بىرىنشىدەن, بۇل – ءومىر تالابى, زاماننىڭ ءوزى تۋعىزىپ وتىرعان قاجەتتىلىك. ءبىز قازىر وتە تەز, كوز ىلەسپەس جىلدامدىقپەن ءوتىپ جاتقان تەحنولوگيا عاسىرىندا ءومىر ءسۇرىپ وتىرمىز. سوناۋ حح عاسىردىڭ باسىندا الاش ارداقتىسى ءمىرجاقىپ دۋلات ۇلى سانكت-پەتەربوردا شىققان «سەركە» گازەتىندە «ويان, قازاق!» دەپ جار سالسا, ءتاۋەلسىزدىك جىلدارىندا «ويلان, قازاق!» دەگەن ۇران كوتەرىلدى. ەندى ەلباسى: «ىسكە كىرىس!» – دەپ وتىر.
الەمدىك جاھاندانۋ ۇردىسىندە توتەپ بەرۋ ماقساتىندا ءوز حالقىمىزدىڭ ۇلتتىق كودىن ساقتاپ قالۋ ءۇشىن نە ىستەۋىمىز كەرەكتىگى كورسەتىلەدى. ول ءۇشىن ۇلتىمىزدىڭ بويىنداعى زياندى ادەتتەردەن ارىلىپ, ءبىرتۇتاس حالىق رەتىندە سالت-ءداستۇرىمىزدىڭ, ءومىر ءسۇرۋ مەنتاليتەتىمىزدىڭ وزىق ۇلگىلەرىن ۇرپاق بويىنا ءسىڭىرۋىمىز كەرەك. ۇلى ويشىل اباي بابامىز ايتىپ كەتكەن «وسەك, وتىرىك, ماقتانشاق, ەرىنشەك, بەكەر مال شاشپاق» سەكىلدى زالالدى ىستەردەن ارىلۋى-
مىز قاجەت, ال «تالاپ, ەڭبەك, تەرەڭ وي, قاناعات, راقىم» سياقتى اسىل قاسيەتتەردى بارىنشا اركىم ءوز بويىنا ءسىڭىرۋ كەرەك. الدىمەن ءار قازاق بالاسى وسى دەڭگەيدەن كورىنسە, سوندا عانا ءبىز ۇلتتىق مەملەكەت رەتىندە ساقتالىپ قالا الامىز. ەلباسى ايتقانداي: «كۇن ساناپ وزگەرىپ جاتقان ءدۇبىرلى ءدۇنيەدە سانا-سەزىمىمىز بەن ءدۇنيەتانىمىمىزعا ابدەن ءسىڭىپ قالعان تاپتاۋرىن قاعيدالاردان ارىلماساق, كوش باسىنداعى ەلدەرمەن تەرەزەمىزدى تەڭەپ, يىق ءتۇيىستىرۋ مۇمكىن ەمەس».
مەملەكەت باسشىسى جەكە ادام عانا ەمەس, تۇتاس حالىقتىڭ ءوزى ءباسەكەگە قابىلەتتى بولۋ كەرەكتىگىنە باسا نازار اۋدارىپ وتىر. ەڭ باستىسى, ەلباسىنىڭ: «ۇلتتىق سالت-ءداستۇرلەرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, ءبىر ءسوزبەن ايتقاندا, ۇلتتىق رۋحىمىز بويىمىزدا ماڭگى قالۋعا ءتيىس», دەگەن ويلارى ءبىزدىڭ بويىمىزعا تىڭ كۇش سىڭىرەدى, سەرپىن بەرەدى. ءتاۋەلسىزدىك جىلدارى رۋحانيات سالاسىندا «ءمادەني مۇرا», «حالىق – تاريح تولقىنىندا» سياقتى قىرۋار جەمىستەرىن بەرگەن باعدارلامالار ءجۇزەگە استى. سونىڭ ناتيجەسىندە, ءبىرشاما دەڭگەيدە جەتىستىكتەرگە جەتتىك. ەندى سول جەتكەن جەرىمىزدە توقتاپ قالماي, ءبىرتۇتاس ۇلتتىق رۋحاني جاڭعىرۋعا اياق باستىق.
نازار اۋدارارلىق ءۇلكەن ماسەلەنىڭ ءبىرى – قازاقستاننىڭ رەۆوليۋتسيالىق ەمەس, ەۆوليۋتسيالىق دامۋى كەرەكتىگى. بۇل ەندى ارعى-بەرگى تاريحىمىزداعى ساباق الا كەلە جاسالعان بايلام. ءبىز ءوزىمىزدىڭ ۇلتتىق قۇندىلىقتارىمىزدى ساقتاي وتىرىپ, دامىعان ۇستىنە دامي بەرۋىمىز كەرەك.
«جاڭا گۋمانيتارلىق ءبىلىم. قازاق ءتىلىندەگى 100 وقۋلىق» جوباسى دا قۋانتاتىن جاعداي. وسى رەتتە ايتا كەتەتىن ماسەلە – قازاق ءتىلى, قازاق ادەبيەتى, قازاق تاريحى, قازاق جۋرناليستيكاسىنىڭ نەگىزدەرى تۋرالى وقۋلىقتار ءوزىمىزدىڭ ءتول عىلىمىمىزدىڭ بۇرىنعى-سوڭعى جەتىستىكتەرى نەگىزىندە دايارلانۋى كەرەك.
جاڭادان قۇرىلاتىن ۇلتتىق اۋدارما بيۋروسى تەك شەتەلدىك تاڭداۋلى وقۋلىقتاردى اۋدارۋمەن عانا شەكتەلىپ قالماي, قازاق ادەبيەتىنىڭ تاڭداۋلى شىعارمالارىن الەمدىك ءتىلدەرگە ءتارجىمالاۋ ىسىمەن دە اينالىسۋى كەرەك. ءبىر جىلدارى قازاقستان جازۋشىلار وداعى جانىنان قۇرىلعان اۋدارما كوللەگياسىنىڭ جۇمىسىن قايتا جانداندىرۋ كەزەك كۇتتىرمەيتىن ماسەلە.
«تۋعان جەر» باعدارلاماسىنىڭ دا جاس ۇرپاقتى جەردى, ەلدى سۇيۋگە تاربيەلەيتىندىگىنە ەش كۇمان جوق.
قوعامىمىزعا رۋحاني سالاداعى جاڭا ءوزگەرىستەر مەن تىڭ سەرپىلىستەر اكەلەتىن ەلباسى ماقالاسىندا كورسەتىلگەن ءماسەلەلەردىڭ شەشىمىن تابۋ ءۇشىن ءارقايسىمىز ءوز ۇلەسىمىزدى قوساتىن كۇن تۋدى.
...تاۋەلسىزدىگىمنىڭ كۇن ساناپ اسقاقتاپ ءانى,
نۇرلى بولاشاققا رۋحىمىز باستاپ بارادى!
باۋىرجان جاقىپ,
ۇلتتىق عىلىم اكادەمياسىنىڭ كوررەسپوندەنت مۇشەسى,
قازاقستان جازۋشىلار وداعىنىڭ مۇشەسى, اقىن, عالىم
