20 مىڭ تەرەك وتىرعىزعان قانداسىمىزدىڭ باستاماسىن اۋىلداستارى قولداپ وتىر

سىرت جۇرتتاعى قانداستارى­مىز اتامەكەنىنە كوش كەرۋەنىن تۇزەگەن ساتتەن بەرىدە ەكى ون جىل­دىق ارتتا قالىپتى. ءۇمىت­تە­رىن ۇكىلەگەن سول وتباسى­لا­رىن­دا دۇنيەگە كەلگەن نارەستە دە جيىرمانىڭ جالىنا قول سالعان. ولار ەلىم دەپ ەمىرەنەدى. قازاقستاننىڭ تەڭ قۇقىلى ازاماتى اتانىپ, وقىپ, ءبىلىم الۋدا. وسىنداي قانداس­تا­رى­مىز­دىڭ ءبىرى سەرىكباي مارال­بەكتىڭ جەتىسۋ جەرىنە كەلگەنىنە التى جىل. ول اتا جۇرتقا كەلىسىمەن بەل شەشىپ ەڭبەك ەتتى. «ما­عان نە بەرەسىڭ؟» دەمەدى. كەرىسىنشە, اۋىلدى گۇلدەندىرۋگە كىرىستى. بيىل مەرەكەلى جىل. دەمەك, وعان ۇلەس قوسۋ ءۇشىن «20 جىل­دىق­قا – 20 مىڭ اعاش» دەگەن باس­تامامەن ەڭبەكشىقازاق اۋدا­نى قىزىلشارىق اۋىلىنا ءوز قارجىسىنا 20 مىڭ ءتۇپ  تەرەك ەكتى. القاپتاعى قاز قاتار وتىر­عىزىلعان كوشەتتەر قازىر جاي­قا­لىپ تۇر. اۋىل اكىمدىگى مەن تۇرعىندار دا قولداۋ ءبىلدىرىپ, تەرەك وتىرعىزىلعان القاپتى بولاشاقتا ساياباققا اينالدىرۋ جونىندەگى تۇجىرىمعا كەلگەن. كەزىندە كۇل-قوقىس ۇيىلگەن اۋىل شەتىندەگى كۇرەسىندى تازار­تىپ, قوقىستاردى شىعارىپ, جەردى تەگىستەپ, 20 مىڭ ءتۇپ كوك تەرەكپەن كومكەرگەن ول جاس وسكىندەردى قىتايدان ارنايى اكەلىپتى. – وتىرعىزىلعان جاس تەرەكتەردى قىتايدان ارنايى قول دورباعا سالىپ اكەلدىم. جولدا كەدەنشىلەر توقتاتىپ, مىنا «وتىن­دى» قايدا اپارا جاتىرسىڭ, دەدى. مەن ولارعا ەلىمدى گۇلدەن­دى­رەيىن دەگەن نيەتىمدى ايتتىم. وندا ەڭبەگىڭىز جانسىن دەدى ولار. مىنا جايقالعان اعاش سانى 20 مىڭنان دا كوپ, – دەيدى قىزىل­شا­رىق اۋىلىنىڭ تۇرعىنى سەرىكباي. تەرەكتى ءوسىرۋدىڭ دە وزىندىك قىر-سىرى بار. ماسەلەن, قاۋلاي وسكەن  جاپىراقتارىن ج ۇلىپ, تا­مىر الۋىنا مۇمكىندىك بەرۋ كەرەك. قىتايدان جەتكىزىلگەندە بىرەر قارىس كوشەتتەر كۇتىپ باپتاۋدىڭ ارقاسىندا ءۇش جىلدا بيىكتەپ, كادىمگى تەرەككە اينالىپتى. جا­سىل جەلەك جاپىراق جايعان. كو­لەڭ­كەسى دە ەداۋىر. بالالار ارا­سىن­دا اسىر سالىپ ويناۋدا. قان­داسىمىزدىڭ بۇل يگىلىكتى ءىسى ەل تاۋەلسىزدىگىنىڭ 20 جىلدى­عىنا ارنالعان جەكە سىيى ەكەنىن دە ايتا كەتكەن ءجون. بۇگىندە سەرىكبايدىڭ باستا­ما­سىن اۋىل اكىمى مەن اۋىل­داس­تارى جالعاستىرىپ اكەتتى. ءويت­كەنى, بولاشاقتا جاستار مەن قارت­تار وسىندا كەلىپ, كولەڭ­كە­سىندە دەم السا, ريزاشىلىعىن ءبىل­دىرسە, بۇدان ارتىق قۋانىش جوق. سونداي-اق ەل مەرەيىنە تار­تۋدى اعاش وسىرۋدەن باستاعانىن ءبارى دە ناتيجەلى ءىس دەپ باعالاۋدا. – تۋعان جەردى, ەلىمىزدى كور­كەي­تۋ, سول جولدا تەر توگۋ ءبارى­مىزگە ورتاق مىندەت. سەرىكبايعا ريزا بولىپ, وعان قولداۋ كور­سەتىپ, ۇلەسىمىزدى قوسايىق دەپ وتىرمىز, – دەيدى قىزىلشارىق اۋىلىنىڭ تۇرعىنى ەمبەرگەن جەكسەنوۆ. اۋىل اكىمدىگى مەن كاسىپ­كەر­لەر دە قاراپ قالعان جوق. ەندى ولار 20 مىڭ ءتۇپ اعاش وتىر­عى­زىلعان جەردى ساياباققا اينال­دى­رۋ ءۇشىن ىسكە كىرىسكەن. حالىق دەمالاتىن ورىندىقتار قويۋ جانە تاعى باسقا مادەني شارالار قولعا الىنباقشى. تاۋەل­سىزدىكتىڭ 20 جىلدىعىنا – 20 مىڭ ءتۇپ اعاشتى ءبىر ءوزى ەككەن سەرىكباي كەلەر جىلى تاعى دا وسىنشاما اعاش كوشەتتەرىن وتىرعىزۋدى جوسپارلاپ وتىر. كۇمىسجان بايجان, الماتى وبلىسى.