ءبىزدىڭ سىبايلاس جەمقورلىقپەن كۇرەسىمىزدىڭ ءوزى ءبىر ەسەپتەن العاندا وسى «قارا قۇردىمدى» ەسكە سالاتىنداي. كۇرەس ونداعان جىلدان بەرى اياۋسىز جۇرگىزىلىپ جاتىر. بىراق جەمقورلىقتىڭ تىيلاتىن ءتۇرى جوق. نەگە؟ ويتكەنى, كۇرەس كۇشەيگەنىمەن, جەمقورلىقتىڭ ءوزى دە جىل وتكەن سايىن دامىپ, جاڭاعى «قارا قۇردىم» سەكىلدى كۇرەس ناتيجەلەرىن جالماپ جۇتىپ جاتقان سەكىلدى. سونىمەن, قۇدىرەتتى «قارا قۇردىمنىڭ» الدىندا ەشتەمەنىڭ بايانسىز بولىپ شىعاتىندىعىن ايتىپ, فيزيكتەر دارمەنسىزدىك تانىتسا, تەرەڭ تامىر جايىپ العان سىبايلاس جەمقورلىقپەن كۇرەستە ءبىزدىڭ قۇقىق قورعاۋ ورگاندارى دا پۇشايمان كۇي تانىتاتىن سەكىلدى. ويتكەنى, سىبايلاس جەمقورلىقتىڭ قۇرباندىقتارى بار, بىراق ونىڭ ناتيجەلەرى بايقالا بەرمەيدى. بالكىم, مىنانشا قىلمىسكەردى ۇستادىق, مىنانشا ميلليون تەڭگەنى مەملەكەتكە قايتاردىق دەگەن تسيفرلار بار بولار. بىراق ونىڭ ادام ساناسىنا اسەر ەتەتىندەي, سانانى سىلكىندىرىپ, اردى تازالايتىنداي ناتيجەلەرى بولماي وتىرعانى شىندىق.
ءبىزدىڭ ويىمىزشا, سىبايلاس جەمقورلىقپەن كۇرەستە ءبىز كەشەگى كەڭەستىك يدەولوگيانىڭ وزىق تاسىلدەرىن پايدالانۋىمىز كەرەك. قوعامعا قاتىسى بار بەلگىلى ءبىر اۋقىمدى ساياسي ناۋقاندى ۇيىمداستىرعاندا كەڭەس يدەولوگتارى قايتۋشى ەدى؟ الدىمەن جاقسى ادامدى, جاقسى وبرازدى ىزدەپ تاۋىپ, سونى قوعامعا ۇلگى ەتەتىن. جاماندىقتى جاقسىلىققا قاراي بۇرۋعا تىرىساتىن. وسىدان بارىپ جاقسىلىق پەن جاماندىقتىڭ, ادالدىق پەن ارامدىقتىڭ اراسى الشاقتاپ, ادامدار وسى ەكەۋىنىڭ بىرەۋىن تاڭداۋعا ءماجبۇر بولاتىن.
ەندەشە بىزگە دە سىبايلاس جەمقورلىقپەن كۇرەستى يدەولوگيالىق تۇرعىدان العاندا ادالدىق پەن ارامدىقتىڭ كۇرەسى رەتىندە قۇرۋ كەرەك. ول ءۇشىن قوعامداعى ادال ادامداردى تاۋىپ,
سولاردى ناسيحاتتاۋىمىز كەرەك. مۇنىمەن دە تىنباي, ادال ادامدارعا ساياسي تۇرعىدان دا, يدەولوگيالىق تۇرعىدان دا, ەكونوميكالىق تۇرعىدان دا ارتىقشىلىقتار بەرۋگە ۇمتىلۋىمىز كەرەك. ەلىمىزدىڭ كادر ساياساتىندا ادالدىق ەڭ ءبىرىنشى ولشەمگە اينالۋى ءتيىس. قىزمەت بابىندا ادال ادامدار ءوسسىن. ول ادال ادامدار اينالاسىنا ادال جاستاردى شوعىرلاندىرىپ, قوعامعا مەملەكەتتىك قىزمەتكە بەرىلگەندىكتىڭ تازا ۇلگىسىن ۇسىناتىن بولادى. ال ادالدىقتىڭ تۋى جوعارى كوتەرىلگەن كەزدە ارامدىقتىڭ قۇتى وزىنەن ءوزى قاشاتىندىعى تۇسىنىكتى. مىنە, سىبايلاس جەمقورلىقتى ءبىز وسىلاي عانا جەڭە الامىز.
ەگەر شىن نيەت بولسا, نەگىزىندە ادال ادامدارى ىزدەپ تابۋ قيىن ەمەس. ولار سويلەگەن سوزىمەن, ءىس-ارەكەتىمەن وزىنەن ءوزى كورىنىپ تۇرادى. ونان كەيىن ونىڭ اينالاسىنداعى قوعامدىق پىكىرگە قۇلاق تۇرسەڭىز بولدى. سىزگە كىمنىڭ كىم ەكەندىگىن اشىپ بەرەدى. جالپى, فيلوسوفتاردىڭ سوزىنە قاراعاندا, حالىق دەگەنىمىز – ۇيىمداسپاعان كوپشىلىك. وسى ۇيىمداسپاۋىنىڭ سالدارىنان ول توبىرلىق دەڭگەيگە دەيىن ءتۇسىپ كەتۋى مۇمكىن. ياعني, اراسىنان مىقتى ءبىر كوشباسشى شىقپاسا, حالىق ءبىر ىسكە جۇمىلا الماۋى نەمەسە ءجيى قاتەلىكتەرگە ۇرىنۋى مۇمكىن. بىراق, تاعى دا سول فيلوسوفتاردىڭ ايتۋى بويىنشا, ۇيىمداسپاعان حالىق كوپ جاعدايدا ءبىر نارسەدەن – تاريحي جەكە تۇلعاعا باعا بەرۋدەن قاتەلەسپەيدى ەكەن. مىنە, سوندىقتان دا اۋمالى-توكپەلى تاريحتىڭ قاي كەزەڭىندە بولماسىن جەكە تۇلعاعا قاتىستى ساراپشىنىڭ دا, تاريحشىنىڭ دا ەمەس, فيلوسوفتىڭ دا, اقىن مەن جازۋشىنىڭ دا ەمەس, تەك حالىقتىڭ بەرگەن باعاسى عانا تۇپكىلىكتى باعا بولىپ ەسەپتەلەدى.
ەندەشە, سىبايلاس جەمقورلىقپەن كۇرەستە ادال ادامداردى ىزدەستىرگەنىمىزدە, ءبىز ول ادامدار تۋرالى حالىقتىڭ بەرگەن باعاسىمەن ساناسىپ وتىرۋعا ءتيىستىمىز. سوندا كوپ قاتەلەسپەيتىن بولامىز.
سۇڭعات الىپباي,
«ەگەمەن قازاقستان»
