شەشۋشى كەزەڭ

وسى كۇندەرى «شىعىس» وڭىرلىك قولباس­شى­لى­عىنىڭ اسكەري پوليگونىندا قازاقستان مەن رەسەي قارۋلى كۇشتەرى قاتىساتىن «شىعىس – 2011» بىرلەسكەن جەدەل-تاكتيكالىق كوماندا­لىق-شتابتىق وقۋ-جاتتىعۋلارىنىڭ شەشۋشى كە­زەڭى وتۋدە. بۇعان دەيىن قازاقستاننىڭ ءار ءتۇرلى پولي­گون­دارىندا وتكەن كوماندالىق-شتابتىق جانە تاك­تيكا­لىق-ارنايى وقۋ-جاتتىعۋلارىنا «شى­عىس», «وڭ­تۇستىك», «استانا» وڭىرلىك قولباس­شى­لىقتارىنىڭ, اۋە قورعانىسى كۇشتەرىنىڭ قۇ­رامالارى مەن ءبو­لىمدەرى, اەروۇتقىر اسكەر­لەرىنىڭ دەسانتتى-شابۋىلداۋشى بولىمشەلەرى قاتىستى. ال «شىعىس – 2011» جاتتىعۋلارىنىڭ شەڭبەرىندە «قىزىلاعاش» پوليگونىندا وتكەن قا­زاقستان اۋە قورعانىسى كۇشتەرى مەن رەسەي اسكەري اۋە كۇشتەرى «اۋە كۇشتەرى – 2011» بىرلەسكەن جاتتىعۋلارىندا ەكى ەل اسكەري اۋە كۇشتەرىنىڭ باسشىلىعى مەن ۇشقىشتارى بىرلەسە قىمىلداۋ ارقىلى جاقسى تاجىريبە جيناقتاي الدى. قازىرگى تاڭدا دەسانتتى-شابۋىلداۋشى ءبولىم­شە­لەر ەڭ ۇتقىر جانە بارىنشا دايىندالعان بولىمشە بولىپ تابىلادى. از قۇرامدا, زاماناۋي قارۋ-جا­راقتارمەن جاراقتالعان دەسانتشىلار تاپسىر­ما­لار­دى قىسقا مەرزىمدە ورىنداۋعا قابىلەتتى. قازاقستان مەن رەسەيدىڭ بولىمشەلەرى ۇقشۇ جەدەل قيمىل­دايتىن ۇجىمدىق كۇشتەرىنىڭ قۇرامىنا كىرەتىنى بەلگىلى. ولار ءۇشىن مۇنداي جاتتىعۋلاردىڭ تاپسىر­مالارىن ورىنداۋ ۇقشۇ جەدەل قيمىلدايتىن ۇجىمدىق كۇشتەرىنىڭ ءىس-قيمىلى شەڭبەرىندەگى تاپسىرمالارمەن ۇشتاسىپ جاتىر. كەشە «شىعىس» پوليگونىندا وقۋ-جاتتىعۋدىڭ ماز­مۇنىنا ساي جاۋىنگەرلىك ءىس-قيمىلدار وتكىزىلدى. قا­زاق­ستان جانە رەسەي قارۋلى كۇشتەرى وكىلدەرىنەن قۇرالعان كواليتسيالىق توپ شارتتى اسكەري قاقتىعىس ورىن العان اۋماقتاعى جاعدايدى تۇراق­تان­دىرۋعا ارنالعان وپەراتسيالاردى بىرلەسىپ جۇرگىزدى. جاتتىعۋلارعا بارلىعى 3500-دەن استام اسكەري قىزمەتشى قاتىسۋدا. 500-دەن اسا ءاۆتوموبيلدى جانە بروندى تەحنيكا تارتىلعان. ولار – جاياۋ اسكەردىڭ جاۋىنگەرلىك ماشي­نا­لارى, ت-74 تانكى, بروندى ترانسپورتەرلەر. «گراد», «گياتسينت», «مستا», «گۆوزديكا» سىن­دى ارتيللە­ريالىق قوندىرعىلار دا ءوز پو­زيتسيالارىنان ارتيللەريالىق سوققى بەردى. جاتتىعۋلارعا قازاقستان مەن رەسەيدەن وتىز­دان استام اۆياتەحنيكا قاتىستىرىلدى. ولار­دىڭ قاتارىندا سۋ-27, سۋ-24, تۋ-22, يل-76 ۇشاق­تارى مەن مي-24, مي-17, مي-8مت تىكۇشاقتارى بار. اسكەرلەردى باسقارۋ نەگىزى بايلانىس بولىپ تابىلاتىنى بەلگىلى. جاتتىعۋ بارىسىندا قازاقستان جاعى دالالىق جاعدايدا سپۋتنيكتىك بايلانىس ورنا­تىپ, ينتەرنەت جەلىسىن قوستى. دالالىق جاۋىنگەرلىك باسقارۋ ورتالىعىنداعى بايانداۋلار مەن تىڭداۋلار زاماناۋي بەينەكونفەرەنتسيا جەلىسىن قولدانۋ ار­قىلى جۇزەگە استى. جاتتىعۋ قورىتىندىسى بويىنشا قازاقستان مەن رەسەيدىڭ اسكەري باسشىلىعى جاتتىعۋلاردىڭ باستى ماقساتى – باسقارۋ ورگاندارىنىڭ ءوزارا ءىس-قيمىلى ءساتتى ورىندالدى دەپ شەشتى. كومانديرلەر مەن شتاب­تار ارنايى وپەراتسيالار جۇرگىزۋگە تاجىريبە جيناقتاسا, اسكەرلەر وزدەرىنىڭ دالالىق بىلىكتەرىن جەتىلدىردى. سونىمەن قاتار, ەكى ەلدىڭ اسكەر­با­سى­لارىنا اسكەرلەردىڭ كواليتسيالىق توپتارىن قۇرۋ, ونى جاساقتاۋ جانە قولدانۋ ماسەلەلەرىن زەرتتەۋگە قوسىمشا مۇمكىندىك تۋدى. دينا مۋحارينوۆا, قورعانىس مينيسترلىگى ءباسپاسوز قىزمەتىنىڭ وكىلى.