قازاقستان حالقى اسسامبلەياسىنىڭ وكىلدەرى مەن ەلوردالىق ەتنومادەني بىرلەستىكتەردىڭ مۇشەلەرى قاتىسقان القالى جيىندا مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسى قىزۋ تالقىلاندى. سونداي-اق, ولار ەلباسى ماقالاسىنىڭ باستى باعىتتارى مەن «قازاقستانداعى 100 جاڭا ەسىم» جوباسى بويىنشا ۇسىنىستار ازىرلەۋ كەرەكتىگىنە نازار اۋداردى.
قحا مۇشەسى, استانا قالاسىنىڭ وزبەك ەتنومادەني بىرلەستىگىنىڭ توراعاسى شەرزود پۋلاتوۆ, مەملەكەت باسشىسى حالىق اراسىنداعى دوستىق پەيىلدى كەڭىنەن ناسيحاتتاپ, جايدارى قارىم-قاتىناستى اركەز تۋ ەتۋگە بارىنشا جاعداي جاساپ كەلە جاتقانىن اتاپ ءوتتى.
«كەشە عانا ەلباسىمىز ءوز حالقىنا رۋحاني جاڭعىرۋ جولىن نۇسقاپ, ەلىمىزدىڭ جاڭا تاريحي كەزەڭگە اياق باسقاندىعىن, قايتا تۇلەۋدىڭ ايرىقشا ماڭىزدى ەكى پروتسەسى – ساياسي رەفورما مەن ەكونوميكالىق جاڭعىرۋدى قولعا العانىمىزدى ايتتى. وسى ماقساتتا كوزدەلگەن جۇمىستاردىڭ ءبارى دە دەر كەزىندە جانە بارىنشا ءتيىمدى جۇزەگە اساتىندىعىنا سەنىم ءبىلدىردى. پرەزيدەنتىمىز «مەن حالقىمنىڭ تاعىلىمى مول تاريحى مەن ىقىلىم زاماننان ارقاۋى ۇزىلمەگەن ۇلتتىق سالت-داستۇرلەرىن الداعى وركەندەۋدىڭ بەرىك ءدىڭى ەتە وتىرىپ, ءاربىر قادامىن نىق باسۋىن, بولاشاققا سەنىممەن بەت الۋىن قالايمىن», دەپ تۇتاس قوعامنىڭ جانە ءاربىر قازاقستاندىقتىڭ ساناسىن جاڭعىرتۋدىڭ بىرنەشە باعىتىن ايقىندادى. بۇل − بىزدەر ءۇشىن باعىندىرار ءبىر بەلەس», – دەدى ش.پۋلاتوۆ.
سونداي-اق, وتىرىسقا قاتىسۋشىلار رۋحاني جاڭعىرۋ ماقساتى بويىنشا ناقتىلاپ ايتىلعان ەلىمىزدىڭ مىقتى, ءارى جاۋاپكەرشىلىگى جوعارى ءبىرتۇتاس ۇلت بولۋ ءۇشىن بولاشاققا قالاي قادام باسامىز جانە وسى ماقسات جولىندا بۇقارالىق سانانى قالاي وزگەرتەمىز دەگەن ماسەلەنى دە كۇن تارتىبىنە شىعاردى.
«وتاندى ءسۇيۋ – بابالاردان ميراس بولعان ۇلى مۇرانى قادىرلەپ, ونى كوزدىڭ قاراشىعىنداي ساقتاپ, كەيىنگى ۇرپاققا امانات ەتىپ, تابىستاۋ ازاماتتىق بورىشىمىز. ەلدىڭ تۇتاستىعى مەن بىرلىگى, تاتۋلىعى مەن تىنىشتىعىن تۋ ەتۋ, تەك لاۋازىمدى ادامداردىڭ عانا جۇمىسى ەمەس, بۇل بارشامىزدىڭ دا ازاماتتىق پارىزىمىز. سوندىقتان, قوعامداعى ءاربىر قىزمەت ەتىپ وتىرعان ۇجىم ەلباسىمىزدىڭ حالىققا ارناعان جولداۋىن قولدايتىنىمىزدى بىلدىرە وتىرىپ, جاھاندىق دەڭگەيدەگى ەكسپو-2017 كورمەسىنىڭ كوڭىلدەگىدەي وتۋىنە ۇلەس قوسقانىمىز ءلازىم», – دەدى ش.پۋلاتوۆ.
ايتا كەتەيىك, ۇلتتىق بىرەگەيلىك پەن قوعامدىق كەلىسىمدى دامىتۋدىڭ جانە قحا-نىڭ ەلىمىزدە ەتنوسارالىق ديالوگ ورناتۋداعى ءرولى تالقىلانعان جيىندا «تۇران-استانا» ۋنيۆەرسيتەتىنىڭ ەكونوميكا جانە يننوۆاتسيالىق بيزنەس كافەدراسىنىڭ پروفەسسورى وراق اليەۆ تە ۇلتتىق بىرەگەيلىكتى ساقتاۋ, قازاقستاننىڭ ەۆوليۋتسيالىق دامۋ جولى تۋرالى پىكىر ءبىلدىرىپ, ءاربىر وتانداسىمىزدىڭ ءوز بىرەگەيلىگىن ءتۇسىنۋى ەل بىرلىگىنىڭ باستى قۇرالى ەكەنىن ايتتى.
جولدىباي بازار,
«ەگەمەن قازاقستان»
