جاستارعا سەنىم زور

مالايزيانىڭ پەنانگ قالاسىندا اۋىر اتلەتيكادان 20 جاسقا دەيىنگى جاسوسپىرىمدەر اراسىنداعى الەم بىرىنشىلىگى جالاۋىن كوتەرەدى. الەمنىڭ ءار تۇكپىرىنەن جينالعان جاستاردىڭ ءدۇبىرلى دوداسىندا قازاقستان قۇراماسى دا باق سىنايدى. ەلىمىزدىڭ باس كومانداسىندا سپورتتىڭ بۇل ءتۇرى بويىنشا الەم چەمپيوناتى مەن وليمپيا ويىن­دارىندا ولجا سالعاندار كوپتەپ سانالادى. ەندى, مىنە, سول ساڭلاقتاردىڭ جولىن جالعاس­تىرۋ قۇرمەتىنە جاس ورەندەر يە بولىپ وتىر. جالپى, ءبىزدىڭ زىلتەمىرشىلەردىڭ اراسىندا جاستاردىڭ ءتۇرلى حالىقارالىق جارىستاردا جاسىنداي جارقىراپ جۇرگەنىن كورۋگە بولادى. ءبىزدىڭ سوڭعى بەس-التى جىلعى ناتيجەلەرىمىز وسىنى كورسەتىپ وتىر. وسى كۇندەرى ەلىمىزدىڭ ماقتانىشىنا اينالعان, وليمپيادا چەمپيونى يليا يلين 2005 جانە 2006 جىلدارى جاسوسپىرىمدەر اراسىن­دا الەم چەمپيونى اتانعان بولاتىن. ءار جىل­دارى سول جارىستاردا رومان رۋسيانوۆسكي, ۆلاديمير سەدوۆ, قۋانىش راحاتوۆ, يبراگيم بەرسانوۆ, نادەجدا نوگاي, ادىلبەك بالقاەۆ سىندى ءبىر شوعىر ورەندەر اتوي سال­دى. جوعارىدا اتالعان كەيبىر سپورتشى­لارىمىزدىڭ جاساعان رەكوردتارى ءالى كۇنگە دەيىن جاڭارماي, كۇشىندە تۇر. ءجاسوسپى­رىم­دەردىڭ اراسىنداعى ەڭ ۇلكەن باسەكە – بىلتىرعى جىلعى دۇنيەجۇزىلىك وليمپيادادا قازاقستان قۇراماسى 1 التىن, 1 كۇمىس جانە 1 قولا مەدالدى جەڭىپ الىپ, ايدى اسپانعا شىعاردى. بۇل باسەكەدە جازيرا جاپارقۇل التىننان القا تاعىنسا, ءزۇلفيا چينشانلو مەن رۇستەم سىباي جۇلدەگەرلەر ساناتىنا قوسىلدى. ولاردىڭ دا كورسەتكىشتەرى كوپشىلىك كوڭىلىنەن شىقتى. مالايزياداعى جارىسقا قازاقستاننىڭ ءۇز­دىك 15 زىلتەمىرشىسى اتتاندى. قىزدار سايى­سىندا مارگاريتا ەليسەەۆا (53 كيلو), فاينا سىبانباەۆا (58 كيلو), كارينا گوريچەۆا (63 كيلو), اناستاسيا شۆاباۋەر (63 كيلو), جازيرا جاپاركۇل (69 كيلو), اننا نۇرماعامبەتوۆا (75 كيلو) جانە نادەجدا نوگاي ( 75 كيلودان جوعارى) كۇش سىناسادى. ەرلەر اراسىندا ەربول جولامانوۆ (56 كگ.), الەكساندر ابراموۆ (56 كگ.), الەكساندر كيم (69 كگ.), نۇرسۇلتان راحاتوۆ (77 كگ.), ەربول مەيىرمانوۆ (85 كگ.), رۇستەم سىباي (85 كگ.), الەكساندر زايچيكوۆ (94 كگ.) جانە يبراگيم بەرسانوۆ (105 كگ.) ونەر كورسەتەدى. – بىزدەر بۇل جارىستا كەمىندە ەكى التىن الۋعا ءتيىسپىز. بۇل رەتتە باپكەرلەردىڭ تاراپى­نان الەكساندر زايچيكوۆ پەن نادەجدا نوگاي­دىڭ مۇمكىندىگى جوعارى باعالانۋدا. سونىمەن قاتار, جازيرا جاپارقۇل مەن يبارگيم بەر­سانوۆ­قا دا زور سەنىم ارتىلىپ وتىر. باسقا سپورتشىلارىمىز دا مالايزياعا جاي تۋريست رەتىندە بارا جاتقان جوق. جارىس جو­لىن­دا ولار دا جانكەشتىلىك تانىتىپ, قازاق­ستان قۇراماسىنىڭ قورجىنىن تولتىرۋ ءۇشىن بارىنشا كۇش سالادى. ءسوز ورايى كەلگەندە, ءبىزدىڭ سپورتشىلاردىڭ الەم بىرىنشىلىگىنە ەش الاڭسىز دايارلانۋىنا تۋريزم جانە سپورت مينيسترلىگى, رەسپۋبليكا اۋىر اتلەتيكا فەدەراتسياسى, «سامۇرىق-قازىنا» ءال-اۋقات قورى بارىنشا قولاۋ كورسەتتى, – دەيدى مەملەكەتتىك جاتتىقتىرۋشى مەڭدىحان ءتاپسىر ۇلى. بىلىكتى باپكەردىڭ ويىنىڭ ىسكە اساتىنى ءسوزسىز. ويتكەنى, جوعارىدا اتالعان ءۇش سپورتشىنىڭ ۇشەۋى دە كوپتەگەن جارىس­تاردا وزدەرىن جاقسى قىرىنان كورسەتىپ, زور تابىستارعا جەتكەن. ماسەلەن, يبراگيم بەرسانوۆ جاسوسپىرىمدەر اراسىنداعى بىل­تىرعى جىلعى الەم چەمپيونى. الەكساندر زايچيكوۆ سول جارىستا ءۇشىنشى ساتىعا تابان تىرەدى. نادەجدا – بيىل پەرۋدىڭ ليما قالاسىندا وتكەن 17 جاسقا دەيىنگىلەردىڭ الەم بىرىنشىلىگىندە التىننان القا تاعى­نىپ, ءۇش رەت الەمدىك رەكوردقا وزگەرىس ەنگىزدى. جازيرا – وتكەن جىلعى ءجاسوسپىرىم­دەردىڭ دۇنيەجۇزى­لىك وليمپياداسىنىڭ جەڭىمپازى. بۇدان باسقا, دۇنيەجۇزىلىك وليمپيادادا قولا مەدالدى ەنشىلەگەن رۇستەم سىباي مەن ازيا چەمپيونى اناستاسيا شۆاباۋەردى دە بولە-جارا اتاعان ءجون. باسقا سپورتشىلاردى دا وسال دەپ ايتۋعا بولماس. ولاردىڭ بارلىعى دا ەلىشىلىك جارىستاردا جۇلدە الىپ جۇرگەن اسا دارىندى اۋىر اتلەتتەر. داستان كەنجالين.