اتاپ ايتقاندا, الماتى, سەمەي, قاراعاندى, شىمكەنت جانە تاراز قالالارىنان كەلگەن 17-25 جاس ارالىعىنداعى 24 ونەرپاز سايىسقا ءتۇستى. بۇل تۋرالى وقۋ ورنىنىڭ اقپاراتتىق-يميدجدىك قىزمەتى حابارلادى.
ونەر دوداسىنىڭ ماقساتى – جاستاردىڭ رۋحاني-ادامگەرشىلىك جانە كوركەمدىك-ەستەتيكالىق دامۋىن قالىپتاستىرۋ, ءان ونەرىن ناسيحاتتاۋ, جاڭا تالانت يەلەرىن ىزدەۋ, جاستار اراسىندا انشىلىك ونەرىنىڭ كاسىبي دەڭگەيدە كوتەرىلۋىنە جول اشۋ. سونداي-اق, وسكەلەڭ ۇرپاقتى وتانسۇيگىشتىككە تاربيەلەۋ, قازاقستاندىق كومپوزيتورلاردىڭ پاتريوتتىق تۇرعىداعى شىعارمالارىنا قولداۋ كورسەتۋ جانە وتاندىق مۋزىكالىق تۋىندىلاردىڭ باسەكەلەستىك الەۋەتىن ارتتىرۋ.
تاراز مەملەكەتتىك پەداگوگيكالىق ينستيتۋتىنىڭ تاربيە ءىسى جانە الەۋمەتتىك ماسەلەلەر جونىندەگى پرورەكتورى ورىنقىز جولداسوۆا ينستيتۋت رەكتورى داريا قوجامجاروۆانىڭ سايىسقا قاتىسۋشىلارعا جولداعان قۇتتىقتاۋ حاتىن وقىپ بەردى.
– ۇلتىمىزدىڭ ۇلى اقىنى, حاكىم اباي: «قۇلاقتان كىرىپ بويدى الار, اسەم ءان مەن ءتاتتى كۇي...» دەپ مۋزىكانىڭ سانا-سەزىمگە, كوڭىل-كۇيگە اسەرىن اسپەتتەپ جەتكىزگەن. ونەر زەرتتەۋشىلەرىنىڭ كەلتىرگەن دەرەكتەرىنە قاراعاندا, قازاق حالقىندا 5 مىڭنان اسا كۇي, 12 مىڭعا جۋىق ءان بار ەكەن. بۇل – ۇلتتىق مۋزىكا ونەرىنىڭ سان عاسىرلىق دامۋ تاريحىنىڭ ايقىن كورىنىسى, بىردەن-ءبىر نىشانى. كيىز تۋىرلىقتى قازاقتىڭ باي مۋزىكالىق مۇراسىن زەرتتەگەن ەتنوگراف-عالىم الەكساندر زاتاەۆيچ: «ماعان بۇكىل قازاق دالاسى ءان سالىپ تۇرعانداي بولىپ كورىنەدى» دەپ بەكەر ايتپاسا كەرەك-ءتى. «ۇستازدار ۇستاحاناسى» دەپ اسپەتتەلەتىن پەداگوگيكالىق وقۋ ورداسىنىڭ جارتىعاسىرلىق مەرەيتويىنا وراي ۇيىمداستىرىلىپ وتىرعان بۇگىنگى شارا ساعىندىرعان سوناۋ جىلداردى ءاننىڭ قۇدىرەتىمەن ەسكە تۇسىرەتىن, كوزىقاراقتى كورەرمەننىڭ كوزايىمىنا اينالاتىن, جاڭا تالانتتاردى انىقتاۋعا سەپتەسەتىن كەش بولاتىنىنا سەنىمدىمىن, – دەلىنگەن رەكتور قۇتتىقتاۋىندا.
ونەر جارىسى ەكى كەزەڭ بويىنشا جۇرگىزىلدى. «زامانا سازى» اتتى العاشقى تۋردا قاتىسۋشىلار ەرلىك پەن ەلدىكتىڭ شەجىرەلى بەتتەرى جىرلانعان وتكەن عاسىردىڭ 70-90 جىلدارىنداعى رەترو اندەردى ورىنداسا, «ەلىم مەنىڭ» كەزەڭىندە وتان, ەل, جەر, تاۋەلسىزدىك تۋرالى پاتريوتتىق مۋزىكالىق شىعارمالاردى كوپشىلىككە ۇسىندى.
سايىسقا قازاقستان رەسپۋبليكاسىنىڭ مادەنيەت قايراتكەرلەرى, بەلگىلى انشىلەر مەن سازگەرلەر قازىلىق جاسادى. فەستيۆال بارىسىندا قاتىسۋشىلار ءاننىڭ بايقاۋ تاقىرىبىنا سايكەس بولۋى, ۆوكالدىق ەرەكشەلىكتەرى, شىعارمانىڭ كوركەمدىك دەڭگەيى, ورىنداۋشىلىق ماشىعى, سايىسكەرلەردىڭ جاس شاماسى مەن رەپەرتۋار كۇردەلىلىگىنىڭ سايكەس بولۋى, ارتىستىك شەبەرلىگى, مۋزىكانىڭ كاسىبي دەڭگەيدە وڭدەلۋى, ورىنداۋشىنىڭ كوركەمدىك-ساحنالىق بەينەسى جانە كيىم ۇلگىسى سىندى تالاپتار بويىنشا باعالاندى.
– بايقاۋدا باعىن سىناۋشىلاردىڭ دايىندىقتارى جوعارى دەڭگەيدە ەكەنىن اتاپ وتكەن ابزال. ولار سايىس كەزەڭدەرىندە قارىم-قابىلەتتەرىن بارىنشا كورسەتۋگە تىرىستى. وسى ورايدا ايتا كەتكەن ءجون, بۇل جوبا جاستارعا ۇلكەن مۇمكىندىك سىيلايدى. ولار ءوز بويىنداعى ونەرىن عانا كورسەتىپ قويمايدى, سونداي-اق جوعارى وقۋ ورنىنىڭ مامان ۆوكاليستەرىمەن دە جۇمىس ىستەپ, ءدارىس الادى. بۇل كەلەشەكتە كاسىبي ءانشى رەتىندە شىڭدالا تۇسۋىنە سەپ بولماق. سونىمەن قاتار, مۇنداي بايقاۋ وڭىرىمىزدە العاش رەت ۇيىمداستىرىلىپ وتىرعاندىعىن دا ايتا كەتكىمىز كەلەدى, – دەيدى قازىلار القاسىنىڭ مۇشەلەرى.
ۇيىمداستىرۋشىلاردىڭ ايتۋىنشا, قاتىسۋشىنىڭ قانداي ءان ورىندايتىندىعى ماڭىزدى ەمەس. باستىسى – ولار ءوز ونەرى ارقىلى مۋزىكانىڭ ومىرىندەگى الار ورىنى مەن اسەرىن شەبەر پاش ەتە ءبىلۋى ءتيىس.
بايقاۋ قورىتىندىسى بويىنشا فەستيۆالدىڭ باس جۇلدەسىن جەكەلەي ورىنداۋشىلاردىڭ اراسىندا وڭتۇستىك قازاقستان مەملەكەتتىك پەداگوگيكالىق ينستيتۋتىنىڭ ستۋدەنتى ايكەرىم ءتاجى, توپتىق ورىنداۋشىلار اراسىندا ە. بوكەتوۆ اتىنداعى قارمۋ ستۋدەنتتەرىنەن قۇرالعان «ارىن» توبى جەڭىپ الدى. 1-ورىنعا جەكەلەي ورىنداۋشىلاردىڭ اراسىندا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتى قانىبەك اقىق, توپتىق ورىنداۋشىلار اراسىندا م.ح. دۋلاتي اتىنداعى تارمۋ-دىڭ «ArtMen» توبى لايىق دەپ تانىلسا, 2-ورىندى جەكەلەي ورىنداۋشىلاردىڭ اراسىندا تارمپي-دىڭ ستۋدەنتى سامات ەربولات پەن م. اۋەزوۆ اتىنداعى وقمۋ-دىڭ ستۋدەنتى گۇلمان عالىمبەك, توپتىق ورىنداۋشىلار اراسىندا تارمپي-دىڭ «قىزدار Live» توبى ءوزارا ءبولىستى. ال, 3-ورىن جەكەلەي ورىنداۋشىلاردىڭ اراسىندا تارمپي-دىڭ ستۋدەنتى يانا ۆانعا, وقمپي-دىڭ ستۋدەنتتەرى الماسقوجا مۇزاپپاروۆ پەن ءداۋىت باراتوۆقا, توپتىق ورىنداۋشىلار اراسىندا «ارلان» توبىنا بۇيىردى.
جەڭىمپازدار ارنايى ديپلومدارمەن, باعالى سىيلىقتارمەن ماراپاتتالدى.
جيىن سوڭى وقۋ ورنىنىڭ ونەر ۇجىمدارى مەن ستۋدەنتتەرى دايىنداعان گالا-كونتسەرتكە ۇلاستى.
