العاشقى ماتچتا قازاقستان قۇراماسى اۆستريا كومانداسىمەن كۇش سىناسىپ, 3:2 ەسەبىمەن جەڭىسكە جەتتى.
ماتچتىڭ ءبىرىنشى كەزەڭى جەرلەستەرىمىز ءۇشىن ويداعىداي ءوتتى. 9-مينۋتتا نايدجەل دوۋس ەسەپ اشسا, اراعا التى مينۋت سالىپ دۋبل جاسادى. ەكىنشى كەزەڭدە اۆستريالىقتار قارقىندارىن كۇشەيتىپ, تارازى باسىن تەڭەستىرىپ كەتتى. الدىمەن, كونستانتين كومارەك 25-مينۋتتا ەسەپ ايىرماسىن قىسقارتسا, 38-مينۋتتا توماس راففل تابلوداعى كورسەتكىشتى 2:2-گە جەتكىزدى. دەگەنمەن, سوڭعى بولىكتە ەدۋارد زانكوۆەتس شاكىرتتەرى نامىسقا باسىپ, جەڭىستى ەنشىلەدى. 44-مينۋتتا ۆلاديمير ماركەلوۆ جەڭىستى شايبانىڭ اۆتورى اتاندى.
وسىدان كەيىن وتانداستارىمىز وڭتۇستىك كورەيامەن كەزدەستى. بىراق بۇل كەزدەسۋ ءساتتى اياقتالا قويمادى. قورىتىندى ەسەپ 2:5.
كەزدەسۋدىڭ 8-مينۋتىندا قازاقستان قۇراماسى ساپىنان برەندون بوچەنسكي ەسەپ اشسا, 16-مينۋتتا ان ين حۋ تارازى باسىن تەڭەستىرىپ كەتتى. ماتچتىڭ كەلەسى بولىگىندە نايدجەل دوۋس مەرگەندىگىمەن تانىلىپ, كوماندانى العا شىعارعان ەدى. الايدا, سوڭعى كەزەڭدە وڭتۇستىككورەيالىقتاردىڭ شابۋىلىنا قارسىلىق تانىتا الماي, اينالاسى التى مينۋتتىڭ ىشىندە ءتورت بىردەي گول جىبەرىپ الدى. ولاردى الەكس پلانت (46, 50-مينۋتتار), شين سان حۋن (47-مينۋت), كيم كيسۋن (52-مينۋت) سالدى.
جەرلەستەرىمىز وڭتۇستىك كورەيادا كەتكەن ەسەنى پولشادان قايتارۋ ءۇشىن بارىن سالدى. بۇل ويىندا گول سوعىلاتىن مۇمكىندىكتەر بولعانمەن, جالعىز ءارى جەڭىستى گول وۆەرتايم كەزىندە عانا سوعىلدى. ونى 62-مينۋتتا كەۆين داللمەن سالدى. ەسەپ 1:0, ۇلتتىق قۇرامامىز جەڭىسكە جەتتى.
قازاقستان قۇراماسى وسىدان كەيىن ۋكراينامەن سىنعا ءتۇستى. تورەشىنىڭ «ءا» دەگەنىنەن العا ۇمتىلعان ەدۋار زانكوۆەتس شاكىرتتەرى 4-مينۋتتا ەسەپ اشىپ ۇلگەردى. ونى نايدجەل دوۋس ەنشىسىنە جازدى. كەزەڭنىڭ اياقتالۋىنا ساناۋلى سەكۋندتار قالعاندا مارتەن سەن-پەر باسىمدىقتى ارتتىرا ءتۇستى.
وتانداستارىمىز العاشىندا تەگەۋرىندى كورىنگەنمەن, ەكىنشى كەزەڭدە وسالدىق تانىتتى. بار-جوعى ەكى مينۋتتا ەكى بىردەي شايبا جىبەرىپ الدى. 35-مينۋتتا دميتري نيمەنكو ەسەپ ايىرماسىن قىسقارتسا, بىرەر مينۋتتان كەيىن سەرگەي بابينەتس ەسەپتى 2:2-گە جەتكىزدى.
ءۇشىنشى كەزەڭدە جانكۇيەرلەر جان الىسىپ, جان بەرىسكەن ويىننىڭ كۋاسى بولدى. قوس كوماندا جەڭىسكە جەتۋ ءۇشىن ايانىپ قالمادى. دەگەنمەن, بۇل تۇستا جەرلەستەرىمىز ۇستەم بولىپ, ەكى شايبا سوعىپ كەتتى. 42-مينۋتتا نيكيتا ميحايليس ۋكراينا قاقپاسىن ءدال كوزدەسە, 57-مينۋتتا برەندون بوچەنسكي سوڭعى نۇكتەنى قويدى. قورىتىندى ەسەپ 4:2.
ۋكراينا قۇراماسى وسى جەڭىلىسىنەن كەيىن ديۆيزيونداعى ورنىن ساقتاپ قالا المادى. ولاردىڭ ەنشىسىندە ءنول ۇپاي. وسى سەبەپتى كەلەسى جىلى ولار 1ۆ ديۆيزيونىنا تۇسەدى.
قازىرگى ۋاقىتتا اۆستريا 9 ۇپايمەن توپتا كوش باستاپ تۇرسا, ءدال وسىنداي ۇپايمەن وڭتۇستىك كورەيا ەكىنشى كەلەدى. ءۇشىنشى ورىندا – قازاقستان قۇراماسى, ەنشىسىندە 8 ۇپاي بار. ءتورتىنشى – پولشا (7 ۇپاي), بەسىنشى – ۆەنگريا (3 ۇپاي), التىنشى – ۋكراينا (0 ۇپاي)
مۇنداي ءىرى جارىستا ءاربىر ويىننىڭ ماڭىزى جوعارى. الەم چەمپيوناتىنىڭ ەليتالىق كەزەڭىنە توپتا ءبىرىنشى جانە ەكىنشى ورىن العان كوماندالار عانا شىعادى.
ايتا كەتەيىك, قازاقستان قۇراماسى وسىعان دەيىن الەم بىرىنشىلىگىنە سەگىز رەت قاتىسقان (1998, 2004, 2005, 2006, 2010, 2012, 2014, 2016).
بيىل الەم چەمپيوناتى فرانتسيا (پاريج) مەن گەرمانيا (كەلن) ەلدەرىندە 5-21 مامىر كۇندەرى وتەدى. بۇگىنگە دەيىن مۇنداي ءىرى جارىستى فرانتسيا ءتورت رەت وتكىزسە, گەرمانيادا جەتى مارتە ۇيىمداستىرىلعان.
