حالىققا قىزمەت كورسەتۋدە ولقىلىقتار كوپ

كەشە بايلانىس جانە اقپارات مينيسترلىگىندە مينيستر اسقار جۇماعاليەۆ حالىققا قىزمەت كور­سەتۋ ورتالىقتارى باسشى­لارى­مەن جينالىس وتكىزدى. باسقوسۋدا كوتەرىلگەن باستى ماسەلەنىڭ ءبىرى بيىلعى جىلدىڭ ناۋرىز ايىندا بايلانىس جانە اقپارات مي­نيستر­لىگىنىڭ قاراماعىنا بەرىلگەن حقكو-لاردىڭ جۇمىسىن جاڭ­عىرتۋ جانە جەتىلدىرۋ بولدى. «مەملەكەت باسشىسى ن.ءا.نا­زارباەۆ ءبىزدىڭ مينيسترلىككە حا­لىققا قىزمەت كورسەتۋ ورتا­لىق­تا­رىنىڭ جۇمىسىن جەتىلدىرۋدى, حالىققا ساپالى مەملەكەتتىك قىز­مەت كورسەتۋ ءىسىن قاداعالاۋدى, سىبايلاس جەمقورلىقتىڭ الدىن الۋدى, مەملەكەتتىك قىزمەتتەردى اۆتوماتتاندىرۋ ماسەلەلەرىن تەزدەتۋدى تاپسىردى», – دەدى جينا­لىس­تى اشا وتىرىپ مينيستر اسقار جۇماعاليەۆ. قازىرگى كۇنى ازاماتتاردىڭ حقكو قىزمەتكەرلەرىنىڭ قىزمەت كورسەتۋ ساپاسىنا جانە قىزمەتتى ۇسىنۋشى مەملەكەتتىك ورگان­دار­دىڭ جۇمىسىنا كوڭىلدەرى تول­مايدى. ويتكەنى, ازاماتتار مەن مەملەكەتتىك ورگاندار اراسىن­دا­عى توسقاۋىلدار مەن سىبايلاس جەم­قورلىق تۇپكىلىكتى جويىلماي وتىر. ازاماتتاردى اقپاراتتان­دى­رۋ مەن ۇسىنىلعان قىزمەت كور­سەتۋلەردىڭ ساپاسىن باقىلاۋ جۇ­مىس­تارىنا ساراپتاما جۇرگىزىل­مەي­دى. قىزمەت كورسەتۋلەردىڭ بيز­نەس-ۇدەرىستەرى وڭتايلان­دى­رىل­ما­عان. وسىعان وراي ۆيتسە-مينيستر ساكەن سارسەنوۆ ءوزىنىڭ بايان­داما­سىندا اتالعان سالانى جەتىلدىرۋدىڭ باستى باعىتتارىن انىقتاپ بەردى. اعىمداعى جىلدىڭ سوڭىنا دەيىن تۇرعىنداردى تىركەۋ, جەكە كۋا­لىكتەر مەن تولقۇجاتتار بەرۋ قىزمەتتەرى وڭتايلاندىرىلماق. مينيسترلىكتىڭ حقكو جۇمى­سىن ۇيلەستىرۋ جانە مەملەكەتتىك قىزمەتتەردى اۆتوماتتاندىرۋدى باقىلاۋ جونىندەگى كوميتەتى حا­لىققا قىزمەت كورسەتۋ ورتالىق­تا­رىنىڭ پەرسونالمەن جۇمىسىنا باستى نازار اۋدارماق. ۆيتسە-مي­نيستر س.سارسەنوۆتىڭ ايتۋىنشا, Mystery shoping («قۇپيا ساتىپ الۋشى») اكتسياسى تۇراقتى تۇردە ۇيىمداستىرىلماق. بۇل اكتسيا­نىڭ ماقساتى جەرگىلىكتى جەرلەردەگى احۋالدى ناقتى باعالاۋ ءۇشىن پىكىرلەر جيناۋ بولىپ تابىلادى. بۇعان قوسا ازاماتتار ينتەرنەت جەلىسى مەن سمس حابارلارى ار­قى­لى قىزمەت كورسەتۋلەردىڭ ورىن­دالۋىنا باقىلاۋ جۇرگىزە الادى. سونداي-اق 1414 Call-ورتالى­عى­نىڭ وپەراتورلارى ەلەكتروندى ۇكىمەت جۇمىسىمەن قاتار, حا­لىق­قا قىزمەت كورسەتۋ ورتا­لىق­تا­رى­نىڭ جۇمىسى تۋرالى دا اقپا­رات­تىق كەڭەستەر بەرەدى جانە سەنىم تەلەفوندارى ورناتىلاتىن بولادى. حقكو-داعى ۇزىن-سونار كەزەكتەر ازاماتتاردىڭ رەنىشىن تۋ­عى­زاتىنى بەلگىلى. وسى رەتتە باي­لانىس جانە اقپارات مينيسترلىگى حقكو-داعى كەزەككە تۇرۋعا call-ورتالىعى نەمەسە ينتەرنەت ار­قى­لى برونداۋ جۇيەسىن ەنگىزۋدى كوز­دەۋدە. بۇعان قوسا مەملەكەتتىك وتەم­اقىلاردى ەلەكتروندى ۇكى­مەت­تىڭ تولەم ءشليۋزى نەمەسە بانك كارتوچكاسى ارقىلى تولەۋ ءمۇم­كىندىكتەرىن ۇسىنادى. مينيستر­لىك­تىڭ اتالعان سالاعا ەنگىزەتىن جاڭالىقتارىنىڭ ءبىرى ءموبيلدى حقكو بولماق. بۇگىنگى كۇنى الىس ەلدى مەكەندەردە تۇراتىن تۇر­عىن­دار ءۇشىن مەملەكەتتىك قىزمەت ءتۇرىن الۋ قيىنعا سوعىپ وتىر. سون­دىقتان مەملەكەتتىك قىزمەت كورسەتۋلەردى قولجەتىمدى ەتۋ ءۇشىن ءموبيلدى حقكو بەلگىلى ءبىر كەستە بويىنشا ايماقتارعا بارىپ, قىزمەت كورسەتۋلەرى ءتيىس. جينالىستا ءسوز بولعان ماڭىز­دى ماسەلەنىڭ تاعى ءبىرى حقكو-داعى سىبايلاس جەمقورلىققا قار­سى كۇرەس جۇمىستارى جايىندا بولدى. كوميتەت توراعاسى باقىت ابىشەۆ حقكو-نىڭ مەملەكەتتىك قىزمەتتەردى ساپالى كورسەتۋى مەن سىبايلاس جەمقورلىققا قارسى كۇرەس تۋرالى زاڭنامانى ورىن­داۋى بويىنشا جۇرگىزىلگەن مونيتورينگ قورىتىندىسى تۋرالى بايانداما جاسادى. «قازىرگى تاڭدا ازاماتتاردى تىركەۋ, جەر تەلىمدەرىنە قۇقىقتارىن تىركەۋ, جەكە كۋا­لىك پەن تولقۇجات الۋدا شەشىمىن كۇت­كەن ماسەلەلەر بار. اتال­عان مەملەكەتتىك قىزمەت تۇرلەرىن كورسەتۋدە سىبايلاس جەمقورلىق­قا ءجيى جول بەرىلەدى», دەپ اتاپ ءوتتى باقىت شالقار ۇلى. سونىمەن بىرگە, ول حقكو قىزمەتكەرلەرىنىڭ زاڭناما­نى بۇزۋ مەن لاۋازىمىن اسىرا پاي­دالانۋى بويىنشا ناق­تى دالەل­دەر­دى دە نازاردان تىس قالدىرمادى. مينيستر اسقار جۇماعاليەۆ ءوز كەزەگىندە اتالعان فاكتىلەر بوي­ىنشا ءبىر اپتانىڭ ىشىندە قىز­مەت­تىك تەكسەرۋلەر جۇرگىزىپ, باسشى­لىق­تىڭ جاۋاپكەرشىلىكتەرى تۋرالى ۇسىنىستار بەرۋدى تاپ­سىردى. ءابدىراحمان قىدىربەك.