بۇگىنگى كۇندە ءبىز ەرەكشە جىلدامدىقپەن اينالامىزدا وزگەرىپ جاتقان ۋاقىت, كوزقاراس, تەحنولوگيالاردىڭ كۋاسى بولىپ ءجۇرمىز. ەلباسىمىز ايتقانداي, «ءبىزدىڭ ماقساتىمىز ايقىن, باعىتىمىز بەلگىلى, ول – الەمدەگى ەڭ دامىعان 30 ەلدىڭ قاتارىنا قوسىلۋ».
بارىمىزگە بەلگىلى, ءبىز بۇگىندە سول دامىعان مەملەكەتتەردىڭ وزىق تەحنولوگيالارىن مولىنان بارلىق سالادا قولدانامىز, ياعني سولار شىعارعان كولىكتى مىنەمىز, ساپالى تاۋاردى تۇتىنامىز. ءوزىم جۇمىس جاسايتىن مەديتسينا سالاسىندا دا سولار شىعارعان قۇرال-جابدىقتار مەن ءدارى-دارمەكتەردى قولدانىپ, ەلدى ەمدەيمىز, ۇرپاق وربىتۋگە كومەكتەسەمىز.
وكىنىشتىسى, ءبىزدىڭ ەلدە ونداي دۇنيەجۇزىلىك جوعارى دەڭگەيگە سايكەس قۇرال جابدىقتار, دارىلەر شىعارىلمايدى. ەلىمىزدە ەگەمەندىك العان 25 جىلدا ءزاۋلىم زاماناۋي عيماراتتار سالىپ, مەديتسينا سالاسىن قارقىندى دامىتىپ كەلە جاتقانمەن, بىزدە مامان تاپشىلىعى, تەحنولوگيا, جابدىق تاپشىلىعى ءالى دە ءبىرتالاي بايقالىپ كەلەدى. ياعني, ءبىز وسىنداي جەتىستىكتەرگە جەتتىك, كىمنەن كەممىز دەپ ماقتانىپ وتىرا بەرمەي, وسى دامىعان ەلدەردىڭ دەڭگەيىندە باسەكەلەستىككە ساي ينجەنەرلىك شەشىمدەرگە جەتۋىمىز قاجەت ەكەنىن كورىپ وتىرمىز.
ءبىزدىڭ ءبىر يزرايلدىك ارىپتەسىمىز, مەديتسينا سالاسىنىڭ ۇلكەن عالىمى «الەمدە عىلىم كۇرت وزگەرۋدە, سونىمەن بىرگە, ءبىز دە وزگەرۋىمىز, زامانعا ساي تەز قالىپتاسىپ تۇرۋىمىز قاجەت», دەگەن ەدى.
ەلباسى ايتقانداي, تەحنولوگيامەن قاتار, ءبىز ءوزىمىزدىڭ ۇلتتىق گەنەتيكالىق كودىمىزعا, تىلىمىزگە, مادەنيەتىمىزگە, سالت-داستۇرىمىزگە مىقتى بولۋىمىز قاجەت, العا باسۋعا, ۇلتىمىزدىڭ دامۋىنا كەدەرگى بولاتىن وتكەننىڭ كەرتارتپا تۇستارىنان باس تارتۋ كەرەك. جوبادا رۋحاني جاڭعىرۋ, سانامىزدىڭ زاماناۋي وزگەرىستەرگە ساي اشىق بولۋ ماسەلەلەرى ايرىقشا اتالعان.
جاسىراتىنى جوق, بۇقارالىق اقپارات قۇرالدارىندا كوپتەگەن, بوسقا ۋاقىتتى الاتىن, ءارتۇرلى جاعىمسىز, تۇككە تۇرمايتىن اقپاراتتار, وتكەننىڭ قازىرگى زامانعا ساي كەلمەيتىن دۇنيەلەرىن ناسيحاتتايتىن جاعدايلار اعىلىپ توگىلەدى. سونى جازىپ وتىرعان ادامداردىڭ ساناسىنا, جازعان ءدۇنيەلەرىنە جاۋاپكەرشىلىكپەن قارامايتىنىنا شىنىمەن-اق قارنىڭ اشادى. وسىنداي اقپاراتتاردىڭ ۇشان-تەڭىزىندە اق-قاراسىن ايىرا الماي باتىپ كەتىپ جاتقان قانشاما جان بار.
دۇنيەجۇزىلىك دەڭگەيدە باسەكەلەستىككە ساي بولۋ ءۇشىن ءبىلىمنىڭ سالتانات قۇرۋى اسا قاجەتتى ەكەنىن ەلباسى ەرەكشە اتاپ وتكەن. الەمدىك بىلىمگە تولىققاندى قول جەتكىزۋ ءۇشىن انا تىلىڭمەن قاتار, اعىلشىن ءتىلىن جەتىك ءبىلۋ اۋاداي كەرەك ەكەنى ايتىلعان. قازىرگى زاماندا ەلىمىزدە قوس-قوس ديپلومى بار, بىراق ءبىلىمى جوق جاستار دا جەتكىلىكتى. ايتاتىنى, وسىنداي ديپ-
لومدارمەن بىزگە جۇمىس جوق دەگەنى. نەگىزىنە كەلگەندە, ولاردى جۇمىسقا الاردا ءبىلىمىن تەكسەرگەندە باسەكەلەستىككە, جوعارى دەڭگەيگە ساي كەلمەيتىنىنە جۇمىس بەرۋشىلەر كوز جەتكىزەدى.
بولاشاققا باعدارلايتىن ەلباسىنىڭ بۇل كولەمدى جوباسىن ءاربىر ادام, اسىرەسە, جاستار, بىرنەشە رەت وقىپ, جۇرەگىمەن, ساناسىمەن قابىلداسا عانا ءبىزدىڭ ەلىمىزدە جارقىن بولاشاققا جەتەلەيتىن يگى وزگەرىستەر بولار ەدى دەگەن سەنىمدەمىز. ءار ازامات, باسقانى سىناپ-مىنەمەي, ءوزىنىڭ رۋحاني دۇنيەسىن بايىتىپ, عىلىم, ءبىلىم قۋىپ, جوعارى ساپالى ەڭبەكتەنگەن جاعدايدا ءبىزدىڭ ەلىمىزدىڭ بولاشاعى زور بولادى دەگەن ويدامىز.
سالتانات بايقوشقاروۆا,
قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە
وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى,
بيولوگيا عىلىمدارىنىڭ دوكتورى,
«ەكومەد» ادام ۇرپاعىن ء وربىتۋ كلينيكاسىنىڭ عىلىمي ديرەكتورى
