ادەتتەگىدەي اباي الاڭىنان اقتارىلا توگىلگەن سازدى مۋزىكا حالىقتىڭ كوڭىل قوشىن ودان بەتەر كوتەرىپ جىبەردى. دوستىق پەن اباي داڭعىلدارانىڭ بۇرىشىنداعى رەسپۋبليكا سارايىنىڭ الدى – حالىق بىرلىگىنىڭ مەرەكەسىن اتاپ ءوتۋ ءۇشىن تەكتەن-تەك تاڭدالماسا كەرەك. الماتىداعى بارلىق ەتنومادەني بىرلەستىك بۇگىن وسىندا باس قوسىپ, ارنايى وتاۋ تىكتى. ۇلىق مەرەكە ءدال وسى جەردەن باستاۋ الدى. الىپ اباي ەسكەرتكىشىنىڭ تۇبىندە بىزگە بەرگەن سۇحباتىندا قازاقستان حالقى اسسامبلەياسىنىڭ مۇشەسى, «احىسكا» تۇرىك ەتنومادەني بىرلەستىگىنىڭ جەتەكشىسى, فيلوسوفيا عىلىمدارىنىڭ دوكتورى, پروفەسسور قازاقباي قاسيموۆ اعامىز بىلاي دەدى:
«بايقايسىز با, بيىلعى حالىق بىرلىگىنىڭ مەرەكەسى ەلباسىمىز نۇرسۇلتان نازارباەۆتىڭ «ەگەمەن قازاقستاندا» جاريالانعان «بولاشاققا باعدار: رۋحاني جاڭعىرۋ» باعدارلامالىق ماقالاسىمەن تۇسپا-تۇس كەلدى. ماقالادا الداعى ۋاقىتتا دا قازاقستاندىق قۇندىلىقتاردى نىعايتۋ مەن ۇلتتىق يدەولوگيانى جەتىلدىرە بەرۋگە, جالپى ۇلتتىق بىرلىكتى نىعايتاتىن قازاقستاندىق پاتريوتيزمگە ايرىقشا ءمان بەرىلدى. جىلدار جىلجىعان سايىن تۇرلەنە ءتۇسىپ, جاڭا نىشاندا وتەتىن مىناۋ – ءبىر تۋدىڭ استىنداعى ۇلتتار دوستىعىنىڭ مەرەكەسى, مىنە, سول تالاپتارعا ناعىز جاۋاپ قوي دەپ بىلەمىن».
الماتىنىڭ بارلىعى سەگىز اۋدانىندا ءبىر مەزەتتە باستالعان حالىقتار بىرلىگىنىڭ مەرەكەسى الىپ شاھاردىڭ بار بۇرىشىن دۋمانداتىپ جىبەردى. دومبىرانىڭ ۇنىنە ۇيعىر دويراسىنىڭ, كورەي داۋىلپازىنىڭ, ازەربايجان سىبىزعىسىنىڭ ءۇنى قوسىلىپ كوك كۇمبەزگە ەرەكشە ساز اۋەلەدى. قازاقستاننىڭ اسا تانىمال ونەر شەبەرلەرى مەن ەسترادا جۇلدىزدارى ساحنا ءسانىن كەلتىردى. «شاڭىراقتاعى» مەرەكەلىك كروسس, «ءFاmىlۋ» ساياباعىنداعى ۇلت تاعامدارىنىڭ بايقاۋى, «مەگا الماتىداعى» بالالار ۇيىندە تاربيەلەنۋشىلەردىڭ كونتسەرتى, «مەگا پاركتەگى» ءار ۇلت ونەرپازدارىنىڭ سايىسى حالىقتار بىرلىگى مەرەكەسىنە ەرەكشە شىراي بەردى. جۇلدىزدار جامىراعاندا الماتىنىڭ ۇستىنە ءار تۇستان وتشاشۋ توگىلدى.
تالعات ءسۇيىنباي,
«ەگەمەن قازاقستان»
سۋرەتتى تۇسىرگەن: نۇرمانبەت قيزات ۇلى
