ءوزارا كەلىسىمگە سايكەس, Thomson Reuters Eikon تەرمينالىندا اوقو را قازاقستاننىڭ دامۋى مەن كەلەشەگىنە جانە ەكونوميكا, بانك, ءىرى كاسىپورىندارعا قاتىستى ساراپتامالىق زەرتتەۋلەرىن تۇراقتى تۇردە ورنالاستىرادى. Embargoed Research بولىمىنەن تەرمينال قولدانۋشىلارى قازاقستان نارىعى تۋرالى جەدەل ءارى سەنىمدى اقپارات الا الادى. بۇل ءوز كەزەگىندە نارىق قاتىسۋشىلارىنىڭ رەسپۋبليكانىڭ ەكونوميكالىق الەۋەتى جانە ينۆەستيتسيالىق مۇمكىندىكتەرى تۋرالى حاباردارلىق دەڭگەيىن ارتتىرادى.
جانە Thomson Reuters Eikon تەرمينالىندا جانە اوقو را رەسمي سايتىندا جەتەكشى ساراپشىلاردىڭ پىكىرلەرى مەن الەمدىك, وڭىرلىك جانە وندىرىستىك ماسەلەلەرگە قاتىستى ساراپتامالىق ماتەريالدار جاريالانادى.
«قازاقستان Thomson Reuters كومپانياسى ءۇشىن بىردەن-ءبىر باسىم باعىت بولىپ تابىلادى. ال "الماتى قالاسىنىڭ وڭىرلىك قارجى ورتالىعىنىڭ رەيتينگ اگەنتتىگىمەن" جاساسقان اقپاراتتىق سەرىكتەستىك تۋرالى كەلىسىمشارت كومپانيا ستراتەگياسىنىڭ ماڭىزدى بولىگى. ءبىز ارقاشان ءوز كليەنتتەرىمىزدىڭ ەڭ كوكەيكەستى سۇراقتارىنا دەر كەزىندە جاۋاپ بەرەتىن تەحنولوگيالار مەن ساراپتامالاردى قۋانا-قۋانا ۇسىنامىز. ءبىزدىڭ ميسسيا – ءبىر الاڭقايدا كەڭ كولەمدى اقپاراتتارعا قول جەتكىزۋگە جاعداي تۋدىرۋ. مۇنداي كەلىسىمدەر كليەنتتەرىمىزگە بارىنشا ەلەكتەن وتكىزىلگەن سەنىمدى, قولجەتىمدى اقپاراتتار ۇسىنۋعا مۇمكىندىك بەرەدى», - دەدى Thomson Reuters كومپانياسىنىڭ رەسەي مەن تمد ەلدەرىندەگى باسقارۋشى ديرەكتورى پەتر مارچەۆسكي.
"الماتى قالاسىنىڭ وڭىرلىك قارجى ورتالىعىنىڭ رەيتينگ اگەنتتىگى" اق باسقارما ءتورايىمى ايگۇل تاسبولاتتىڭ ايتۋىنشا, قازاقستاننىڭ ەكونوميكالىق جاعدايىن زەرتتەپ وتىرۋ وتە ماڭىزدى. بۇل ءوز كەزەگىندە ەكونوميكامىزدىڭ ايقىندىق دەڭگەيىن كوتەرىپ قانا قويماي, ينۆەستورلار ءۇشىن ءارى تۇسىنىكتى ءارى بولجانعان اقپاراتتار تاراۋىنا ىقپال ەتەدى.
ايناش ەسالي,
«ەگەمەن قازاقستان».
الماتى
