وتان دەگەن ۇلى كۇش, بەرىك قورعان

قوستانايدا قازاقستان پات­ريوتتارىنىڭ فورۋمى وتكەندە دەلەگاتتار وسىنداعى ۋنيۆەرسيتەت الدىندا ۇلت ۇستازى احاڭا – احمەت بايتۇرسىنوۆقا ورناتىلعان ەسكەرتكىشكە گۇل شوقتارىن قويىپ تاعزىم ەتتى. قازاق ءوزىنىڭ تاريحىندا نەبىر زوبالاڭدى باسىنان كەشتى. 1915 جىلى وسى احاڭ ء“الحامدۋلللا, ءبىزدىڭ قازاق التى ميلليونعا جەتتى” دەپ قۇدايعا شۇكىرشىلىك ەتكەن ەكەن. زامانا جەلى ءبىر اي­نالىپ سوققاندا قازاق دالا­سى­نا كەلگەن اشتىق ەلدى قىناداي قىرىپ كەتتى. مۇنى كەڭەس وكى­مەتى قولدان جاسادى دەۋگە ءاب­دەن بولادى. اينالدىرعان جيىر­ما جىلدىڭ ىشىندە اش­تىقتىڭ سوڭىن ۇسكىرىك بولىپ ۇرعان رەپرەسسيا ۇلتىمىزدىڭ قايماعىن سىپىرىپ الدى. ەلدە قازاق ەكى ميلليونعا جەتپەيتىندەي كەزەڭگە تۇستىك. “قازاقتى ەشكىمگە بودان قىلمايمىز, جەكە ەل بولامىز” دەپ ارمانداعان الاش بوزداق­تارى كەڭەستىك قاندى ءماشي­نە­نىڭ شەڭگەلىنە ىلىككەندە قايران احاڭ ء“بارىمىز بىردەي وپات بولمايىق, ەرتەڭ دە ءىسىمىزدى جال­عاستىرار رۋحى مىقتى ازاماتتار كەرەك”, دەپ مۇحتار اۋەزوۆ باس­تاعان زيالى­لارى­مىزدى ساقتاپ قالۋدىڭ بار اما­لىن جاساعان. وزگەگە بودان بولۋدان, موي­ىن­عا قامىت ىلۋدەن, ءوز ەركى وزىندە بولماۋىنان قازاق وسىنداي ازاپ شەككەن. احاڭنىڭ ەسكەرتكىشىنىڭ ءتۇبىن­دە مۇحتار اۋەزوۆتىڭ: “ەل بولا­مىن دەسەڭ بەسىگىڭدى تۇزە”, دەگەن اتالى ءسوزىن ەسكە الىپ تۇرىپ, سول ۇلى ماقساتتىڭ ورىندالىپ كەلە جاتقانىنا قۋاندىق. ەل ءوستى. وشكەننىڭ ورنى جان­دى. بودان كەزىندە قىناداي قى­رىلعان قازاق تاۋەلسىزدىگىنىڭ 20 جىلدىعىندا الەمدەگى جەتەكشى ەلدەردىڭ بىرىنە اينالدى. كورشى ەلدەر قازاقستانعا قاراپ بوي ءتۇ­زەيتىن بولدى. “قازاق بولۋ باقىت قوي” دەگەندى ەستىپ ءجۇرمىز. وسى­نىڭ بارىنە كوشباسشىمىز, ەل­با­سىمىزدىڭ سىندارلى سايا­سا­­تى­نىڭ ارقاسىندا جەتتىك. قوستانايداعى فورۋمدا وسى­­نىڭ ءبارى وي ەلەگىنەن وتكى­زىلدى. ءجۇ­رەك تەربەيتىن سوزدەر ايتىل­دى. مەملەكەتتىك ءرامىز­دەر ۇلىق­تال­دى, ولاردىڭ اۆ­تور­لارىمەن كەزدەسۋلەر وتكى­زىلدى. كوپشىلىككە جاريا ەتىلمەگەن كەدەرگىلەر جايىندا دا ەستىدىك. تاۋەلسىزدىك قازاققا وڭاي كەل­گەن جوق. بۇگىنگى جاستار وسى­نى تەرەڭ ءتۇسىنۋى كەرەك. ء“بىز پاتريوت­پىز” دەگەن جالاڭ ايقاي, داۋرىق­پا ۇرانمەن جۇرت وتانشىل بولىپ كەتپەيدى. قا­زاق­ستاندى قازاقتان بولەك وسىن­دا جايلاعان ەتنوس وكىلدەرى دە شىن جۇرەگىمەن مەم­لەكەتىم دەپ قابىلداپ, ءجۇ­رەگىمەن ءسۇيۋى كەرەك. ارداگەر ۇرپاق, مىنا بىزدەر, ءبىزدىڭ قاتارىمىز اقىل ايتىپ قانا قويماي, ءوز ىسىمىزبەن ۇلگى بولۋىمىز كەرەك دەپ ويلايمىن. قوستانايداعى فورۋم مىڭ­داعان جۇرەكتەردىڭ ءوز وتانىنا دەگەن ماحابباتىن ەسەلەدى, ءوز وتانىنداي قىمبات اتامەكەن ەش جەردە بولمايتىندىعىن ءتۇسىندىردى دەپ ويلايمىن. جەڭىسبەك ماۋلەنقۇلوۆ, وبلىستىق ارداگەرلەر كەڭەسىنىڭ توراعاسى, فورۋم دەلەگاتى. شىمكەنت.