كەڭەس بارىسىندا الەمدىك يننوۆاتسيالىق كوشباسشى كومپانيالارمەن بىرلەسكەن ىنتىماقتاستىق ورناتۋ ماسەلەلەرى, سونىمەن قاتار, پرەمەر-مينيستر ب.ساعىنتاەۆتىڭ اقش-قا جۇمىس ساپارى كەزىندە قول جەتكىزىلگەن ۋاعدالاستىقتار قارالدى. ب.ساعىنتاەۆ كەڭەس قورىتىندىسى بويىنشا جاۋاپتى مەملەكەتتىك ورگاندارعا بىرقاتار ناقتى تاپسىرمالار بەردى.
جاڭا جولاۋشىلار تەرمينالىنىڭ قۇرىلىسىمەن تانىستى
حالىقارالىق ەكسپو-2017 كورمەسى قارساڭىندا پرەمەر-مينيستر ب.ساعىنتاەۆ استانا اۋەجايىن ارالاپ, جاڭا جولاۋشىلار تەرمينالدارىنىڭ قۇرىلىسى بارىسىمەن تانىستى, سونداي-اق, اۋەجايدىڭ قولدانىستاعى تەرمينالدىڭ جۇمىسى تۋرالى باياندامانى تىڭدادى, دەپ حابارلادى پرەمەر-ءمينيستردىڭ ءباسپاسوز قىزمەتى.
استانا اۋەجايىنىڭ جولاۋشىلار تەرمينالىن جوندەۋ «نۇرلى جول» باعدارلاماسىن ورىنداۋ اياسىندا 2015 جىلدىڭ قاڭتارىنان باستاپ جۇرگىزىلىپ جاتىر. جوبادا جالپى اۋدانى 47 000 ش.م. بولاتىن تەرمينال سالۋ قاراستىرىلعان, ونى اياقتاعان سوڭ اۋەجايدىڭ ءوتكىزۋ قابىلەتى جىلىنا 8,2 ملن-نان استام جولاۋشىنى قۇرايدى.
1 ماۋسىمعا قاراي جاڭا تەرمينال ءبىرىنشى رەيستىڭ جولاۋشىلارىن قابىلداۋعا دايىن بولادى دەپ كۇتىلۋدە.
پرەمەر-مينيستر باقىتجان ساعىنتاەۆ پرەزيدەنت ن.نازارباەۆتىڭ استانا قالاسىنىڭ الەۋمەتتىك-ەكونوميكالىق دامۋى ماسەلەلەرى جانە حالىقارالىق ەكسپو-2017 مامانداندىرىلعان كورمەسىنە دايىندىق بارىسى بويىنشا تاپسىرمالاردى ىسكە اسىرۋ جونىندە كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەڭەس بارىسىندا, مەملەكەت باسشىسى ەكسپو-2017 اۋماعىن ارالاۋ كەزىندە ءوز ءسوزىندە ايتىپ وتكەندەي, استانا قالاسىن ەلىمىزدەگى تسيفرلى تەحنولوگيالاردى ەنگىزۋگە ارنالعان نەگىزگى الاڭ رەتىندە دامىتۋ ماسەلەلەرى تالقىلاندى. وسىعان بايلانىستى پرەمەر-مينيستر ب.ساعىنتاەۆ ەلوردا اكىمدىگىنە عانا ەمەس, بارلىق مەملەكەتتىك ورگاندارعا ەلوردانىڭ كولىك ينفراقۇرىلىمىن, تۇرعىن ءۇي سەكتورىن, قالا باسقارماسىنىڭ بارلىق سالالارىندا زاماناۋي تسيفرلى تەحنولوگيالاردى ەنگىزۋدى اۋقىمدى دامىتۋ بويىنشا بىرقاتار تاپسىرمالار بەردى.
