ءسىز نە دەيسىز؟
مەملەكەت باسشىسىنىڭ تاپسىرماسىمەن اقمولا وبلىسىنىڭ تاۋار وندىرۋشىلەرى 2008 جىلدان باستاپ استانا قالاسىنىڭ ازىق-ت ۇلىك بەلدەۋىن قامتاماسىز ەتۋ باعدارلاماسىن جۇزەگە اسىرۋدا. ونىڭ ماقساتى, اتقارىلعان ىستەر مەن جۇزەگە اسىرىلار مىندەتتەر كولەمى اۋقىمدالا تۇسۋدە. بۇل ماڭىزدى جوبا ولكە تىنىسىن كەڭىتۋدە, ەكونوميكالىق ورلەۋدىڭ جاڭا قادامدارىن قالىپتاستىرۋدا قانداي ورىن الماق, جالپى اتقارىلعان جۇمىستارعا كوڭىل تولا ما؟
«ەگەمەن قازاقستاننىڭ» مەنشىكتى ءتىلشىسى باقبەرگەن امالبەك وبلىستىق اۋىل شارۋاشىلىعى باسقارماسىنىڭ باستىعى سەرىك جامبەتالينگە:
– ءسىز بۇعان نە دەيسىز؟
– كوڭىلدەگى كوپ ويدى قاناتتاندىرۋ كەرەك. وعان نەگىز دە, مۇمكىندىك تە بار. باعدارلاما قولعا الىنعالى بەرى جالپى قۇنى 23 ميلليارد تەڭگەنىڭ 41 جوباسى جۇزەگە اسىرىلدى. ءناتيجەسىندە, مال شارۋاشىلىعى ءونىمدەرىنىڭ بارلىق ءتۇرى بويىنشا ەلەۋلى ءوسىم قامتاماسىز ەتىلدى. ءماسەلەن, استانا تۇرعىندارىنىڭ ءسۇت ونىمدەرى مەن ەتكە سۇرانىسى سايكەسىنشە 92 جانە 40 پايىزعا وتەلىپ وتىر. مۇنداعى كورسەتكىش, 2008 جىلمەن سالىستىرعاندا 37 جانە 14 پايىزعا ارتا ءتۇستى. ال, جۇمىرتقا, كارتوپ, ۇن وندىرىسىندە ىشكى جانە استانا سۇرانىسىنان تىسقارى, ەكپورتتىق الەۋەتىمىز دە قۋاتتانىپ وتىر. باعدارلاما قولعا الىنعان جىلدار ىشىندە استانا ساۋدا نۇكتەلەرىنە 440,6 مىڭ توننا ءسۇت, 120 مىڭ توننا ەت ءونىمدەرى مەن 633 ميلليون دانا جۇمىرتقا جەتكىزىلدى. وسى ورايدا, باعدارلاما شەڭبەرىندە, ءوڭىرىمىز ءۇشىن ءداستۇرلى ەمەس ءوسىمدىك مايىن ونەركاسىپتىك نەگىزدە شىعارا باستاعانىمىزدى, ونىڭ ساپاسى شەتتەن تاسىمالداناتىن ونىمدەردەن قالىسپايتىندىعىن ايتقىم كەلەدى. وبلىس بۇل باعىتتا 23,3 ميلليارد تەڭگەنىڭ 19 جوباسىن ىسكە قوساتىن بولادى.
تالدامالار كورسەتكەنىندەي, جىل سايىن استانا داستارقانىنا 252,2 مىڭ توننا ءسۇت, 40,2 مىڭ توننا ەت ونىمدەرى مەن 101,1 ميلليون دانا جۇمىرتقا جەتكىزۋىمىز قاجەت. جوسپارلانعان نىسانداردىڭ قاتارعا قوسىلۋى جانە قولدانىستاعى ءوندىرىس ورىندارىنىڭ جوبالىق قۋاتىنا ەنۋى 2014 جىلعا قاراي مىندەتتى تاپسىرمالاردىڭ اسىرا ورىندالاتىندىعىنا سەنىمىمىزدى بەكىتە ءتۇستى.
بۇعان قوسىمشا, وبلىستا ەت باعىتىنداعى مال شارۋاشىلىعىن دامىتۋدىڭ 2011-2015 جىلدارعا ارنالعان وڭىرلىك باعدارلاماسى جۇمىس ىستەۋدە. ونىڭ اياسىندا 6 جاڭا بورداقىلاۋ الاڭى مەن 6 اسىل تۇقىمدى كاسىپورىن قۇرۋ جوسپارلانعان. ياعني, وبلىس 2015 جىلى استانا بەلدەۋىمەن قاتار, ءىرى قارا ەتىن سىرتقا شىعارا الادى دەگەن ءسوز.
ونىمدەرىمىز تاۋار ءوندىرۋشىلەردىڭ استانا قالاسىنداعى جەكە ساۋدا نۇكتەلەرىندە, سونداي-اق 22 فيرمالىق دۇكەندەر مەن دۇڭگىرشىكتەردە, «شاپاعات» كوممۋنالدىق بازارىندا ساتىلادى. تۇراقتى تۇتىنۋشىلارىمىز اقمولا ونىمدەرىنىڭ ساپاسىنا جوعارى باعا بەرۋدە.
باس قالامىزدىڭ ازىق-ت ۇلىك بەلدەۋىن تۇراقتى ءارى جىل بويى ۇزدىكسىز قامتاماسىز ەتۋ ماقساتىندا جالپى سىيىمدىلىعى 15,3 مىڭ تونناعا تەڭ 23 قويما جۇمىسقا قوسىلعان. باعدارلاما شەڭبەرىندە تاعى دا ءبىر جىلىجاي سالىناتىن بولادى. كورىپ وتىرعانىڭىزداي, بۇل باعدارلاما وبلىس تىرشىلىگىن اگروونەركاسىپتىك باعىتتا دامىتۋعا, مىڭداعان ادامداردى جاڭا جۇمىس ورىندارىمەن قامتاماسىز ەتۋگە مۇمكىندىك بەردى.
اقمولا وبلىسى.
