قالا باسشىسى تۇرعىن الاپتارىنىڭ قۇرىلىس الاڭدارىندا بولىپ, قۇرىلىس الاڭدارىنىڭ سانيتارلىق جاعدايىن, اباتتاندىرۋ ەرەجەلەرىنىڭ ساقتالۋىن, دوڭگەلەك جۋ بەكەتتەرىنىڭ جانە ول جەردەن اۆتوجولعا دەيىن قاتتى توسەمنىڭ بار-جوعىن تەكسەردى. اكىم ءتيىستى ۆەدومستۆولاردىڭ باسشىلارىنا اباتتاندىرۋ ماسەلەلەرىن ءبىر اپتا ىشىندە شەشۋ تۋرالى تاپسىرما بەردى, سونداي-اق, اباتتاندىرۋ جانە سانيتارلىق كۇتىپ-ۇستاۋ ەرەجەلەرىن ساقتاماعان بۇزۋشىلاردى جاۋاپكەرشىلىككە تارتۋدى بۇيىردى. اكىم قالا اۋماعىنداعى زاڭسىز قۇرىلىس ۇيىندىلەرىن جويىپ, قۇرىلىس الاڭدارىندا قاتتى تۇرمىستىق قالدىقتاردى ۇيۋگە جول بەرمەۋدى تالاپ ەتتى.
سونداي-اق, اكىم قالانىڭ ورتالىق جانە قوسالقى كوشەلەرىمەن ءجۇرىپ ءوتتى, ءۇش اۋداننىڭ ىقشام اۋداندارى مەن تۇرعىن الاپتارىن ارالادى, وسىلايشا جول توسەمىنىڭ, تروتۋارلاردىڭ, عيماراتتاردىڭ قاسبەتتەرىن, كوشەنى جارىقتاندىرۋ تىرەكتەرىنىڭ, جاياۋ جۇرگىنشى جولدارىنىڭ جانە كوگالداردىڭ جاعدايىن تەكسەردى. اۋلاارالىق جول وتكەلدەرى, كولىك كوپ قويىلاتىن ورىندار مەن پاركينگتەر تەكسەرىلدى.
ناتيجەسىندە, قالا باسشىسى ەلورداداعى نىساندار, اۋلالار مەن كوشەلەر تازالىق پەن ءتارتىپ تالاپتارىنا جاۋاپ بەرىپ, تۇرعىندار ءۇشىن قاۋىپسىز بولۋى كەرەكتىگىن اتاپ كورسەتتى. جاۋاپتى قىزمەتتەردىڭ باسشىلارىنا بارلىق قوعامدىق نىسانداردىڭ جاعدايىن كۇندەلىكتى باقىلاۋعا الۋدى تاپسىردى. سونىمەن بىرگە, قالا باسشىسى تالاپتاردى ورىنداماعان قانداي دا ءبىر ۋچاسكە ءۇشىن جاۋاپتى ءبىرىنشى باسشىلار, ولارعا قارايتىن جۇمىسكەرلەر قاتاڭ جازالاناتىنىن ايتتى. ءتيىمسىز جۇمىسى انىقتالعان جاۋاپتى ۇيىمدارعا قاتىستى اكىمشىلىك تۇردەگى قاتاڭ شارالار قابىلدانادى.
