راس, الەمدىك قاۋىمداستىق الدىندا حالىقارالىق ماسشتابتاعى باتىل جوبالارىمەن, بالاماسىز ۇسىنىستارىمەن تانىلا باستاعان ەلىمىز ءۇشىن بۇل كورمە زور مۇمكىندىكتەردى ىسكە اسىرىپ, مۇددەلەردى ايقىنداپ الار تاماشا الاڭقاي بولعالى تۇر. وسى تۇرعىدان العاندا, قاي سالادا بولسىن جان-جاقتى قارمانىپ, ۇپايىمىزدى تۇگەندەي بىلگەنىمىز ابزال. سپورتىمىزدىڭ دا بۇل ماقساتقا قوسار ۇلەسى سۇبەلى دەگەن ويدامىز.
قازىرگى تاڭدا قازاقستاندى حالىقارالىق سپورت ارەناسىندا زور سەنىمگە يە بولعان, سپورتتىق دەرجاۆالاردىڭ قاتارىنان ويىپ ورىن العان مەملەكەت دەپ نىق سەنىممەن ايتۋعا بولادى. بۇعان مىسالدى الىستان ىزدەپ كەرەگى دە جوق. كۇنى كەشەگى XXVIII دۇنيەجۇزىلىك قىسقى ۋنيۆەرسيادانىڭ جوعارى دەڭگەيدە ءوتۋىنىڭ ءوزى ەلىمىزدىڭ الەمدىك سپورت قاۋىمداستىعى ارتقان سەنىمگە قانشالىقتى ادال بولعانىن كورسەتسە كەرەك.
مىنە, سپورتى وسىنشا ورلەپ تۇرعان قازاقستان «استانا ەكسپو-2017» كورمەسى كەزىندە ءوزىنىڭ الەۋەتىن تاعى ءبىر مارتە پاش ەتۋگە زور مۇمكىندىك الدى. ياعني, الىستان كەلگەن مەيماندار كورمەنى عانا قىزىقتاپ قويماي, الۋان ءتۇرلى سپورتتىق جارىستاردى دا تاماشالاي الادى.
ءيا, بيىلعى جاز استانا ءدۇبىرلى جارىستاردىڭ ورداسىنا اينالعالى تۇر. ەلوردامىزدا اتالعان الەمدىك فورۋم اياسىندا 12 بىردەي ءىرى تۋرنير وتەدى ەكەن. ەڭ الدىمەن, 22-28 ماۋسىم ارالىعىندا «داۋلەت» سپورت كەشەنىندە كوركەم گيمناستيكادان ازيا چەمپيوناتى تۋ تىگەدى. سارى قۇرلىقتىڭ سۇلۋلارى اراسىنداعى بۇل باسەكە اياقتالا سالىسىمەن كاراتە-شينكيوكۋشينكاي شەبەرلەرى الەم چەمپيوناتىنىڭ جۇلدەلەرى ءۇشىن تارتىسقا تۇسپەكشى. جارىس 28 ماۋسىمدا باستالىپ, 4 شىلدە كۇنى اياقتالادى. ىلە-شالا, ياعني 10-17 شىلدە ارالىعىندا كاراتە-دو شيتو-ريۋ دەپ اتالاتىن سپورت تۇرىنەن ازيا چەمپيوناتى جالاۋ كوتەرەدى. بۇدان كەيىن, 15-24 شىلدەدە تەننيستەن پرەزيدەنت كۋبوگى جولىنداعى تۋرنير وتەدى. ال 20-24 شىلدە ارالىعىندا وتەتىن بەلبەۋ كۇرەسى بويىنشا الەم چەمپيوناتى كىم-كىمدى بولسىن قىزىقتىرارى ءسوزسىز. مىنە, قاراپ تۇرساڭىز, ماۋسىم, شىلدە ايلارىندا ەلوردادا سپورتتىق شارالاردىڭ قارا قازانى بۇرق-سارق قايناپ جاتادى ەكەن!
استاناعا مىڭ-ميلليونداپ كەلەتىن قوناقتاردىڭ الدىندا قازاق ەلىنىڭ ءتول سپورتى – قازاق كۇرەسىن تاعى ءبىر قىرىنان تانىستىرۋدىڭ مۇمكىندىگى تۋىپ تۇر. جارناماسى كەلىسسە, تامىز ايىنىڭ 3-6 كۇندەرى «بارىس ارەنا» سپورت كەشەنىندە وتەتىن قازاق كۇرەسىنەن «الەم بارىسى» تۋرنيرىنە كەلۋشىلەردىڭ از بولماسى انىق. الەمنىڭ ءار تۇپكىرىنەن كەلگەن بالۋاندار قازاق كۇرەسى دوداسىنىڭ كورىگىن قىزدىرىپ جاتقان تۇستا «ەلدورادو» اتىس الاڭىندا ستەندتىك اتۋدان الەم چەمپيوناتى شىمىلدىق تۇرەدى. تۋرنير 3 تامىزدان باستالىپ, 13 تامىز كۇنى اياقتالادى دەپ جوسپارلانعان.
قازاقتىڭ قانداي جاۋىنگەر حالىق ەكەنىن پاش ەتەتىن سپورتتىق شارانىڭ ءبىرى – «قازانات» اتشابارىندا وتەتىن كوكپاردان الەم چەمپيوناتى دەپ ويلايمىز. بۇل دودانى تاماشالاعان شەتەلدىك مەيماندار كورگەن قىزىق, العان اسەردەن كوپكە دەيىن ايىعا الماسى ءسوزسىز.
تورتكۇل دۇنيەگە ماقتان ەتەر تاعى ءبىر تاماشامىز – توعىزقۇمالاق سپورتى. قىركۇيەك ايىنىڭ 2-9 كۇندەرى «Hotel ibis Astana» قوناق ۇيىندە سپورتتىڭ وسى تۇرىنەن الەم چەمپيوناتىنىڭ جالاۋى جەلبىرەيدى.
مىنە, «استانا ەكسپو-2017» كورمەسى قازاق ەلى سپورتىنىڭ قارىشتاپ دامىعانىن عانا ەمەس, مەملەكەتىمىزدىڭ حالىقارالىق دەڭگەيدەگى ماڭىزى زور جارىستاردى وتكىزۋگە قانشالىقتى قاۋقارلى ەكەنىن, ياعني الەمدىك سپورت قاۋىمداستىعىنىڭ سەنىمىنە ابدەن كىرگەن ارىپتەس ەكەندىگىن تورتكۇل دۇنيەگە تاعى ءبىر مارتە دالەلدەمەك. بۇدان بولەك, بالامالى ەنەرگيا كوزدەرىنە يەك ارتقان ەلىمىز حالقىنىڭ سالاماتتى ءومىر سالتىن ۇستاناتىن ۇلت رەتىندە تانىلۋى دا الەم الدىنداعى ابىروي-بەدەلىمىزدى وسىرە تۇسەرى ءسوزسىز.
