القالى جيىننىڭ كۇن ءتارتىبىندە ۇيىمدىق ماسەلە قارالدى. فارحاد شايمۇرات ۇلى «نۇر وتان» پارتياسى وبلىستىق فيليالىنىڭ توراعاسى قىزمەتىنە وبلىس اكىمى ق.اقساقالوۆتىڭ كانديداتۋراسىن ۇسىنىپ, مەملەكەتتىك, شارۋاشىلىق قىزمەتتەردەگى ەڭبەك جولىمەن, باسشىلىقتا جيناقتالعان مول تاجىريبەسىمەن قىسقاشا تانىستىرىپ ءوتتى. كونفەرەنتسيا دەلەگاتتارى ۇسىنىستى ءبىراۋىزدان قولدادى.
قۇمار ىرگەباي ۇلى جينالعاندارعا ارناعان سوزىندە وزىنە ۇلكەن سەنىم بىلدىرگەنى ءۇشىن العىس ايتىپ, الدا تۇرعان ساياسي-يدەولوگيالىق تالاپتارعا توقتالدى. بۇل رەتتە كونستيتۋتسيالىق رەفورمالاردان ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسكەگە قابىلەتتىلىك» جولداۋىنان, «بولاشاققا باعدار: رۋحاني جاڭعىرۋ» ماقالاسىنان تۋىندايتىن باستى قاعيداتتارعا ەرەكشە ەكپىن ءتۇسىرىپ, دەلەگاتتار نازارىن جەدەل شەشىمىن تاباتىن ماسەلەلەرگە اۋداردى.
اگروونەركاسىپتىك كەشەندى, ينفراقۇرىلىمدى, جۇمىسپەن قامتۋدى, اۋىلداعى كاسىپكەرلىكتى, تۇرعىن ءۇي قۇرىلىسىن دامىتۋ باعدارلامالارىنان تۋىندايتىن مىندەتتەردى شەشۋدە پارتيا ءمۇشەلەرىنەن بەلسەندىلىك, ىسكەرلىك, زور ۇيىمداستىرۋشىلىق قاسيەتتەر قاجەت ەتىلەدى. ساياسي, ەكونوميكالىق قايتا قۇرۋلاردىڭ زاڭدى جالعاسى بولىپ تابىلاتىن رۋحاني جاڭعىرۋدىڭ ۇلگىلى ۇدەرىستەرىن تاجىريبەگە اينالدىرا وتىرىپ, ەلباسى ۇسىنعان جوبالارعا ءبىر كىسىدەي قاتىسۋدىڭ ماڭىزى زور. بيزنەس جانە شارۋا قوجالىقتارى وكىلدەرى ەسەبىنەن پارتيا قاتارىن تولىقتىرۋ, ساپالىق قۇرامعا باسا كوڭىل ءبولۋ, قوعامدىق باقىلاۋدى كۇشەيتۋ تاپسىرمالارى جۇكتەلدى.
كەزەكتەن تىس كونفەرەنتسيادا جەرگىلىكتى بولىمشە توراعاسىنىڭ ءبىرىنشى ورىنباسارى ارتۋر مولداعۇلوۆ بيىل اتقارىلعان جۇمىستار تۋرالى بايانداما جاسادى.
جيىندا فيليالدىڭ ساياسي كەڭەسى مەن بيۋروسىنىڭ جاڭا قۇرامى سايلاندى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
