ۇمىتكەرلەردىڭ اراسىندا بولگارلىق كريستيان كوستوۆ تا بار. جاس ءانشىنىڭ بايقاۋعا ازىرلىگىن بىلمەك ماقساتىندا حابارلاسقان بولاتىنبىز. كريستيان ۋاقىتىنىڭ وتە تىعىز ەكەنىنە قاراماستان, ءبىزدىڭ ساۋالىمىزعا جاۋاپ بەرۋگە تىرىستى.
– 2015 جىلى بولگاريادا وتكەن X FACTOR بايقاۋىندا ەكىنشى ورىن العان ەدىم. وسى سەبەپتى دە تورەشىلەر ESC 2017 كونكۋرسىنا قاتىسۋىمدى قۇپ كوردى. بولگار ۇلتتىق تەلەۆيدەنيەسى «ەurovision-2017» بايقاۋىنا ىرىكتەۋ جاريالاپ, ۇمىتكەر رەتىندە تانىستىرىلدىم. بۇگىندە باسىم كوپشىلىك ءوزىنىڭ بىلگەنىن ايتىپ, بىلمەگەنىمدى ۇيرەتىپ, كومەكتەسىپ جاتىر. جاستىعىم مەنىڭ – باستى كوزىرىم. دەگەنمەن «ساعان ءالى تاجىريبە كەرەك» دەيتىندەر دە جوق ەمەس,– دەيدى كريستيان.
كريستيان كوستوۆ 2000 جىلى ماسكەۋ قالاسىندا دۇنيەگە كەلگەن. كىشكەنتايىنان دارىنىمەن كوزگە تۇسكەن بالاقايدى اتا-اناسى ماسكەۋدەگى اتاقتى «نەپوسەدى» بالالار انسامبلىنە وقۋعا بەرەدى. 2012 جىلى «دەتسكايا نوۆايا ۆولنا» حالىقارالىق جاسوسپىرىمدەر بايقاۋىنا قاتىسۋى ونىڭ ونەر جولىنداعى جۇلدىزىن جارقىراتا ءتۇستى. ءدال وسى جىلى لينا اريفۋلينانىڭ «شكولا مۋزىكي» بالالار تەلەۆيزيالىق جوباسىنا شاقىرتۋ العان ول, بايقاۋدا باتىرحان شۇكەنوۆپەن بىرگە ونەر كورسەتىپ, كوپشىلىك كوزايىمىنا اينالدى. سول كەزدە ونىڭ جاسى نەبارى ون ەكى جاستا ەدى.
وتباسى تۋرالى, اناسىنىڭ قازاق قىزى ەكەندىگىن ەستىگەنىمىزدى ايتىپ, ءجون-جوباسىن سۇرادىق.
– ءيا, مەنىڭ انام زاۋرەش قازاق قىزى. اكەم مەن انام كەڭەس وداعى كەزىندە ماسكەۋدە ينستيتۋتتا وقىپ جۇرگەندە تانىسقان ەكەن. انام اكەمدى ءبىر كورگەننەن ۇناتىپ قالعاندىعىن ايتىپ وتىرادى. اكەم كونستانتين بولسا قازاقستاندىق ارۋدىڭ جۇرەگىن جاۋلاپ العانىنا ءالى كۇنگە سەنە الار ەمەس, – دەپ كۇلەدى كريستيان.
وسىندايدا «جىگىتتىڭ جاقسى بولماعى – ناعاشىدان» دەگەن ماقالدىڭ بەكەر ايتىلماعانىن تۇسىنەسىڭ. ونى «ونەر مەن ونەگەنى ۇيرەتكەن اتام مەن اجەم» دەپ كريستياننىڭ ءوزى دە قۋاتتايدى.
– بويىمداعى ونەر اتامنان بەرىلگەن دەپ ايتسام ارتىق ايتپاعان بولار ەدىم. سىزدەر مەنىڭ سەيفوللا اتامدى كورسەڭىزدەر عوي, جۇرگەن جەرى دۋمان, كەز كەلگەن وتىرىستىڭ جۇلدىزىنا اينالادى. جالپى, ءبىز وتباسىمىزبەن ونەرگە جاقىنبىز. انام مەن تاتەم ەكەۋى كاراوكەنىڭ حانشايىمدارى. مەنىڭ كىشى باۋىرلارىم – ارمان مەن سوفيا ماسكەۋدەگى اتاقتى ۆ.س. لوكتەۆ ءانسامبلىنىڭ حورىندا ونەر كورسەتەدى, – دەپ اقتارىلا سويلەدى.
كريستيان بوستونداعى بەركلي مۋزىكالىق كوللەدجىنە وقۋعا قابىلدانعان. «ەurovision» بايقاۋىنا قاتىسۋى سەبەپتى وقۋعا كەلەسى جىلدان باستاپ تولىق كىرىسپەك. شىعارماشىلىعى تۋرالى ءسوز بولعان تۇستا, امەريكالىق ءانشى برۋنو مارس پەن بريتاندىق ەد شيراننىڭ ونەرىن ۇنەمى نازاردا ۇستايتىندىعىن ايتادى. ول ديماش قۇدايبەرگەننىڭ دە ەسىمىمەن تانىس بولىپ شىقتى. «ديماشتىڭ تەحنيكالىق بازاسى مىقتى ءارى ماڭدايى جارقىراعان تەنور» دەپ باعالاعان كريستيان ءانشىنىڭ فرانتسياداعى تابىسى ءۇشىن ەرەكشە قۋانىپتى. ال اجەسى مەن اتاسى تۋرالى ايتقان ءبىر اۋىز لەپەسىنەن جيەننىڭ ناعاشى جۇرتىنا دەگەن ءىلتيپاتى مەن سۇيىسپەنشىلىگىن سەزىندىك.
– وكىنىشكە قاراي, قازاقستانعا بارماعالى كوپ بولدى. بىراق تۋىستارىمىز ماسكەۋگە ءجيى كەلەتىندىكتەن, ولار بىزبەن بىرگە تۇرادى دەپ ايتسام دا بولادى. اجەم مەنى بەسىك جىرىمەن ءوسىردى. ال اتام ماعان ەرتەلى-كەش تاريح پەن گەوگرافيا پاندەرىن وقىتتى. ول الەم كارتاسى مەن استانالارىن كوزىن جۇمىپ تۇرىپ جاتقا سوعادى. ولار ماعان جاقىندارىمدى ءسۇيۋدى, جاقسى كورۋدى ۇيرەتتى,– دەيدى.
ەل گازەتى «ەگەمەن قازاقستان» اتىنان حابارلاسىپ جاتقانىمىزعا العىسىن بىلدىرگەن كريستيان باسىلىمعا ءوزىنىڭ تىلەكتەس ەكەنىن جەتكىزدى:
«حاباردارمىن, بىرەر جىلدان كەيىن عاسىرلىق مەرەيتويىن تويلايتىن ىرگەلى باسىلىم عوي. جۋرناليستيكانىڭ وزىق ۇلگىسىن كورسەتىپ كەلە جاتقان گازەت ۇجىمى مەن باسىلىم وقىرماندارىنا بارلىق جاقسىلىق اتاۋلىنى تىلەيمىن».
ەركە كۇننىڭ قالىقتاعان اق قۇسىنداي بولعان ورىمدەي ونەرپاز كريستيان كوستوۆ «Beautiful mess» انىمەن 11 مامىر كۇنى ەكىنشى جارتىلاي فينالدا ونەر كورسەتپەك. جۇرەك قىلىن شەرتەتىن ءمولدىر دە تۇنىق داۋىسىمەن ءان تولقىنىنا وزگەشە لەپ اكەلگەن ناعاشىسىنا تارتقان جيەننىڭ ءان الەمىندەگى ءدۇبىرى تۇگەسىلمەسىن دەپ تىلەيىك!
ايا ءومىرتاي,
«ەگەمەن قازاقستان»
