شىن مانىندە, كوز ىلەسپەس شاپشاڭدىقپەن دامىپ, جەدەل وزگەرىپ وتىرعان مىنا ءدۇبىرلى دۇنيەدە, ەلباسى ايتقانداي, سانا-سەزىمىمىز بەن دۇنيەتانىمىمىزعا ءابدەن ءسىڭىستى بولىپ قالعان تاپتاۋرىن قاعيدالاردان ارىلىپ, رۋحاني جاعىنان سەرپىلۋىمىز, جاڭعىرۋىمىز قاجەت. بۇل ارادا رۋحاني جاڭعىرۋدىڭ ەڭ باستى شارتى – ۇلتتىق كودىمىزدى ساقتاۋ ەكەنىن ءاردايىم ەستە ۇستاپ, الەمدىك وزگەرىستەرگە ساي جاڭاشا ويلاۋ جۇيەسىن قالىپتاستىرعانىمىز ابزال. ال ۇلتتىق كودتى ساقتاۋ دەگەنىمىز – ۇلتتىق بولمىسىمىزدى نىعايتىپ, ونى ۇرپاقتان-ۇرپاققا مۇرا ەتۋ. ۇلتتىق بولمىستىڭ ءوزى ءبىزدىڭ ەجەلدەن كەلە جاتقان قازاقي سالت-داستۇرلەرىمىزدەن, مادەنيەتىمىزدەن, بارلىق رۋحاني قۇندىلىقتارىمىزدان باستاۋ الادى دەسەك, مىنا وزگەرمەلى دۇنيەدە سول قۇندىلىقتارىمىزدى زامانعا ساي ودان ءارى بايىتىپ, دامىتىپ, ونى بۇگىنگى ۇرپاقتىڭ ساناسى مەن تۇرمىسىنا ءسىڭىرۋ ارقىلى جاڭا عاسىردىڭ جاڭا ۇرپاعىن قالىپتاستىرۋ دەگەن ءسوز.
ەلباسى رۋحاني جاڭعىرۋىمىزدىڭ باستى قۇندىلىعى رەتىندە باسەكەگە قابىلەتتىلىكتى ۇسىنادى. بۇگىنگى تاڭدا جەكە ادام عانا ەمەس, تۇتاس حالىقتىڭ ءوزى باسەكەلەستىك قابىلەتىن ارتتىرسا عانا تابىسقا جەتۋگە ءمۇمكىندىك الاتىنىنا ەل پرەزيدەنتىنىڭ ەرەكشە نازار اۋدارىپ وتىرعانى بەكەر ەمەس. ويتكەنى, الەمدىك باسەكەگە قابىلەتتىلىك ۇلتىمىزدىڭ ەكونوميكادا عانا ەمەس, رۋحاني الەمدە دە وزىق بولۋىن قاجەت ەتەرى ءسوزسىز.
رۋحاني جاڭعىرۋ ۇلتتىق كودتى ساقتاۋمەن بىرگە ۇلتتىق بىرەگەيلىكتى ساقتاۋدى دا تالاپ ەتەدى. ەلباسى ايتقانداي, ۇلتتىق سالت-ءداستۇرىمىز, ءتىلىمىز بەن مۋزىكامىز, ادەبيەتىمىز, جورالعىلارىمىز, جالپى, ۇلتتىق رۋحىمىز بويىمىزدا ماڭگى قالۋى ءتيىس. ءارينە, ۇلتتىق قۇندىلىقتاردىڭ ءبارى جاس ۇرپاققا وتباسىنان, بالا باقشادان, مەكتەپتەن بەرىلەرى انىق. جوعارى وقۋ ورىندارىندا ول ودان ءارى تەرەڭدەتىلۋى ءتيىس. سوندىقتان, اتا-انا دا, ورتا مەكتەپ پەن جوعارى وقۋ ورىندارىنىڭ ۇستازدارى دا ۇلتتىق تاربيەنى ءبىرىنشى كەزەككە قويعانى ابزال. مىسالى, ءبىزدىڭ اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە 2009 جىلدان بەرى «ۇلتتىق تاربيە», «ابايتانۋ» پاندەرى وقىتىلىپ كەلە جاتقانى وسى ۇلتجاندى ازاماتتاردى قالىپتاستىرۋ ماقساتىنان تۋىنداعانى ءسوزسىز.
جالپى, ۇلتتىق تاربيە تۋرالى يدەيا بۇگىنگى كۇن تالابى مەن ومىرلىك قاجەتتىلىكتەن تۋىنداپ وتىر. قازاق ەلىنىڭ الەمدىك كەڭىستىكتە ءوز جولىن تاڭداۋى ءاربىر قازاقتىڭ ەمىن-ەركىن ءومىر ءسۇرۋىنىڭ كەپىلى. ول, ءسوزسىز, ۇرپاقتار قامى دەگەن ۇعىممەن ءۇندەسەدى. ەل بولۋ, مەملەكەت قۇرۋ سوناۋ تۇركى زامانىنان جەلىسى ۇزىلمەي كەلە جاتقان ۇلتتىق ارمان-اڭسار. ەل بولۋ – بولاشاققا اشىلعان داڭعىل جول. سول بولاشاققا اشىلعان داڭعىل جولدى ۇلتتىق تاربيە ارقىلى ۇيرەنسەك, ەشكىمنەن كەم بولمايتىنىمىز انىق. بۇدان شىعاتىن قورىتىندى, ۇلتتىق تاربيە يدەياسى اتا-بابالار الدىنداعى قارىز بەن وكشەباسار ۇرپاقتىڭ الدىنداعى پارىز دەپ ءتۇسىنۋىمىز كەرەك. ياعني, پارىز بەن قارىزدىڭ تۇيىسەر تۇسى وسى ۇلتتىق تاربيە دەپ بىلەمىز. سوندىقتان, مۇندا الدىمەن مەملەكەت قۇرۋعا ۇيىتقى بولىپ وتىرعان ەتنوس پەن مەملەكەتتىڭ مۇددەسى قاتار تۇرۋعا ءتيىس. ويتكەنى, ءبىز بۇدان بىلايعى كەزەڭدە بۇكىل ادامزات بالاسى جاساعان وركەنيەتتەرمەن قاتار دامۋعا ءتيىس مادەنيەتتىڭ (قازاق مادەنيەتىنىڭ) مۇشەسى بولىپ سانالامىز. ەندەشە, ادامزات بالاسىنىڭ وسى ۋاقىتقا دەيىن جاساعان وزىق تاجىريبەلەرى مەن جەتىستىكتەرىن قولدان كەلگەنشە تۇگەل يگەرىپ, قاجەتىمىزگە پايدالانۋىمىز كەرەك. سون-
داي-اق, اعىمداعى ۋاقىتتىڭ تالابى مەن سۇرانىسىن قاناعاتتاندىرىپ وتىرۋ دا ۇلتتىق تاربيەدەگى نەگىزگى قاعيدانىڭ بىرىنە اينالۋعا ءتيىس. بۇل ءۇشىن قازاق ۇلتىن قاي تۇرعىدان دا جاڭا دارەجەگە, جاڭا ينتەللەكتۋالدى ساپاعا كوتەرىپ الۋ ءتيىمدى.
بۇگىنگى قازاق ۇلتى – بۇرىنعى كوشپەندى تۇرمىسقا بەيىمدەلگەن دالا حالقى ەمەس. بۇگىنگى قازاق ۇلتى – بۇرىنعى «قىزىل يدەولوگيانىڭ» قىسپاعىنداعى بودان حالىق تا ەمەس; بۇگىنگى قازاق ۇلتى – وركەنيەت ورتالىعى سانالاتىن قالا حالقىنا اينالىپ, ساپالىق جاعىنان كوپ ىلگەرىلەدى, بۇتىندەي اگرارلىق جاعدايدان يندۋستريالىق-يننوۆاتسيالىق مەملەكەت قۇرۋعا كوشىپ وتىر. سونىمەن بىرگە, «ماڭگى ەل» ۇلتتىق يدەياسىمەن قارۋلانعان تاۋەلسىز حالىق.
ءبىزدىڭ ويىمىزشا, ۇلتتىق تاربيە ءوزارا تىعىز بايلانىستى ەكى باستاۋدان ءنار الۋى ءتيىس. ونىڭ ءبىرىنشىسى – قازاق حالقىنىڭ تاريحي تاعدىرى قالىپتاستىرعان مەيىرىم, جاراسىم, ءتوزىم, شاپاعات, پاراسات, ىزەت, باقىت تۋرالى ارمان-اڭسار. تاراتىپ ايتساق, وسىنداي ارمان-اڭساردىڭ مادەنيەت پەن ونەردە, سالت-داستۇردە, ءتىل مەن دىلدە, ءدىني سەنىم-نانىمدا تۇرلىشە كورىنىستەرى بولۋى كەرەك. ەكىنشىسى – بۇگىنگى تاريحي كەزەڭ اياسىنداعى ناقتى باستان كەشىرىپ وتىرعان قوعامدىق-پسيحولوگيالىق احۋال. ءبىرىنشى جاعدايعا قاتىستى ويىمىزدى ودان ءارى ءوربىتەر بولساق, حالىقتىڭ مادەنيەتى مەن ادەبيەتى, ونەرى مەن سالت-ءداستۇرى, ءتىلى مەن ءدىلى, سەنىم-نانىمى مەن ءدىنى دەگەندە تاريحتىڭ سۇزگىسىنەن سارالانىپ وتكەن رۋحاني قۇندىلىقتارعا باسىمدىق سيپات بەرىلۋى كەرەك. مۇنىڭ ءوزى قوعامنىڭ تاريحي, پسيحولوگيالىق دامۋ باعىتىندا ەكىنشى ماسەلەنىڭ دە وڭ شەشىم تاباتىن جولىمەن ىلگەرى باسۋىنا كەپىل بولا الار ەدى.
ارينە, بۇگىنگى قوعامدىق-پسيحولوگيالىق احۋال دەگەندە وسى باعىتتاعى الەمدىك تاجىريبەلەردىڭ وزىق ۇلگىلەرى مەن جەتىستىكتەرى دە نازاردان تىس قالماۋى ءتيىس. تۇسىنگەن كىسىگە قازىرگى زامان كوزىمەن قاراساق, قوعام تۇبەگەيلى ءوزگەرگەن. جاستاردىڭ پسيحولوگياسى, تانىم-ءتۇيسىگى مۇلدەم باسقاشا. بۇگىنگى قوعامدىق قاتىناستار كەيىنگى ۇرپاقتى ءبارىبىر ءوز دەگەنىنە كوندىرۋدە. ءتىپتى, ۇلتتىق قۇرامى دا الا-قۇلا. ۇلت (وتباسى) الا-قۇلا بولعان سوڭ, ءتىلى دە ءبىركەلكى ەمەس. وسىعان بايلانىستى بۇگىنگى قازاق وتباسىنىڭ ۇلتتىق تاربيەسى كۇردەلى ءوزگەرىستەردى باستان كەشىرۋدە. مۇنداي ءوزگەرىستەرگە ءبىز ارقاشان دايىن بولۋىمىز كەرەك. ول ءۇشىن ءبىلىم ارقىلى تاربيەلەۋدىڭ الەمدىك وزىق ۇلگىلەرىنە ارقا سۇيەگەننەن ۇتپاساق, ۇتىلمايتىنىمىز انىق. سوندا عانا ءبىز باسەكەلەستىككە قابىلەتتى جاس ۇرپاق تاربيەلەۋگە قول جەتكىزە الامىز.
حالىقارالىق دەڭگەيدەگى ءبىلىمنىڭ باستى ەرەكشەلىگى – كۇشتى نارىقتىق باسەكەگە قاجەت كادر دايارلاۋ بولسا, ونىڭ العى شارتى ءبىلىم ارقىلى تاربيە بەرۋدىڭ ىشكى مەحانيزمىن قالىپتاستىراتىن جۇيە قۇرۋ دەگەن ءسوز. سوندىقتان, دۇنيەجۇزىلىك ءتالىم-تاربيە بەرۋدىڭ وزىق تاجىريبەلەرىن يگەرمەي ۇلتتىق تاربيە يدەياسىن تولىققاندى جۇزەگە اسىرا المايمىز. بۇگىنگى تاريحي-پسيحولوگيالىق احۋال بىزدەن وسىنى تالاپ ەتىپ وتىر. ونسىز ءبىلىم دە, تاربيە دە ءوز دەڭگەيىندە بولمايدى. شىن مانىندە, ءتاۋەلسىزدىك دەگەنىمىزدىڭ ءوزى ۇلتتىق ءمادەنيەتتىڭ ساقتالۋى جانە حالىققا رۋحاني قىزمەت ەتۋ الەۋەتى ەمەس پە؟! ول-ول ما, ۇلتتىق بوستاندىق ۇعىمىنىڭ ءتۇپكى مازمۇن-ماعىناسى دا وسىعان سايادى. جاستاردى ويداعىداي تاربيەلەۋگە ءبىزدىڭ ءمۇمكىندىگىمىز بار. ويتكەنى, ول ءۇشىن باتىس ءمادەنيەتىمەن, بىلىمىمەن باسەكەگە تۇسە الاتىنداي ءححى عاسىردا رۋحى بيىك مادەنيەتىمىز بەن ءبىلىمي الەۋەتىمىزدى قالىپتاستىرۋدى قولعا الۋ وتە-موتە ماڭىزدى. رۋحى مەن مادەنيەتى بيىك, ءبىلىمى تەرەڭ دەڭگەيدەگى ۇلت جاھاندانۋ دەگەن الىپ مۇحيتتىڭ ۇستىندە ءوزىنىڭ كەلبەتىن جوعالتپايدى. ونداي ۇلتتىڭ دا, مەملەكەتتىڭ دە بولاشاعى جارقىن. پرەزيدەنتتىڭ «ينتەللەكتۋالدى ۇلت-2020» ۇلتتىق باعدارلاماسىنداعى يدەيامەن قارۋلانعان اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ۇجىمى ۇلتتىق تاربيە تۇجىرىمداماسىن جاسادى. بۇگىندە ءبىز ۋنيۆەرسيتەتتە تاربيە ماسەلەسىن, ونىڭ ىشىندە ۇلتتىق تاربيە پروب-
لەماسىنا ءبىرىنشى كەزەكتە دەن قويىپ وتىرمىز. ويتكەنى, ۇلتتىق تاربيە باستاۋلارىنان ءنار العان مادەنيەتتى, پاراساتتى جاستار وقۋ-ءبىلىمدى ءوزىنىڭ ومىرلىك مۇراتىنا اينالدىرىپ, جان-جاقتى ىزدەنەتىنى, عىلىممەن شۇعىلداناتىنى ءسوزسىز. ءبىلىم مەن عىلىم, شىندىعىندا, اسا زور وندىرگىش كۇش, زور بايلىق. سوندىقتان, دا الەمدىك جاڭا يدەولوگيا ءبىلىم كۇشىنە سۇيەنەدى. سونداي-اق, قازىرگى زامانداعى ءبىلىم بەرۋ جۇيەسىنىڭ ءمىندەتى – قازىرگى جاستارىمىزدىڭ ءبىلىم الىپ قانا قويماي, تاربيەلى, ادەپتى, ۇلتجاندى, زياتكەر بولۋىن قامتاماسىز ەتۋ.
ءبىزدىڭ ۋنيۆەرسيتەتىمىزدىڭ ءبىلىم مەن تاربيەنىڭ اجىراماس بىرلىگىن قامتاماسىز ەتە الاتىن ەجەلدەن قالىپتاسقان كلاسسيكالىق داستۇرلەرى, ۇلتتىق ەرەكشەلىكتەرى بار. سونداي-اق, ول كەڭ ءورىستى بازالىق جانە كاسىبي مادەنيەتكە نەگىزدەلگەن. ۋنيۆەرسيتەتتىڭ پەداگوگيكالىق الەۋەتى بولاشاق مامانداردىڭ كاسىبي بىلىكتىلىگىن جەتىلدىرۋ ءىسىندە عانا ەمەس, ولاردىڭ ازاماتتىق جاۋاپكەرشىلىگىن, وتانشىلدىق رۋحىن, ەلدىك, مەملەكەتشىلدىك سانا مەن ۇلتتىق ار-وجدان سياقتى قاسيەتتەرىن تاربيەلەۋدە جيناقتاعان ءىس-تاجىريبەلەرى اسا مول. ءبىزدىڭ ۋنيۆەرسيتەتتىڭ ەلىمىزدىڭ باسقا جوعارى وقۋ ورىندارىنان باستى ەرەكشەلىگى دە وسىندا.
«ۇلتتىق تاربيە» باعدارلاماسىن جۇزەگە اسىرۋداعى ەڭ باستى قاجەتتىلىك – جاستاردىڭ رۋحاني تاربيەسىن جەتىلدىرۋ دەيتىن بولساق, بۇل بۇگىنگى كۇندەگى ەڭ وزەكتى ماسەلەنىڭ ءبىرى سانالادى. سوندىقتان, وقۋ ۇدەرىسىنە «ۇلتتىق تاربيە» ساباعى ەنگىزىلىپ, ول جەكە ءپان رەتىندە بارلىق ماماندىقتار بويىنشا وقىتىلۋدا. باعدارلامانىڭ ءتيىستى جۇمىس ىستەۋى ءۇشىن وعان 4 كرەديت ءبولىنىپ, تيىسىنشە وقۋ جوس-
پارىنا ەنگىزىلدى. سونىمەن بىرگە, ارنايى «ۇلتتىق تاربيە» كافەدراسى اشىلىپ, وعان ءوز ءىسىنىڭ بىلگىرلەرى سانالاتىن بىلىكتى دە تاجىريبەلى ماماندار تارتىلىپ وتىر. وسى باعىت بويىنشا مەملەكەتتىك تىلدە وقۋلىقتار مەن وقۋ قۇرالدارى دايىندالدى. كەلەشەكتە «ۇلتتىق تاربيە» ءپانى ۇلتتىق رۋحتىڭ, ءتىل مەن ءدىلدىڭ التىن قازىعى سانالاتىن بالاباقشادان باستاپ, جوعارى وقۋ ورنىنا دەيىنگى بارلىق دەڭگەيدەگى وقۋ ورىندارىندا كاسىبي-بازالىق دەڭگەيدە وقىتىلاتىنىنا سەنىمىمىز كامىل.
قازىر ءبىزدىڭ بۇل باستامامىز ەلىمىزدە كەڭىنەن قولداۋ تاۋىپ, جوعارى وقۋ ورىندارىندا ۇلتتىق تاربيەنى وقىتۋعا ەرەكشە دەن قويىلۋدا. ۇلى اباي مۇرالارى دا ۇلتتىق قۇندىلىقتارعا تولى. سونداي-اق, حالىقتىڭ شەشەن-بيلەرىنىڭ, اقىندارىنىڭ, كۇيشىلەرىنىڭ مۇرالارى دا رۋحاني بايلىعىمىزدىڭ قاينار كوزى. ءبىز ولاردى مەكتەپتە دە, جوعارى وقۋ ورىندارىندا دا مىنا وزگەرمەلى زامانعا لايىقتاپ وقىتىپ, ۇرپاق يگىلىگىنە اينالدىرۋىمىز كەرەك. ال ءبىلىم بەرۋ سالاسى دا ۇنەمى ۇلتتىق سيپاتپەن بايىتىلىپ وتىرسا نۇر ۇستىنە – نۇر.
مىنە, بۇل دا بولسا ەلباسىمىز ن.ءا.نازارباەۆتىڭ «بولاشاققا باعدار: رۋحاني جاڭعىرۋ» ەڭبەگىنەن تۋىندايتىن ۇلتتىق سانانى قالىپتاستىرۋ تۋرالى ءمىندەتتى جۇزەگە اسىرۋعا باستايتىن سارا جولداردىڭ ءبىرى.
ەلباسى ۇسىنىپ وتىرعان ەكىنشى جوبا – «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى. وسى جوبا بويىنشا تاريح, ساياساتتانۋ, الەۋمەتتانۋ, فيلوسوفيا, پسيحولوگيا, مادەنيەتتانۋ سياقتى گۋمانيتارلىق باعىتتار بويىنشا الەمدەگى جاقسى 100 وقۋلىق ءارتۇرلى تىلدەردەن قازاق تىلىنە اۋدارىلىپ, جاستارعا دۇنيە ءجۇزىندەگى تاڭداۋلى ۇلگىلەردىڭ نەگىزىندە ءبىلىم الۋعا مۇمكىندىك جاسالادى. ءتىپتى, 2018-2019 وقۋ جىلىنىڭ وزىندە ستۋدەنتتەر وسى وقۋلىقتارمەن وقىتىلا باستايتىنى ءبىزدى قۋانتۋدا.
«100 وقۋلىق» باعدارلاماسى بويىنشا ءجۇز مىڭداعان ستۋدەنتكە جاڭا ساپالىق دەڭگەيدە ءبىلىم بەرەتىن بولساق, مۇنىڭ ءوزى ءبىلىم سالاسىنداعى جاھاندىق باسەكەگە نەعۇرلىم بەيىمدەلگەن مامانداردى دايارلاۋعا قول جەتكىزىلەدى. جىكتەپ ايتار بولساق, الەم ەلدەرىنىڭ ەڭ تاڭداۋلى وقۋلىعىن وقىتۋ ارقىلى ستۋدەنتتەرىمىزدىڭ ءدۇنيەتانىمى كەڭەيىپ, جاھاندىق ءوركەنيەتتەن حابارى ارتا تۇسەتىنى ءسوزسىز.
ەلباسى ۇسىنعان ءۇشىنشى مىندەت: «تۋعان جەر» باعدارلاماسىن جۇزەگە اسىرۋ. ءبىز وتباسىندا, بالا باقشادا, مەكتەپ پەن جوعارى وقۋ ورىندارىندا جاستارىمىزدىڭ بويىندا تۋعان جەرگە دەگەن سۇيىسپەنشىلىكتى سىڭىرە وتىرىپ تاربيەلەسەك كۇنى ەرتەڭ ولار تۋعان ەلىن دە, وتانىن دا قادىرلەپ, قاستەرلەيتىن جاناشىر ۇرپاق بولىپ قالىپتاسارى ءسوزسىز. «تۋعان جەر» باعدارلاماسى جاس ۇرپاقتى پاتريوتيزمگە تاربيەلەۋگە باعىتتالعان ومىرشەڭ قۇجات بولىپ تابىلادى. سوندىقتان, مەكتەپ تە, جوعارى وقۋ ورىندارى دا الداعى ۋاقىتتا وسى قۇجاتتى جۇزەگە اسىرۋعا جۇمىلۋى ءتيىس.
قىسقاسى, ەلباسىنىڭ ۇسىنىستارى مەن كەڭەستەرى قازاقستاننىڭ ءۇشىنشى جاڭعىرۋى كەزەڭىندە حالقىمىزدىڭ ۇلتتىق سانا-سەزىمىن بيىك دەڭگەيگە كوتەرۋ ارقىلى ماڭگىلىك ەلدىڭ ماڭگىلىك ۇرپاقتارىن ءتاربيەلەپ قالىپتاستىرۋ نيەتىنەن تۋىنداعان جاناشىرلىقتىڭ ايعاعى دەۋگە بولادى.
بۇگىندە ءبىزدىڭ ۋنيۆەرسيتەتىمىزدە ەلباسىنىڭ «بولاشاققا باعدار: رۋحاني جاڭعىرۋ» تاقىرىبىنداعى باعدارلامالىق ماقالاسىن پروفەسسور-وقىتۋشىلار قۇرامى مەن ستۋدەنتتەر اراسىندا تالقىلاۋ, ءتۇسىندىرۋ جانە ناسيحاتتاۋ باعىتىندا اۋقىمدى ءىس-شارالار جۇرگىزىلۋدە. العاشقى كۇننىڭ وزىندە «رۋحاني جاڭعىرۋ – قازاقستان دامۋىنىڭ نەگىزى» تاقىرىبىندا جالپى ۋنيۆەرسيتەتتىك دوڭگەلەك ۇستەل وتكىزىلىپ, بەلگىلى ساياساتتانۋشى عالىمدار ءوز ويلارىن ورتاعا سالسا, ونان بەرى ۋنيۆەرسيتەت قۇرامىنداعى بارلىق ينستيتۋتتار ەلباسىنىڭ بۇل ەڭبەگى بويىنشا اشىق دارىستەر وتكىزۋدە. ايتالىق, «فيلولوگيا جانە كوپتىلدى ءبىلىم بەرۋ» ينستيتۋتى وتكىزگەن «رۋحاني جاڭعىرۋ: قوعام, ءبىلىم جانە عىلىم» تاقىرىبىنداعى سيمپوزيۋمعا ءوز ەلىمىزدىڭ بەلگىلى عالىمدارى مەن شەتەلدىك عالىمدار دا ءبىزدىڭ ەلباسىمىزدىڭ جاڭا ەڭبەگىن جان-جاقتى تالقىلاپ, وعان جوعارى باعا بەردى. مۇنداي يگىلىكتى ءىس-شارالار ۇنەمى جالعاسىن تاباتىن بولادى.
سەرىك پىراليەۆ,
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى,
ۇعا اكادەميگى, پروفەسسور
