ءىسساپار كەزىندە ا.مامين تۇرىكمەنستان پرەزيدەنتى گ.بەردىمۇحامەدوۆپەن كەزدەسىپ, ەكونوميكا, عىلىمي-تەحنيكا جانە مادەني ىنتىماقتاستىق جونىندەگى قازاقستان-تۇرىكمەنستان ۇكىمەتارالىق كوميسسياسىنىڭ 9-شى وتىرىسىنا قاتىستى.
پرەزيدەنت گ.بەردىمۇحامەدوۆپەن اڭگىمەلەسۋ بارىسىندا ەكى ەل اراسىنداعى ساۋدا-ەكونوميكالىق بايلانىستاردىڭ بارلىق سپەكترلەرى بويىنشا ىنتىماقتاستىقتىڭ پەرسپەكتيۆالارى تالقىلاندى.
قر پرەمەر-ءمينيسترىنىڭ ءبىرىنشى ورىنباسارى ا.مامين ۇاك وتىرىسى تۇرىكمەنستان پرەزيدەنتىنىڭ 18-19 ءساۋىر كۇندەرى قازاقستانعا جاساعان مەملەكەتتىك ساپارىنان كەيىن بىردەن وتكىزىلىپ وتىرعانىن ايتتى. بۇل ساپار ىنتىماقتاستىقتى تەرەڭدەتىپ, ءارى قاراي دامۋعا زور سەرپىن بەردى.
تاراپتار كولىك ينفراقۇرىلىمى مەن ورتاق شەكارانىڭ بولۋى, ەكى مەملەكەت اراسىندا ءوزارا ءتيىمدى ىنتىماقتاستىق ورناتۋعا مۇمكىندىك بەرەتىنىن جانە ەكىجاقتى ساۋدانى دامىتۋعا بار كۇش-جىگەرىمىزدى جۇمساۋ كەرەكتىگىن اتاپ ءوتتى.
2016 جىلى سىرتقى ساۋدا اينالىمى 2015 جىلمەن سالىستىرعاندا 59%-عا ۇلعايىپ, 283,5 ملن اقش دوللارىن قۇرادى.
تاراپتار تۇرىكمەنستان پرەزيدەنتىنىڭ قازاقستانعا جاساعان مەملەكەتتىك ساپارى اياسىندا جوعارى دەڭگەيدە قول جەتكىزىلگەن ۋاعدالاستىقتاردى, ونىڭ ىشىندە ورتا مەرزىمدى پەرسپەكتيۆادا تاۋار اينالىمىن 1 ملرد اقش دوللارىنا دەيىن جەتكىزۋ قاجەتتىگىن باسا ايتتى.
تۇرىكمەنستان پرەزيدەنتى گ.بەردىمۇحامەدوۆ استانادا وتەتىن «ەكسپو-2017» مامانداندىرىلعان كورمەسىنە بەلسەنە قاتىسۋعا نيەتتى ەكەنىن ءبىلدىردى.
ءدال سول كۇنى اشحابادتا قر پرەمەر-ءمينيسترىنىڭ ءبىرىنشى ورىنباسارى ا.مامين مەن تۇرىكمەنستاننىڭ مينيسترلەر كابينەتى توراعاسىنىڭ ورىنباسارى ب.اننامەرەدوۆتىڭ توراعالىعىمەن ەكونوميكا, عىلىمي-تەحنيكالىق جانە مادەني ىنتىماقتاستىق جونىندەگى قازاقستان-تۇرىكمەنستان ۇكىمەتارالىق كوميسسياسىنىڭ 9-شى وتىرىسى ءوتتى.
ۇاك-ءنىڭ 9-شى وتىرىسىنىڭ قاتىسۋشىلارى بۇرىن قول جەتكىزىلگەن ۋاعدالاستىقتاردىڭ جۇزەگە اسىرىلۋىن تالقىلاپ, وتىن-ەنەرگەتيكا سەكتورى, كولىكتىك-كوممۋنيكاتسيالىق, عارىش سالاسى, اۋىل شارۋاشىلىعى, قورشاعان ورتانى قورعاۋ, ءبىلىم جانە مادەنيەت سالالارىندا ىنتىماقتاستىقتى ودان ءارى دامىتۋدىڭ ناقتى شارالارىن اتاپ ءوتتى.
وتىرىستا ساۋدا-ەكونوميكالىق بايلانىستار, ەكسپورتتىق-يمپورتتىق وپەراتسيالار كولەمىن ۇلعايتۋ, جەتكىزىلەتىن تاۋارلار مەن كورسەتىلەتىن قىزمەتتەر كولەمىن ارتتىرىپ, نومەنكلاتۋراسىن كەڭەيتۋ ارقىلى ەكونوميكالىق ىنتىماقتاستىقتى نىعايتىپ, قولدانىستاعى شارتتىق-قۇقىقتىق بازانى جەتىلدىرۋ قاجەتتىلىگى ايتىلدى.
قازاقستاندىق كومپانيالاردىڭ اشحاباد – اۋعانستان شەكاراسىنداعى جول ۋچاسكەسىنىڭ قۇرىلىسىنا قاتىسۋعا, 243 شاقىرىمدى قۇرايتىن (31,6 توننا رەلس, باعىتتاۋىش بۇرمالار) تۇركمەناباد – مارى تەمىرجول ۋچاسكەسىن جاڭعىرتۋعا, سونداي-اق فاراپ قالاسىنداعى رەلس-دانەكەرلەۋ كاسىپورنى مەن سەردار قالاسىنداعى ۆاگون جوندەۋ زاۋىتىن جاڭعىرتۋعا قاتىسۋ تۋرالى الدىن الا ۋاعدالاستىققا قول جەتكىزىلدى.
بۇدان بولەك, تاراپتار تۇرىكمەنستان ءۇشىن عارىش اپپاراتتارىنىڭ قۇرىلىس جوباسىن تالقىلاپ, عارىش سالاسىندا مامانداردى دايارلاۋ تۋرالى, ماڭعىستاۋ وبلىسى مەن بالقان ءۋالاياتىندا شەكارالاس ساۋدا ايماعىن قۇرۋ, ارالدى قۇتقارۋ حالىقارالىق ۇيىمى اياسىندا ىنتىماقتاستىقتى نىعايتۋ جايىندا ءسوز قوزعادى.
وتىرىس قورىتىندىسى بويىنشا حاتتاما قابىلداندى.
