان قولدانىلىپ كەلە جاتقان پرينتسيپ. بۇل دەگەنىمىز, دەنساۋلىق ساقتاۋ جۇيەسىنە, ءار ازاماتتىڭ دەنساۋلىعىنا تەك جالعىز ادامنىڭ ءوزى عانا ەمەس, مەملەكەت پەن جۇمىس ورنى بىرلەسىپ جارنا قۇيىپ ازاماتتارعا قولداۋ كورسەتۋ. سول ارقىلى حالىقتىڭ ءال-اۋقاتىن ارتتىرىپ, مەديتسينالىق قىزمەت ساپاسىن نىعايتۋ. الەمنىڭ وزىق ەلدەرىندە پايدالانىلىپ كەلە جاتقان وزىق تەحنولوگيالاردى ءوز ەلىمىزگە اكەلۋ. قاي جەردە تۇراتىنىنا, ۇلتىنا, جىنىسىنا قاراماستان ازاماتتاردىڭ بارلىعىنا بىردەي كەڭ كولەمدە قاجەتتى ساپالى مەديتسينالىق كومەك الۋعا قۇقىق بەرۋ. ءبىر جىلدان اسا ۋاقىتتان بەرى دايىندىق جۇمىستارى ءجۇرىپ جاتىر. جوبانى ىسكە اسىرۋ ءۇشىن قارجى قۇرامى ءۇش جاقتى نەگىزدە جولعا قويىلادى. ءبىرىنشى, مەملەكەت ەسەبىنەن. ياعني, 10 ميلليوننان استام حالىققا ساقتاندىرۋ جارناسىن مەملەكەت قارجىلاندىرادى. وعان مىنا 14 توپ جاتادى. 18 جاسقا دەيىنگى بالالار, جوعارعى وقۋ ورنىنىڭ ستۋدەنتتەرى, كوپ بالالى انالار, كۇمىس, التىن القا يەگەرلەرى, جاس بوسانعان انالار, جۇكتى ايەلدەر, ۇلى وتان سوعىسىنىڭ ارداگەرلەرى مەن مۇگەدەكتەرى, قاتارداعى زەينەتكەرلەر, رەسمي تۇردە جۇمىسسىزدىققا تىركەلگەن ازاماتتار, تاريحي وتانىنا قونىس اۋدارعان قانداستار, باس بوستاندىعىنان ايىرىلعاندار, سونداي-اق بىرقاتار قۇرىلىمداردىڭ قىزمەتكەرلەرى بەلگىلى مەرزىم اياسىندا مەملەكەت ەسەبىنەن جارنامەن قامتاماسىز ەتىلەتىن بولادى. ەكىنشى, جۇمىس بەرۋشى تاراپىنان. ياعني, وسى جىلدىڭ 1 شىلدەسىنەن باستاپ ءاربىر جۇمىس ورنى ءوز قىزمەتكەرلەرىنە ورتا جالاقىنىڭ ەسەبىنەن 1% جارنا تولەپ وتىرادى. ستاتيستيكالىق دەرەكتەر بويىنشا بۇل قۇرامعا 6 ميلليونعا جۋىق حالىق كىرەدى. بۇل توپتىڭ ساناتىندا جەكە كاسىپكەرلەر مەن كاسىپورىندار بار. ولار دا ەڭ تومەنگى جالاقىنىڭ نەگىزىندە 5%-عا دەيىن جارنا اۋدارىپ وتىرۋى قاجەت. تاعى ءبىر توپ ەش جەردە تىركەلمەي ءوزىن-ءوزى قامتاماسىز ەتىپ جۇرگەن ازاماتتار. ولار ەڭ تومەنگى ايلىق مولشەرىنەن 5%-عا دەيىن تولەپ وتىرۋعا ءتيىس. مەديتسينالىق ساقتاندىرۋ تۋرالى جاڭا زاڭ ءاربىر ازاماتتىڭ دەنساۋلىعىنا ءجىتى ءمان بەرۋگە باعىتتالعان, دەيدى, مىندەتتى الەۋمەتتىك مەديتسينالىق ساقتاندىرۋ بويىنشا رەسپۋبليكالىق سپيكەر قۇرالباي قۇراقباەۆ.
وسى ماسەلەلەردى حالىققا كەڭ كولەمدە ءتۇسىندىرۋ جۇمىستارى كۇن تارتىبىندە جۇرگىزىلىپ كەلەدى. ء«ساۋىر ايىنان باستاپ ارنايى مامانداردان قۇرالعان توپ قالا بويىنشا ءۇيدى-ءۇيدى ارالاپ, تۇرعىنداردىڭ اتالعان ارنايى توپتاردىڭ قاي كاتەگورياسىنا جاتاتىنىن انىقتاپ, قۇجاتتارىن تۋرالاپ, ءتۇسىندىرۋ جۇمىستارىن جۇرگىزۋدە. دۇرىس ءتۇسىنىپ قابىلدايتىن بولسا, بۇل حالىق ءۇشىن مەملەكەت تاراپىنان جاسالىپ وتىرعان ۇلكەن كومەك ءارى زور مۇمكىندىك» دەيدى, الماتى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ايگۇل احمەتوۆا.
ماماندار مىندەتتى الەۋمەتتىك مەديتسينالىق ساقتاندىرۋ جۇيەسىنە جارنالاردى اۋدارمايتىن ازاماتتار ءۇشىن مەديتسينالىق كومەك قولجەتىمسىز بولاتىنىن ايتۋدا. شارا سوڭىندا جيىنعا قاتىسۋشىلار وسى ماسەلەلەرگە قاتىستى ساۋالدارىن جولداپ تولىققاندى جاۋاپ الدى.
ارمان وكتيابر,
«ەگەمەن قازاقستان»
