كەڭەسكە قاتىسۋشىلار لەبىزى

مۇحاممەد الي, (سومالي): – قازاقستان يسلام ىنتىماقتاستىق ۇيىمىنا توراعالىق ەتۋگە سايلاندى. مەنىڭشە, قازاقستاننىڭ ۇيىم جۇمىسىن جانداندىرۋعا ىقپالى مول بولادى دەپ ويلايمىن. ويتكەنى, قازاقستان مۇنداي ۇلكەن ۇيىمدى بۇرىن دا باسقارىپ كوردى. سەسسيا جۇمى­سىنىڭ ۇيىمداستىرىلۋى دا جاقسى ويلاستىرىلعان. ەشقانداي بوگەلىس جوق. ءوز باسىم ءبىزدىڭ يسلام ىنتىماقتاستىق ۇيىمى سولتۇستىك افريكا ەلدەرىندە تىنىشتىق پەن تۇراقتىلىقتى قالپىنا كەلتىرۋگە وڭ ىقپال ەتەر دەگەن ۇمىتتەمىن. قازىر بۇل ماسەلەلەر ءبىزدى دە قاتتى تولعاندىرىپ وتىر. ءال دجاروەد, (ساۋد ارابياسى): – مەن قازاقستان پرەزيدەنتى نۇرسۇلتان نازار­باەۆتىڭ سەسسيادا سويلەگەن سوزىنەن ۇلكەن اسەر الدىم. ول ۇيىم جۇمىسىن جانداندىرۋ باعىتىندا ءبىرتالاي ناقتى ۇسىنىستار جاسادى. حالىقارالىق ۇيىمنىڭ بەدەلىن كوتەرەتىن ۇلكەن ىستەر. قازاقستان پرەزيدەنتى سوندايلارعا باتىل كىرىسۋ قاجەتتىگىن اتادى. ءوز باسىم ولاردىڭ ءبارى دە ورىندى دەپ بىلەمىن. ال ەندى سەسسيا جۇمىسىنىڭ ۇيىمداستىرىلۋى تۋرالى ايتاتىن بولسام, ول جوعارى دەڭگەيدە ءوتىپ جاتىر دەپ ايتۋعا بولادى. دەلەگا­تسيالارعا بارلىق جاعدايلار جاسالعان. تەحنيكالىق قىزمەتكەرلەر ءۇزىلىسسىز قىزمەت كورسەتۋدە. قوناق ۇيدە دە, قالا ىشىندە دە وسىنداي جاعدايلار جاسالعان. استانا قالاسى دا اسەم شاھارلاردىڭ ءبىرى ەكەن, ماعان ول وتە ۇنادى. رافاەل سەگۋيز, (فيليپپين): – مەن يسلام كونفەرەنتسياسى ۇيىمىنىڭ جۇمىسىنا بىرنەشە رەت قاتىستىم. وندا الەمدىك احۋالدى جاقسارتۋ جونىندە جاقسى ويلار ايتىلادى. بىراق ۇيىم ايماعىنا ەنەتىن كەيبىر ەلدەر ونىڭ شەشىمدەرىن ورىندامايدى. استانا قالاسىندا ءوتىپ جاتقان سەسسيادا دا جاقسى ويلار ايتىلدى. جاڭا توراعانىڭ دا ءسوزىن ەستىدىك. ول ءوزارا ىنتىماقتاستىقتى ارتتىرۋ اياسىندا بىرنەشە ۇسىنىستار جاسادى. ءبارى دە ورىندى. ماعان قازاقستان توراعالىعىنىڭ, اسىرەسە, ەكولوگيالىق احۋالدى جاقسارتۋ جونىندەگى ماسەلەنى ۇلكەن باستامالاردىڭ بىرىنە قويعانى ۇنادى. ەكولوگيالىق اپات ەشقاشاندا ەستەن شىقپاۋ كەرەك. ماعان قازاق ەلى ۇنادى, حالقى دوس كوڭىلدى, قوناقجايلىلىق كورسەتىپ وتىردى. قايناربەك توحتومىشەۆ, (قىرعىزستان): – الەمدىك ۇيىمنىڭ جيىنى بىزبەن تۋىسقان قازاق ەلىندە ءوتىپ جاتقانىنا قۋانىشتىمىن. سەسسيا جۇمىسىن وتكىزۋ جوعارى دەڭگەيدە ۇيىم­داس­تىرىلعان. پرەزيدەنت نۇرسۇلتان نازارباەۆتىڭ ءسوزى قازاقستاننىڭ ۇيىم جۇمىسىنا ۇلكەن مۇددەلىلىك تانىتاتىنىن كورسەتتى. مەن وسى مۇمكىنشىلىكتى پايدالانىپ, ءسىزدىڭ گازەت ارقىلى قازاقستاندى يىۇ توراعالىعىنا سايلانۋىمەن قۇتتىقتايمىن. قازاق­ستاندىق توراعالىق الەمدە قيىن جاعداي ورناپ تۇرعان كەزدە وتەدى. اسىرەسە, تاياۋ شىعىس پەن سولتۇستىك افريكانىڭ مۇسىلمان ەلدەرىندەگى جاعداي قازىر قاتتى ۋشىعىپ تۇر. سويلەگەن دەلەگاتسيا مۇشەلەرىنىڭ ءبارى دە وسىعان كوڭىل اۋدارىپ, جاعدايدى قالپىنا كەلتىرۋ قاجەتتىگىن اۋىزعا الىپ جاتتى. مەنىڭشە, قازاقستان ءوز تاراپىنان جاعدايدىڭ تۇراقتانۋىنا وڭ ىقپال ەتەر دەگەن ۇمىتتەمىن.