جارمەڭكەگە كەلگەن جاستاردىڭ سانى 800-دەن اسادى. بيىل ديپلومىن قولعا الاتىن ولاردى «بىردەن جۇمىسقا كىم الا قويسىن؟» دەگەن دە سۇراق قىلاڭ بەرۋى مۇمكىن. بىراق جارمەڭكەگە كەلگەن جۇمىس بەرۋشى تاراپتى كورگەندە كوڭىلدەگى كۇدىك سەيىلە ءتۇستى. وندا 107 جۇمىس بەرۋشى تاراپتىڭ وكىلى كەلىپتى. ونىڭ ءىشىندە ءبىلىم بەرۋ ۇيىمدارىنىڭ, ءوندىرىس ورىندارىنىڭ, قۇرىلىس كومپانيالارىنىڭ, تەلەكوممۋنيكاتسيا ورتالىقتارىنىڭ, مەملەكەتتىك ورگانداردىڭ باسشىلارى مەن وكىلدەرى بار. مىڭ ءتۇرلى ماماندىققا سان ءتۇرلى جۇمىس ۇسىنۋشىلار بار ەكەن.
كوڭىل قۋانتقانى, بۇل شارانى جارمەڭكە ءوتتى, ءبىتتى دەگەن جەلەۋدىڭ قاتارىنا قوسۋ قيسىنسىز. ويتكەنى, جارمەڭكە بارىسىندا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ رەكتورى, تەحنيكا عىلىمدارىنىڭ دوكتورى, پروفەسسور قىلىشباي بيسەنوۆ 12 تۇلەككە جۇمىسقا ورنالاسۋعا جولداما تابىستادى. ەكى-ءۇش ايدىڭ كولەمىندە وقۋ ءبىتىرەدى, ال جۇمىسى بولسا دايىن. وسىنداي جاعىمدى اسەر سىيلايتىن جاعدايلاردىڭ قوعامداعى قاساڭ قاعيدالاردى بۇزۋعا ىقپال جاسايتىنى جاقسى.
سول جەردە جۇمىسقا ورنالاسۋعا جولداما العانداردىڭ ءبىرى – ۋنيۆەرسيتەتتىڭ 4-كۋرس ستۋدەنتى دانا جوراباي. قىزىلوردا قالاسىنداعى ع.مۇراتباەۆ اتىنداعى №171 ورتا مەكتەبىنە اعىلشىن ءتىلى ءپانى مۇعالىمى بويىنشا جولداما العان ول وقۋدا دا وزات ەكەن. باستىسى, ءتورت جىل بويى وقىعان ەڭبەگىنىڭ زايا ەتپەي, جۇمىسقا ورنالاسۋعا وڭ ىقپالىن تيگىزگەنىن كوڭىلگە مەدەت تۇتادى. دانا وندىرىستىك ءتاجىريبەدەن وتەتىن كەزدە اتالعان مەكتەپكە بارعان. اعىلشىن ءتىلى ءپانىنەن ساباقتى جاقسى بەرىپ, باسشىنىڭ كوزىنە تۇسكەن. ۇيىمداستىرۋشىلىق قابىلەتى بار, وقۋ ءۇلگەرىمى جاقسى ماماننان كىم ايىرىلسىن؟! جاقسى كادر قاي جەردە دە باعالى. ۋنيۆەرسيتەت وسىنداي ستۋدەنتتەردىڭ پراكتيكادان ءوتۋ كەزەڭىن ەسكەرە وتىرىپ, 40-تان اسا مەكەمە مەن ۇيىمدار اراسىندا الەۋمەتتىك ارىپتەستىك ورناتقان.
مەكتەپ دەگەننەن شىعادى, قازىرگى كەزدە ەلىمىزدە پەداگوگيكا سالاسىندا ورىس ءتىلدى ماماندارعا سۇرانىس جوعارى. بۇل ماسەلە سىر ءوڭىرىنەن دە شەت قالماعان. ءماسەلەن, ءجارمەڭكەگە كەلگەن قالاداعى №9 مەكتەپ-ليتسەيىنىڭ وكىلى باستاۋىش سىنىپتىڭ ورىس ءتىلدى ءۇش ءبىردەي مامانى كەرەكتىگىن ايتتى. سوعان قاراعاندا, ورىس ءتىلى مەن ادەبيەتىن ءبىتىرەتىن ءتۇلەكتەر جۇمىس ءىزدەپ, كوپ سابىلا قويمايدى-اۋ.
وتكەن وقۋ جىلىندا 633 ءتۇلەك وسى وقۋ ورداسىنان قانات قاققان. بۇگىندە 85 پايىزى جۇمىسقا ورنالاسىپتى. بۇل – ءۇلكەن ءناتيجە, ناقتى كورسەتكىش. سونداي-اق, ۋنيۆەرسيتەت ءتۇلەكتەر وقۋ ءبىتىرگەننەن كەيىن ءۇش جىل قاتارىنان تۇراقتى تۇردە مونيتورينگ جۇرگىزىپ وتىرادى. وندا جاس مامانداردىڭ جۇمىسقا ورنالاسۋىنا, قىزمەتتە العا قاراي جىلجۋىنا ەرەكشە ءمان بەرىلەدى.
جارمەڭكە سوڭىندا ۋنيۆەرسيتەت رەكتورى ق.بيسەنوۆ جۇمىس بەرۋشى 9 مەكەمەنىڭ وكىلى: قىزىلوردا وبلىسىنىڭ ادىلەت دەپارتامەنتىمەن, «اتامەكەن» كاسىپكەرلەر پالاتاسىنىڭ قىزىلوردا وبلىستىق فيليالىمەن, اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ شارۋاشىلىق جۇرگىزۋ قۇقىعىنداعى «كازسۋشار» رەسپۋبليكالىق مەملەكەتتىك كاسىپورنىمەن, تۇتىنۋشىلاردىڭ قۇقىقتارىن قورعاۋ كوميتەتىنىڭ «ۇلتتىق ساراپتاما ورتالىعى» شارۋاشىلىق ءجۇرگىزۋ قۇقىنداعى رەسپۋبليكالىق مەملەكەتتىك كاسىپورىنمەن, قىزىلوردا وبلىستىق فيلارمونياسىمەن, №3 مەكتەپ-ليتسەيىمەن, «اق-يلياس» بالاباقشاسىمەن, «EcoGuard» جشس جانە قازالى اۋدانىنداعى «سىر مارجانى» جشس مەن ءوزارا ىنتىماقتاستىق تۋرالى مەموراندۋمعا قول قويدى. بۇل قۇجاتتىڭ ۋنيۆەرسيتەت تۇلەكتەرىنىڭ جۇمىسقا ورنالاسۋى كەزىندە كادەگە جارايتىنى انىق.
كاسىبي ءبىلىم بەرۋمەن قاتار, جاس ماماننىڭ جارقىن بولاشاعىن ويلاپ, جۇمىس تابۋىنا ءجاردەمدەسۋ ساۋاپتى ءىستىڭ قاتارىنان بولسا كەرەك. ولاي بولسا, مامانداردى دايىنداپ قانا قويماي, ولاردىڭ جۇمىسقا ورنالاسۋىنا دا سەپتىگىن تيگىزىپ وتىرعان ۋنيۆەرسيتەت ۇجىمىنا العىستان باسقا ايتارىمىز جوق.
ەرجان بايتىلەس,
«ەگەمەن قازاقستان»
قىزىلوردا
