1957 جىلى سول كەزدەگى وبلىستىق مادەنيەت باسقارماسىنىڭ باسشىسى ءنادىر نۇرعاليەۆ پەن كۇيشى سەيىلحان قۇسايىنوۆ دينا نۇرپەيىسوۆا اتىنداعى وركەسترگە ۇلتتىق مۋزىكالىق اسپاپتار دايىنداۋعا تاپسىرىس بەرەدى. كۇن-ءتۇن دەمەي وسى ىسكە كىرىسكەن بيسەنعالي مىرزاعاليەۆ 12 قوبىز بەن 14 دومبىرا جاسايدى. كەيىن سەيىلحان قۇسايىنوۆ ومىرلىك سەرىگى ەتكەن دومبىرا مەن راۋشان نۇرپەيىسوۆانىڭ قوبىزى دا وسى شەبەردىڭ قولىنان شىققان. ول دايىنداعان ساز اسپاپتارى ماسكەۋدەگى كورمەدە جوعارى باعالاندى, ال وركەستر «ۇزدىك شىعارماشىلىق ۇجىم» اتاندى. وبلىستا اشىلعان مۋزىكالىق ۋچيليششەنىڭ العاشقى ستۋدەنتتەرى دە شەبەر مىرزاعاليەۆ جاساعان مۋزىكالىق اسپاپتاردا وينادى. 66 جاسىندا ومىردەن وزعان بيسەنعالي مىرزاعاليەۆ قايتىس بولارىنان ەكى-اق كۇن بۇرىن ۇلتتىق اسپاپ جاساۋشىلاردىڭ ايماقتىق «ۇكىلى دومبىرا» بايقاۋىنا قاتىسىپ, باس جۇلدەنى جەڭىپ العان.
اعاشتان ءتۇيىن تۇيگەن شەبەردىڭ تۋعانىنا بيىل – 90 جىل. وسىعان وراي وبلىستىق تاريحي-ولكەتانۋ مۋزەيى «ونەگەلى مۇرا قالدىرعان» اتتى كورمە جانە ەسكە الۋ كەشىن وتكىزدى. مۋزەي قورىندا بيسەنعالي مىرزاعاليەۆ جاساعان دومبىرالار مەن شەبەرحاناسىنداعى قۇرال-جابدىقتار, سۋرەتتەر ساقتاۋلى. ارداگەر-ۇستاز, قازاقستاننىڭ مادەنيەت قايراتكەرى مەرەكە عۇماروۆ مىرزاعاليەۆتار وتباسىنداعى ونەرگە دەگەن قۇرمەت ءالى كۇنگە جالعاسىپ كەلە جاتقانىن ايتتى. «داۋىسى كۇمبىرلەگەن كەرەمەت دومبىرا جاساۋ ەكىنىڭ ءبىرىنىڭ قولىنان كەلمەيدى. ول اسقان تالانت پەن سەزىمتالدىقتى قاجەت ەتەتىن دۇنيە. بيسەنعالي مىرزاعاليەۆتىڭ قولىنان شىققان اسپاپتارعا تالاسىپ قالاتىنبىز, سەبەبى ول حاس شەبەر ەدى, اۋەندى سەزىنە بىلەتىن», - دەيدى م.عۇماروۆ.
باقىتگۇل باباش,
«ەگەمەن قازاقستان».
اتىراۋ.
